Ang mga Payunir Nagabulig sa Iban
1 Si Jesus nagsiling: “Sa pagkamatuod, ang alanyon bugana, apang pila lamang ang mga mamumugon. Busa pakitluoy kamo sa Agalon sang alanyon nga magpadala sing mga mamumugon sa iya alanyon.” Bangod diutay lamang ang mga mangangani sadtong unang siglo kag malapad nga teritoryo ang dapat tuptupan, mahimo kuntani sila ginsugo ni Jesus nga bantalaan sing maayong balita ang mas madamo paagi sa pagpadala sa ila sing tag-isa-isa. Sa baylo, “ginpadala [niya] sila sing tagduhaduha.” (Luc. 10:1, 2) Ngaa tagduhaduha?
2 Yadtong mga disipulo bag-uhan kag indi eksperiensiado. Paagi sa pagpangabudlay sing magkaupod makatuon sila kag makapalig-on sa isa kag isa. Subong sang ginsiling ni Solomon, “ang duha maayo pa sa isa.” (Manugw. 4:9, 10) Bisan pagkatapos ginpasagahay ang balaan nga espiritu sang Pentecostes 33 C.E., gin-updan nanday Pablo, Bernabe, kag sang iban pa ang mga masigkatumuluo sa ministeryo. (Binu. 15:35) Daw ano ka daku nga pribilehiyo para sa pila nga mahanas sing personal sining sangkol nga mga lalaki!
3 Isa ka Programa Sang Maayo nga Paghanas: Kaangay sadtong unang-siglo, ang modernong Cristianong kongregasyon isa ka organisasyon nga nagabantala. Nagahanas man ini sa aton. Subong mga indibiduwal, ang aton tinagipusuon nga handum amo ang epektibo nga pagtanyag sing maayong balita. Agod mapauswag sang mas madamo nga manugbantala ang ila pagkaepektibo, may yara bulig nga matigayon.
4 Sa Kingdom Ministry School nga ginhiwat sining karon lang, ginpahibalo sang Sosiedad ang isa ka programa para mabuligan sang mga payunir ang iban sa ministeryo sa latagon. Kinahanglan bala ini? Huo. Sobra sa isa ka milyon ka manugbantala ang ginbawtismuhan sang nagligad nga tatlo ka tuig, kag madamo sa ila ang nagakinahanglan sing paghanas agod mangin mas epektibo sa pagbantala nga hilikuton. Sin-o ang sarang makabulig?
5 Ang bug-os tion nga mga payunir sarang makabulig. Ang organisasyon ni Jehova nagahatag sa ila sing madamo nga laygay kag paghanas. Ang mga payunir nakabaton sing panudlo nga ginpasigo sa ila mga kinahanglanon sa duha ka semana nga Pioneer Service School. Nakabaton man sila sing bulig gikan sa mga miting upod sa mga manugtatap sang sirkito kag distrito, subong man gikan sa panuytoy sang mga gulang. Bisan indi tanan nga payunir eksperiensiado subong anay nanday Pablo kag Bernabe, nakabaton sila sing hamili nga paghanas, kag nalipay sila nga ipaambit ini.
6 Sin-o ang Mabuligan? Ini bala nga programa limitado lamang sa bag-ong mga manugbantala ukon sa bag-ong mga bawtismado? Indi! May mga bataon kag mga tigulang nga tinuig na sa kamatuoran ang nalipay nga mabuligan sa pila ka bahin sang ministeryo. Ang iban maayo magpahamtang sing literatura apang nabudlayan sila sa paghimo sing mga pagduaw liwat ukon sa pagsugod sing mga pagtuon sa Biblia. Ang iban mahimo mahapos makasugod sing mga pagtuon sa Biblia apang napanilagan nga ang ila mga estudyante wala nagauswag. Ano bala ang nagapugong sa mga estudyante? Ang eksperiensiado nga mga payunir mahimo mapangabay sa pagbulig sa sining mga bahin. Ang iban nga mga payunir epektibo sa pagpalambo sing interes, sa pagsugod sing mga pagtuon sa Biblia, kag sa pagtuytoy sa bag-ong mga estudyante pakadto sa organisasyon. Ang ila eksperiensia mangin mapuslanon sa sining bag-ong programa.
7 Natukiban mo bala nga ang imo iskedyul wala nagatugot sa imo nga suportahan ang regular nga mga miting sang kongregasyon sa pag-alagad sa latagon bisan pa luyag mo? Ang payunir mahimo makapangabudlay upod sa imo sa mga tion nga wala na sing iban nga manugbantala nga makaupod sa imo.
8 Ang Maayo nga Kooperasyon Kinahanglanon: Makaduha sa isa ka tuig, ang mga gulang magahimo sing mga kahimusan para makapakigbahin sa programa nga Ang mga Payunir Nagabulig sa Iban ang mga manugbantala nga luyag magpabulig. Kon sugot ka nga buligan, makig-upod sa payunir nga manugbantala nga gintangdo nga magabulig sa imo, maghimo sing praktikal nga iskedyul sa pag-alagad, kag sunda ini. Tumana ang kada iskedyul. Samtang nagapangabudlay sing magkaupod, panilagi ang epektibo nga mga paagi sa pagtanyag sing maayong balita. Usisaa kon ngaa ang pila ka paagi epektibo. Binagbinaga ang mga panugda nga mahimo ihatag sang payunir nga manugbantala para mapauswag ang imo presentasyon. Samtang ginaaplikar mo ang mga butang nga natun-an, ang imo pag-uswag sa ministeryo makita mo kag sang iban. (Tan-awa ang 1 Timoteo 4:15.) Kon mahimo, pirme kamo magpangabudlay sing magkaupod, nagapakigbahin sa tanan nga bahin sang ministeryo, lakip na sa dipormal nga pagpanaksi apang magkonsentrar sa isa ka partikular nga bahin nga sa sini nagakinahanglan ikaw sing personal nga bulig.
9 Ang manugtatap sa pag-alagad interesado sa ginahimo nga pag-uswag. Sa pulupanag-on, pamangkuton niya ang konduktor sang Pagtinuon Sang Kongregasyon sa Libro agod hibaluon kon paano ikaw nabuligan sang programa. Ang manugtatap sang sirkito magabulig man sa imo kon magduaw sia sa kongregasyon.
10 Luyag ni Jehova hanason kag ‘sangkapan para sa tagsa ka maayong buhat’ ang iya katawhan. (2 Tim. 3:17) Tamda ang kahimusan nga Ang mga Payunir Nagabulig sa Iban subong isa ka maayong aman agod buligan yadtong luyag mapauswag ang ila ikasarang sa pagbantala sang pulong. Kon pribilehiyo mo nga makapakigbahin sa sini, himua ini nga may pagpasalamat, pagpaubos, kag kalipay.