Pagbantala—Isa ka Dungganon nga Pribilehiyo

¹ Ang ministeryo sang maayong balita isa ka dungganon nga pribilehiyo nga ginhatag ni Jehova sa aton. (Roma 15:16; 1 Tim. 1:12) Amo bala sina ang imo pagtamod sa sini? Ang pagdala sang ngalan sang Dios isa ka kadungganan nga ginhatag sa pila lamang. Paano naton mapatubo ang aton apresasyon sa sining pribilehiyo?

² Indi naton maagom ang kahamuot sang kalibutan paagi sa pagbantala sang mensahe sang Ginharian. Wala ginasapak kag indi interesado ang madamo sa aton hilikuton. Ginayubit kag ginapamatukan ini sang iban. Sa ila mga itululok daw mga napatalang kag mga buangbuang kita. (Juan 15:19; 1 Cor. 1:​18, 21; 2 Tim. 3:12) Ang ila makapaluya sing buot nga mga komento gindesinyo agod buhinan ang aton kakugi kag bayaan ang aton dungganon nga pribilehiyo. Ang negatibo nga mga pagtamod nga ginapasanyog ni Satanas, “nagbulag sang mga painoino sang mga dimatinuuhon, agod ang kapawa sang mahimayaon nga maayong balita . . . indi mag-iwag.” (2 Cor. 4:4) Ano ang imo reaksion?

³ Importante huptan sa hunahuna nga ang aton pagbantala nahanungod sa Ginharian amo ang labing importante nga hilikuton nga sarang mahimo sang bisan sin-o sa aton karon. (Roma 10:​13-15) Ang pagtigayon sang kahamuot sang Dios, indi sang tawo, amo ang importante nga butang. Ang negatibo nga pagtamod sang kalibutan wala nagapaluya sang aton buot nga ibantala sing masidla ang maayong balita.​—Binu. 4:29.

⁴ Ginpabilihan sing daku ni Jesus ang iya pribilehiyo nga himuon ang kabubut-on sang iya Amay. (Juan 4:34) Wala niya gintugutan ang mga sablag ukon ang mga manugpamatok nga magpahina sa iya. Pirme niya gin-una sa iya kabuhi ang pagbantala sa mensahe sang Ginharian. (Luc. 4:43) Ginasugo kita nga ilugon ang iya halimbawa. (1 Ped. 2:21) Sa sini nagaalagad kita subong “mga masigkamanugpangabudlay sang Dios.” (1 Cor. 3:9) Ginahimuslan bala naton sing bug-os ini nga pribilehiyo? Subong mga Saksi ni Jehova, dapat kita pirme mangin handa “sa pagpahayag sa iya ngalan.”​—Heb. 13:15.

⁵ Ang aton bahin sa ministeryo nagasandig sing daku sa aton panimuot. Ginaapresyar bala naton sing tudok ang tanan nga ginhimo ni Jehova para sa aton? Napalambo bala naton sa aton mga tagipusuon ang gugma kay Jehova nga nagapahulag sa aton nga himuon ang tanan naton nga masarangan sa pag-alagad sa iya? Ina nga gugma nagapahulag sa aton nga mangin mapinadayunon kag tayuyon sa hilikuton nga pagbantala sang Ginharian tubtob sa ginatugot sang aton mga sirkunstansia. Ang aton kakugi magahatag sing pamatuod sang aton gugma kay Jehova kag sa aton isigkatawo.​—Mar. 12:​30, 31.

⁶ Ginapakita naton kon daw ano ka daku ang paghamili naton sa isa ka butang paagi sa ginahimo kag ginasiling naton nahanungod sini. Ginahamili gid bala naton ang aton pribilehiyo nga magbantala sang Ginharian? Ginahimaya bala naton ang aton ministeryo? Determinado bala kita nga magpadayon sa sining importante nga hilikuton walay sapayan sang pagpamatok? Kon ginapabilihan naton sing daku ining pinasahi nga pribilehiyo, pat-od gid nga mangin makugi kag bug-os tagipusuon kita.​—2 Cor. 4:​1, 7.