Bahin 1—Magpakita sing Patugsiling sa Iban
1 Nalipay kami nga makita ang pag-uswag sang katawhan ni Jehova, nga nagresulta sa pagdugang sang madamo pa nga mga kongregasyon. Sa iban nga mga lugar, ilabi na sa dalagku nga mga siudad, ang isa ka Kingdom Hall kinahanglan gamiton sang pila ka kongregasyon. Ini nga kahimtangan nagakinahanglan sing dugang pa nga patugsiling sa bahin sang tanan nga nadalahig.
2 Ang tagsa ka kongregasyon nga nagagamit sang Kingdom Hall dapat magabilin sini sa mahipid kag mahim-ong nga kahimtangan para sa mga kauturan nga masunod nga magagamit. Ang mga siya dapat aregluhon sing mahipid, ang bisan anong literatura sa counter dapat himuson, kag ang bisan anong personal nga mga pagkabutang nga nabilin sa Kingdom Hall dapat tipunon. Ang kasilyas dapat biyaan nga matinlo, nagapat-od nga ginaaman ang kinahanglanon nga mga suplay kag gin-ula ang mga basurahan.
3 Kon ginaiskedyul ang isa pa ka miting nga magasugod sa dili madugay, yadtong nabilin sa nauna nga miting indi dapat magpabuyanbuyan sing dikinahanglanon. Ang malawig nga pagsugilanunay mahimo nga magaresulta sa pagginutok kag magapalantang sa mga kauturan nga nagahanda para sa masunod nga miting. Ang palarkingan sing salakyan mahimo nga limitado, kag mangin kalulo ang maglakat sing temprano agod yadtong nagapasulod may lugar nga maparkingan. Sa pihak nga bahin, yadtong nagatambong sa masunod nga miting indi dapat mag-abot sing tuman ka temprano, nga mangin kabangdanan sang dikinahanglanon nga pagginutok sa duog palarkingan kag sa guwa sang Kingdom Hall.
4 Kon pila ka kongregasyon ang nadalahig, kinahanglanon sing pinasahi ang maayo nga kooperasyon sa paghimos para sa semanal nga pagpaninlo sa Kingdom Hall. Sa masami, ang mga kongregasyon nagabuslanay sa pagtinlo sang Kingdom Hall para sa gintangdo nga panag-on. Kon ang inyo kongregasyon may amo sina nga salabton, pat-ura nga ang pagpaninlo ginahimo sing maayo kag sing temprano agod ang iban nga mga kongregasyon nga nagagamit sang tilipunan wala sing rason sa pagreklamo.
5 Sa pulupanag-on ayhan kinahanglan bag-uhon sang mga kongregasyon ang mga oras sang miting sa tion sang pagduaw sang manugtatap sa sirkito. Kon naapektuhan ang isa ka kongregasyon, dapat pahibaluon sang mga gulang ang iban nga kongregasyon sing abanse agod mapahibalo nila ang ila mga manugbantala sing temprano. Subong man, kon naiskedyul ang pila ka awtorisado nga hilikuton, subong sang Pioneer Service School, miting sang mga gulang sa sirkito, ukon kasal, ang iban nga mga kongregasyon kag mga manugtatap sa sirkito nga naapektuhan dapat mapahibalo sing abanse agod indi sila magaiskedyul sang paggamit sa Kingdom Hall sa pareho nga oras.
6 May pila ka tilipunan nga ginagamit sang mga kongregasyon nga natangdo sa magkatuhay nga mga sirkito. Dapat pahibaluon sang mga manugtatap sa sirkito nga nagaduaw sining mga tilipunan ang isa kag isa nahanungod sa palaabuton nga mga pagduaw nga ginaiskedyul. Ang ulihi nga mga pagbag-o kag ang iban pa nga mga problema mahimo magaresulta kon ang duha ka nagalakbay nga manugtatap magaiskedyul sing mga pagduaw sa pareho nga semana.
7 Ang mahigugmaon nga pagpatugsiling sa iban, upod ang maayong abanse nga pagplano kag pagkooperar, magabulig sa paghupot sing mainit nga kaangtanan sa ulot sang mga kongregasyon kag magapat-od nga ang “tanan nga mga butang mahanabo sing disente kag suno sa kahimusan.”—1 Cor. 14:40.