Ipakita nga Nagaulikid Ka Paagi sa Paghimo sing mga Pagduaw Liwat
1 Ang pagpangita sa mga interesado sa mga ganhaan nagapakita sang imo handum nga hatagan ang iban sing kahigayunan nga makabati sang mensahe sang Ginharian. Gani pat-ura nga balikan ang napahamtangan mo sing literatura sa Enero, kay amo ini ang maayo nga paagi sa pagpakita nga nagaulikid ka sa iban.
2 Kon nakabilin ka sing “Search for God” nga libro, tilawi nga sugdan liwat ang inyo paghambalanay sa sining paagi:
◼ “Ginhambalan naton sang nagligad kon pila kadamo nga tawo ang nagpanubli lamang sang ila relihion gikan sa ila mga ginikanan. Apang napaligban mo na bala kon ngaa tuman kadamo nga relihion ang nagapangangkon nga Cristiano? [Pasabta sia.] Ang libro nga ginbilin ko sa imo nagahatag sing kompleto nga paathag sa kapitulo 11, sugod sa pahina 261. Mahimo mo bala makuha ang imo libro kag matan-aw naton ang pila ka parapo?” Hambali ang nahaunang tatlo ka parapo kag maghimos sa pagbalik agod padayunon ang pagtuon.
3 Yari ang isa pa ka panugda para tilawan mo:
◼ “Sang nagligad ginhambalan naton ang pila ka nagapakilala nga mga tanda sang matuod nga relihion. Ang isa sang labing importante amo ang ginsambit diri sa Juan 13:34, 35. [Basaha.] Sa banta mo ginapakita bala sang tanan nga relihion ini nga sahi sang gugma sa isa kag isa? Ang libro nga ginbilin ko sa imo nagahinun-anon sini gid nga tema sa kapitulo 15, diri sa pahina 344. Luyag ko ipakita sa imo ang pila ka punto nga naluyagan ko sa sina nga kapitulo.” Hambali ang pila ka parapo kag nian maghimos para sa ulihi nga paghambalanay.
4 Mahimo mo matatap ang napahamtangan sing libro nga “True Peace and Security—How Can You Find It?” paagi sa malip-ot nga presentasyon kaangay sini:
◼ “Ang mga lider sang kalibutan sa karon indi makasarang sa pagpaluntad sing paghidait kag kalig-unan. Si Jehova nga Dios amo lamang ang isa nga makahimo sina. Ginapakita sa aton sang Biblia kon ano ang kinahanglan naton nga himuon. [Hambali ang mga punto sa parapo 1 kag 2 sa pahina 175, kag nian basaha ang Isaias 26:4.] Luyag ko ipakita sa imo kon paano ining libro makabulig sa imo.”
5 Ang pagtuon mahimo masugdan sa bisan ano nga kapitulo sang Search for God nga libro, apang sa kinaandan luyag naton ipatuhoy sila sa kapitulo 15 kag 16. Nian, pagkatapos sang pila ka pagtuon, ayhan luyag naton magsaylo sa Mahimu Ka Mabuhi nga libro.
6 Si Jehova nagpahamtang sing himpit nga halimbawa subong mahigugmaon nga Manugbantay nga nagaulikid sa iya mga karnero. (Ezeq. 34:11-14) Ang aton hanuot nga panikasog sa pag-ilog sang iya mahigugmaon nga pag-ulikid nagapahamuot sa iya, nagapakita sang aton gugma, kag nagadala sing mga pagpakamaayo sa iban.