Palig-una Sila nga Mangin mga Sumulunod Niya
1 Sa 1 Corinto 3:6, si Pablo nagsulat: “Ako ang nagtanom, si Apolos ang nagbunyag, apang ang Dios ang padayon nga nagapatubo sini.” Ginabuligan diri ni Pablo ang iya mga kauturan nga pabilihan ang ila katungdanan sa pagtanom kag pagbunyag nga hilikuton.
2 Inang nagaluwas-kabuhi nga hilikuton pagatapuson sa aton adlaw. Subong dedikado nga mga Cristiano, katungdanan naton nga buligan ang iban nga mangin mga sumulunod ni Jesus. (Binu. 13:48) Paano mo tatapon ang interes nga nasapwan mo kon nagagamit sang libro nga Ang Pinakabantog nga Tawo nga Nagkabuhi?
3 Kon nagaduaw liwat sa isa ka tawo nga nagbaton sang libro, mahimo ka makasiling:
◼ “Sang nagligad naton nga paghambalanay, ginbilin ko sa imo ang libro nga Ang Pinakabantog nga Tawo nga Nagkabuhi. Ano ang labi nga gindayaw mo sa panudlo kag personalidad ni Jesus?” Pasabta sia. Buksi ang kapitulo 113, kag ipaathag ang pinakamaayo nga halimbawa ni Jesus tuhoy sa pagpaubos. Magpanugda sa pagbalik agod matun-an ini sing dugang.
4 Ayhan pakamaayuhon mo ini nga introduksion:
◼ “Ginhambalan naton ang mga butang nga ginhimo ni Jesus sang yari sia sa duta nga nagapakita nga tunay gid sia nga nagaulikid sa aton. Ano sa banta mo ang pagahimuon niya sa ulihi agod paumpawan yadtong nagaantos sing daku?” Pasabta sia. Buksi ang kapitulo 133, kag basaha ang mga punto sa ikalima nga parapo. Buksi ang larawan sa masunod nga pahina agod ipakita ang kahimtangan kon ang kabubut-on sang Dios pagahimuon sa duta. Magpanugda sa pagbalik para sa dugang nga paghambalanay.
5 Kon diutay lamang ang interes sang una nga gintanyag ang libro, ayhan masugdan mo ang inyo paghinun-anon sa sining paagi:
◼ “Madamo nga tawo karon ang nagailog sa isa nga ginatamod nila subong sulundan nila. Si Jesucristo amo ang labing maayo nga sulundan nga mailog ni bisan sin-o. Luyag ko ipaambit sa imo ang importante nga leksion nga natun-an ko gikan sa halimbawa ni Jesus. [Buksi ang pahina 40 sang Pinakabantog nga Tawo nga libro, kag patuhuyi ang gintudlo ni Jesus nahanungod sa kaluoy.] Nagpahanumdom ini sa akon kon paano ko dapat ipakita ini nga kinaiya sa iban.” Basaha ang Mateo 5:7. Itanyag ang libro kon ginpakita ang interes.
6 Ukon ayhan luyag mo tilawan ining direkta nga pagpalapit:
◼ “Sang nagligad ko nga pagduaw diri, ginhambalan naton ang importansia sang pagtigayon sing ihibalo nahanungod kay Jesus. Ang Juan 17:3 nagasiling nga ang pagkuha sina nga ihibalo ‘nagakahulugan sang kabuhi nga walay katapusan.’ Paano naton ina himuon?” Pasabta sia. Magpadayon paagi sa pagpaathag sang aton kahimusan sang pagtuon sa Biblia.
7 Si Pablo nagasiling nga ang isa ka manugpangabudlay sa alanyon “magabaton sang iya padya suno sa iya pagpangabudlay.” (1 Cor. 3:8) Kon magpangabudlay kita sing lakas agod buligan ang iban nga mangin mga sumulunod ni Jesus, ang aton padya mangin daku.