Agdaha ang Iban sa Pagsunod sa Pinakabantog nga Tawo
1 Sa Mateo 5:14, si Jesus nagsiling sa iya mga disipulo: “Kamo ang kapawa sang kalibutan.” Dapat ibantala sang mga sumulunod ni Jesus sa mga tawo bisan diin ang nahanungod sa mahigugmaon nga aman ni Jehova para sa kaluwasan paagi kay Jesus. Nagahunahuna sina, nalangkag kita sa pagtanyag sang libro nga Ang Pinakabantog nga Tawo nga Nagkabuhi sa Disiembre. Yari ang pila ka panugda nga ayhan luyag mo gamiton.
2 Sa tapos mapakilala ang imo kaugalingon, ayhan magasiling ka:
◼ “Madamo ang nagapalibog kon kamusta si Jesus sang nagkabuhi sia subong tawo sa duta. Sa anong mga paagi sa banta mo sia tuhay gikan sa iban? [Pasabta sia.] Ini nga libro, Ang Pinakabantog nga Tawo nga Nagkabuhi, nagasugid sang iya kabuhi kag ministeryo, kag nagapaathag kon ano sia nga sahi sang tawo. Sa tapos ini mabasa, ang iban nagabatyag subong daw may kahigayunan sila nga makapakig-upod sa iya sing personal.” Ipakita ang nahauna nga laragway sa libro. Nian magkadto sa introduksion, kag basaha ang ikaduha nga parapo sa ubos sang subtitulo nga “Magbenepisyo Paagi sa Pagtuon Nahanungod sa Iya.” Itanyag ang libro.
3 Ukon ayhan magasiling ka sing kaangay sini:
◼ “Sa sini nga panag-on ang mga tawo nagahunahuna tuhoy kay Jesus. Apang, bangod sang tuman kadamo nga mga kalainan nga nagakatabo sa bug-os nga kalibutan, ayhan nagapalibog ang iban kon si Jesus nagaulikid gid sa aton. Ano sa banta mo?” Tuguti sia sa pagsabat. Buksi ang kapitulo 24 sang Pinakabantog nga Tawo nga libro, kag ipaathag sing malip-ot kon ngaa nagkari si Jesus sa duta. Nian basaha ang Juan 15:13, nga nagapadaku sang tinagipusuon nga gugma ni Jesus para sa iban. Itanyag ang pinakabag-o nga mga magasin, brosyur, ukon tract kon ang libro wala ginbaton.
4 Yari ang isa pa ka panugda:
◼ “Ang kalabanan nga mga pamatan-on nagapangita sing mga sulundan nga dapat ilugon, apang mabudlay makakita sing maayo. Si Jesucristo naghatag sing himpit nga halimbawa para sa tanan. [Basaha ang 1 Pedro 2:21.] Ang iya bug-os nga kabuhi nasentro sa pagsimba sa iya langitnon nga Amay. Ano sa banta mo ang matabo kon mas madamo nga tawo ang magatinguha nga mangin kaangay sa iya?” Tuguti sia sa pagsabat. Ipaathag kon paano ang Pinakabantog nga Tawo nga libro makabulig sa aton tanan nga mangin mas maayo nga mga Cristiano.
5 Ayhan luyag mo gamiton ang kaangay sini:
◼ “Kon ang isa nagasambit kay Jesucristo, madamo nga tawo ang nagahunahuna sa iya subong isa ka lapsag ukon subong isa ka nagaantos nga tawo nga malapit na mapatay. Ang ila ideya tuhoy kay Jesus nagalakip lamang sang iya pagkabun-ag kag sang iya kamatayon. Apang ang nahimo ni Jesus sang nagkabuhi sia nagaapektar sa tagsa ka tawo sa duta. Amo ina kon ngaa kinahanglan naton tun-an tubtob sa masarangan naton ang nahanungod sa makalilipay nga mga butang nga ginhimo niya tungod sa aton.” Basaha ang Juan 17:3. Buksi ang nahauna nga pahina sang introduksion sang Pinakabantog nga Tawo nga libro, kag basaha ang ikap-at nga parapo. Ipaathag kon paano matigayon kag magamit ang libro para sa personal nga pagtuon.
6 Pat-ura nga maghupot sing rekord sang mga interesado agod makahimo ka sing mga pagduaw liwat. Makugi naton nga buligan ang mga bunayag sing tagipusuon nga mangin mga sumulunod sang aton Manluluwas, nga si Jesucristo.—Mat. 16:24.