Pagbulig sa Iban sa Pagpangita sa Dios
1 Si Jehova nag-aman sa aton sing bugana nga espirituwal nga pagkaon agod buligan ang mga tawo sa pagpangita sa iya. (Binu. 17:27) Sa Enero igatanyag naton ang libro nga Mankind’s Search for God ukon, subong tal-us, ang True Peace and Security nga libro. Ang masunod nga mga panugda magabulig sa aton nga mangin handa agod ipakita sa aton mga isigkatawo ang kinahanglanon nga ‘pangitaon si Jehova’ kag ‘tawgon sia samtang nga malapit pa sia.’ (Isa. 55:6) Ang mga panugda mahimo pasibuon sa lokal nga mga sirkunstansia.
2 Kon nagatanyag sing libro nga “Mankind Search for God,” mahimo ka makasugod paagi sa pagsiling:
◼ “Makawiwili masugilanon ang mga tawo sang madamong lainlain nga mga relihion. Apang wala ka bala nagaugyon nga sa masami ginasunod lamang sang mga tawo ang relihion sang ila mga ginikanan sa baylo nga pangitaon ang Dios mismo? [Pasabta sia.] Ining libro, Mankind’s Search for God nagapaathag sang ginhalinan kag mga panudlo sang dalagku nga mga relihion. Nagasabat ini sang mga pamangkot nga dapat naton tanan mahibaluan sa pagpangita sa Dios.” Buksi ang pahina 17, parapo 28, kag ipakita ang lima ka pamangkot nga ginabinagbinag sang libro. Nian itanyag ang libro.
3 Ukon, sa tapos mapakilala ang imo kaugalingon, ayhan makasiling ka:
◼ “Bangod sang tuman kadamo nga mga relihion sa karon, napaligban mo na bala kon paano kita makapat-od kon ang aton relihion ginakahamut-an sang Dios?” Sa tapos makakomento ang tagbalay, ipatuhoy ang iya igtalupangod sa kahon sa pahina 377 sang libro nga Mankind’s Search for God, nga nagapakita sang napulo ka paagi nga makilala ang matuod nga relihion, nagapatalupangod ilabi na sang punto numero 7. Pamangkuta ang tagbalay kon nagaugyon sia nga ang isa nga nagahimo sang matuod nga relihion dapat magbatyag sing amo sina nga paagi sa iban nga mga rasa kag mga nasyonalidad. Kon may tion pa, tan-awa ang mga kasulatan nga ginsambit, ugaling itanyag ang libro.
4 Nasapwan sang madamo nga ang pagbukas sa isa ka kapitulo sa Search for God nga libro nga nagahinun-anon sang relihion sang tagbalay nagaganyat sang iya igtalupangod. Ayhan mahimo mo tilawan ini kon nagatanyag sing libro.
5 Kon nagagamit ka sing libro nga “True Peace and Security—How Can You Find It?,” ayhan luyag mo tilawan ini:
◼ “Luyag sang tanan magpuyo sa kalibutan diin may paghidait kag kalig-unan. Sing makapasubo, wala naton ina maagom sa aton bug-os nga pagkabuhi. Ano sa banta mo ang ginakinahanglan naton agod ang paghidait kag kalig-unan mangin isa ka katunayan? [Pasabta sia.] May gahom ang Dios sa pagpaluntad sing paghidait sa sining duta, kag nagsaad sia nga himuon niya ini.” Buksi ang larawan sa pahina 98, kag nian basaha ang Miqueas 4:3, 4. Itanyag ang libro, kag maghimos sing pagduaw liwat.
6 Ang aton mga publikasyon nagpahulag sa linibo ka tawo nga usisaon sing maayo pa ang Biblia sa pagpangita nila sa Dios. Pribilehiyo naton nga buligan sila sa Enero.