Mga Pagpasimple sa 1995 nga Distrito nga Kombension
1 Daw ano nga kalipay ang magtambong sa espirituwal nga mga kapiestahan, sa mga miting man sa kongregasyon, mga sirkito nga asambleya, mga adlaw sang pinasahi nga asambleya, ukon mga distrito nga kombension! Ngaa? Ang pagpakig-upod sa aton mga kauturan makapapagsik, kag ang espirituwal nga mga butang nga ginahatag nagapahanumdom sa aton sang mas importante pa nga mga butang.
2 Linibulibo ang nagakaganyat sa subong sina nga espirituwal nga mga pagtililipon sining ulihi lang nga mga tinuig. Sa ulot sang mga tuig 1985 kag 1994, ang kadamuon sang mga kongregasyon sa bug-os nga kalibutan nagdugang sing kapin sa 50 porsiento, halin sa 49,716 tubtob sa 75,573. Samtang ginapadasig ni Jehova ang hilikuton, ang mga distrito. nga kombension kag mga sirkito nga asambleya nagadamo man. (Isa. 60:22) Bisan ang pagdamo sang mga kombension nga ginhiwat diri lamang sa Pilipinas, halin sa 23 sang 1985 tubtob sa 42 sang 1994, nagapabanaag sining daku nga pag-uswag sa kadamuon sang mga kongregasyon. Ang hilikuton sa paghimos kag sa pag-atipan sining mga kombension nagadaku. Bangod nagatipon kita agod makabenepisyo sa espirituwal nga programa nga ginahanda para sa sining mga kapiestahan, maalamon nga pasimplehon pa gid ang pag-atipan sa pisikal nga mga kinahanglanon.
3 Dugang Pa nga mga Tikang nga Pagahimuon: Nagalaum kita sang pagpakamaayo ni Jehova samtang nagalakat kita sing abante sing mainuswagon. Nalipay kita nga makita nga ginahatagan niya ang iya katawhan sing kinahanglanon nga espiritu sang kaalam kag paghangop. Nagaugyon kita nga paagi sa matutom nga ulipon nga klase, ginatuytuyan sing maayo ni Jesucristo ang mga butang para sa katumanan sang katuyuan ni Jehova sa makatilingala nga paagi. (Mat. 24:45-47; Col. 1:9, 10) Sining karon lang ang matutom nga ulipon naghatag sini nga pahibalo: “Sugod sa 1995 nga mga distrito nga kombension kag sa Septiembre 1995 nga mga sirkito nga asambleya kag mga adlaw sang pinasahi nga asambleya, wala sing iserbe nga pagkaon. Ang kada isa magadala sang iya kaugalingon nga pagkaon kag ilimnon.” Ipadapat man naton ini nga kahimusan sa Pilipinas. Mahimo padayunon sang mga sirkito nga asambleya kag mga adlaw sang pinasahi nga asambleya ang ila karon nga mga kahimusan sa food service tubtob sa Agosto 1995 kon luyag nila. Apang, dapat sundon sadtong naiskedyul pagkatapos sang Septiembre 1 ang kahimusan sa ibabaw. Napat-od naman nga pagabatunon sing positibo ini nga pahibalo. Ayhan interesado kamo nga mahibal-an kan ano ang kapuslanan sini nga pagbag-o. Ayhan ang masunod nga pagrepaso sa mga pagbag-o nga ginhimo sining ulihi nga mga tinuig mangin isa ka maayo nga pahanumdom tuhay sa mga benepisyo nga natigayon na bangod sang pagpasimple sang hilikuton sa mga kombension.
4 Nagligad nga mga Kahimusan nga Dapat Pasimplehon: Antes ginpasimple ang mga kahimusan sa distrito. nga kombension, kaangay sa food service, volunteer service, kag rooming, madamo nga hilikuton ang ginkinahanglan para sa linibo ka lokal nga mga kauturan nga nagapangabudlay antes sang kombension. Bangod sang mga pag-ipit sang adlaw-adlaw nga pangabuhi sa aton mga kauturan kag sang padayon nga pag-uswag sang organisasyon, ang mga pagbag-o sa pagpasimple sang hilikuton kinahanglanon gid. Dugang pa, subong resulta sang pagpasimple sang ila kahimusan sa food service sa Estados Unidas sang 1978, kapin sa 70,000 ka kauturan nga nagapangabudlay anay sing lakas sa tion sang mga sesyon sa pag-aman sa aton sing pagkaon ang nakapamati sa programa. Sang 1987 ginhimo ang dugang nga pagpasimple sa food service sa mga kombension kag sa mga Assembly Hall sa Estados Unidos. Sang ulihi, ang pagkaon gin-aman nga wala sing bayad sa mga nagatambong sa mga kombension kag mga asambleya. Maayo-gid ini nga mga pagbag-o, nga nagpamag-an sang hilikuton kag naghatag sing labi pa nga igtalupangod sa espirituwal nga mga bahin sang kombension, kag ang, mga manugpangabudlay nakapamati kag nakabenepisyo sing labi pa sa mga programa. (Deut. 31:12) Apang anong hilikuton ang mahimo. pa dulaon agod madamo. pa ang makabenepisyo sing bug-os gikan sa espirituwal nga programa?
5 Ginapaabot nga mga Pagbalhin: Sang mga tinuig nga ang simple nga menu ginserbe sa Estados Unidos kag sa iban nga mga pungsod, nakita nga “diutay nga mga butang” lamang gali ang tunay nga “kinahanglanon.” (Ipaanggid ang Lucas 10:38-42.) Apang, nagkinahanglan gihapon ini sing daku nga mga suplay kag trabaho, subong man sing malahalon nga galamiton. Nian, kinahanglan man ang madamo nga boluntaryo agod maorganisar kag masuportahan ang mga kahimusan. Ang Sosiedad naggamit sing dalagkung may refrigerator nga mga treyler sa pila ka kadutaan agod madala ang pagkaon sa malayo nga mga lugar. Nagkinahanglan ini sing maintenance. Paagi sa dugang pa nga pagpasimple, ining dugang nga trabaho kag gasto madula na.
6 Ang kinabubut-on nga pag-alagad sadtong mga nagboluntaryo sa sining mga departamento ginapasalamatan gid sing daku. Apang, paagi sa sining dugang pa nga pagpasimple, magamit na sang madamong kauturan nga nagapangabudlay sa pagpamalaklon, paghanda, kag pagserbe sing pagkaon ang ila tion sa iban pa kinahanglanon nga mga hilikuton sa Ginharian, lakip ang makalilipay nga pagpakig-upod sa mga kombension sing labi pa. Yadtong mga boluntaryo nga nagaserbe anay sa Food Service makabulig na karon sa iban nga mga departamento, kaangay sang Attendants kag Cleaning. Magapamag-an ini sang lulan para sa tanan kag indi na kinahanglan nga magtrabaho ang madamo sa kagab-ihon, kaagahon, ukon sa tion sang mga sesyon, subong sang ginahimo anay sang madamo sa Food Service.
7 Pagsuporta sa mga Kahimusan: Ginaapresyar gid sang Sosiedad ang maayo nga suporta nga ginhatag ninyo mga kauturan “upod ang bug-os nga tagipusuon” sa sulod sang mga tinuig sa mga kahimusan sang kombension, lakip na sa food service. (1 Cron. 29:9) Nakabulig ini sa madamong paagi. Nakabulig ini sa arkila sang mga pasilidad sa kombension kag sa mga kagastuhanan sa kombension. Nangin praktikal man sa mga nagtambong nga magtener sa duog nga ginahiwatan sing kombension sa panahon sang pahuway sa udto agod makakuha sang pagkaon sing masulhay, marepreskuhan, kag nian makatambong sa espirituwal nga programa. Kag pat-od gid nga ang kaalwan kag suporta nga ginpakita sang mga kauturan sa boluntaryo nga pag-amot para sa mga kagastuhanan sang kombension magapadayon, nga nagagamit sang mga kahon-alamutan.—Hulu. 11:25; Luc. 16:9.
8 Pag-atipan sang Imo Kinahanglanon nga Pagkaon: Walay sapayan, paagi sa sining dugang pa nga mga pagbag-o, ang mga indibiduwal kag mga pamilya magaaman lamang sing pagkaon para sa ila kaugalingon sa tigpalanyaga. Magalakip ini sa mga payunir, nga magabalon man sang ila kaugalingon nga pagkaon, kaangay sang ginahimo nila kon yara sila sa ila gintangdo nga teritoryo. Ginaapresyar naton sing daku ang maayo nga mga benepisyo sang espirituwal nga programa. Indi maalamon nga hatagan sing di-nagakaigo nga importansia ang pisikal nga pagkaon. Importante nga ‘mapat-od [sang kada isa] ang mga butang nga mas importante’ may kaangtanan sa sini. (Filip. 1:9, 10a) Ang dalagku nga mga kombension sang katawhan ni Jehova sining karon lang sa Poland, Russia, kag Ukraine, subong man sa iban nga mga lugar, nahiwat sing madinalag-on nga wala na sing food service nga kahimusan. Sa sining mga lugar, ang mga delegado nagdala sang ila kaugalingon nga palanyagahon. Matukiban naton nga kon magbalon kita sing diutay lamang sa udto, indi sing madamo, magaamot ini sa pagtigayon naton sing alisto nga panghunahuna; agod makabenepisyo sing bug-os gikan sa programa sa hapon. Nahisuno sa sini, ang tagsatagsa dapat magbalon sing simple kag masustansia nga pagkaon. Halimbawa, sang ginpakaon ni Jesus ang kadam-an, nag-aman sia sing duha lamang ka butang, tinapay kag isda. (Mat. 14:16-20; tan-awa man ang Lucas 10:42a.) Sa sina nga katuyuan, nalipay kami sa paghatag sing pila ka panugda tuhoy sa kon ano ang nagakaigo kag praktikal bangod sang ginpalip-ot nga tigpalanyaga kag sa sahi sang mga pasilidad nga ginagamit naton.
9 Sanglit wala na sing food service nga mga kahimusan sa kombension, paagi sa maayo nga pagplano yadtong magatambong mahimo mamahaw upod sa ila pamilya sa balay ukon sa ila dalayunan, ukon sa isa ka lokal nga kalan-an. Paagi sa pagtigayon sing bastante nga pahuway sa gab-i, mahimo kamo makabugtaw sing maaga sa paghanda kon ano ang kinahanglanon para sa inyo palamahawon kag palanyagahon kag mag-abot sa kombension sing maaga agod makapakig-upod sa iban nga mga delegado.
10 Ang pahuway sa udto mas malip-ot diutay sangsa nagligad nga mga kombension. Apang, magahatag gihapon ini sing kahigayunan nga makakaon sing simple nga pagkaon, subong man sing tion nga makapakig-upod sa iban. Ang aton mga kauturan nga lalaki kag babayi nga nagapuyo sa siudad.sang kombension ukon sa malapit kag nagapauli kada gab-i mahapos nga makahanda sing diutay nga balon para sa kada katapo sang pamilya para palanyagahon. Kaangay lamang ini sang paghanda sing balon para sa mga bata nga nagaeskwela, ayhan diutay nga kan-on kag sud-an, ukon sandwich kag prutas, cookie, kag ilimnon. Madamo ang nagabalon sing kaanggid nga palanyagahon sa ila mga ulubrahan.
11 Pat-od gid nga mas mabudlay ini para sa mga nagatambong halin sa mga lugar sa guwa sang siudad sang kombension, kay ang abanse nga pagplano para sa ila palanyagahon kinahanglanon. Ayhan ang mga butang subong sang serbelyeta kag mga disposable paper cup mahimo madala halin sa balay. Ayhan masapwan sang iban nga ang preska nga prutas nga meryenda bastante na nga makabusog sa ila, kag mahimo man ini madala halin sa balay. Ang iban nga mga kinahanglanon nga kalan-on para sa udto kada adlaw mahimo mabakal sa mga balaligyaan sing pagkaon sa siudad sang kombension.
12 Bangod sining bag-o nga kahimusan, ginapakamaayo namon nga ang tanan nga nagatambong halin sa malayo nga mga lugar magasulat kag magapangabay sing mga dalayunan sa pribado nga mga puluy-an ukon sa malapit nga mga otel, sa baylo nga sa mga hulot-klasehan ukon sa iban pa nga lugar sa istadyum. Ini bangod estrikto gid nga WALA GINATUGOT ANG PAGLUTO SA BISAN ANO NGA TION SA SULOD SANG PASILIDAD SANG KOMBENSION. Indi lamang ini makatalagam, malaw-ay man ini tan-awon. Busa yadtong luyag magluto para sa ila palanyagahon dapat maghimo sini sa balay ukon sa ila dalayunan antes sila magkadto sa kombension. Ayhan ang isa ka balaligyaan sing pagkaon nga malapit sa inyo dalayunan may mga linuto nga baligya. Ang pagbakal sang naluto na nga pagkaon magadula ukon magabuhin sang paghanda sing pagkaon sa inyo mga dalayunan. Sa iban nga mga bahin sang pungsod ang mga kauturan makahibalo maghanda sing kan-on nga wala nagakapan-os bisan pagligad sing pila ka adlaw. Subong man, ang uga ukon tinapa nga isda ukon adobo madugay mapan-os. Kon lutuon ini sing abanse, malikawan ang pagluto kada adlaw.
13 Bangod ang lugar nga ginahiwatan sang kombension nangin isa gid ka daku nga Kingdom Hall sa panahon sang kombension, maalamon man nga likawan ang magpiknik kon tigpalanyaga. Busa, labing maayo para sa kada katapo sang pamilya nga magdala sang iya kaugalingon nga diutay nga balalunan, nga mahimo sudlan sing pagkaon antes maghalin sa dalayunan sa aga, sa baylo nga magdala sing daku nga balalunan kag nian serbehan ang kada katapo sang pamilya sa kombension. Kag kon paano nga wala kita nagakaon sa tion sang mga miting sa Kingdom Hall, indi man kita dapat magkaon ukon mag-inom sa tion sang mga sesyon sa kombension. Ang dalagkung pangpamilya nga mga picnic cooler wala ginatugot sa pasilidad nga ginahiwatan sang kombension. Delikado ini kag indi mahimo mabilin sa mga alagyan ukon mabutang sa mga pulungkuan. Ayhan ang magamit liwat nga mga puyo ukon magagmay nga plastik nga mga suludlan mas nagakaigo sa diutay nga mga meryenda nga kinahanglanon para sa aton panyaga. Kon kinahanglanon, ang gamay nga cooler nga sarang mabutang sa idalom, indi sa ibabaw, sang pulungkuan mahimo magamit.
14 Kinahanglan man ang paghalong sa sahi sang mga suludlan sing ilimnon nga luyag naton dalhon sa kombension. Ang mainit ukon mabugnaw nga mga ilimnon mahimo ibutang sa mga termos. Ang bisan anong klase sang kristal nga suludlan mahimo nga delikado. Busa, ginapangabay namon nga WALA SING KRISTAL NGA MGA SULUDLAN ang pagadalhon sa kombension. Kon ang imo naluyagan nga mabugnaw nga ilimnon indi mabakal sa plastik ukon aluminyum nga suludlan, labing maayo nga ihuwad ini sa isa pa ka sahi sang diutay nga plastik nga suludlan.
15 Dugang Pa nga mga Benepisyo: Makita gid naton ang kaalam sinang bag-ong mga kahimusan. Ang tanan makahatag sing bug-os nga igtalupangod sa pagbaton sing espirituwal nga mga benepisyo—ang matuod nga katuyuan sang pagtipon naton. Ginaaman ining mga benepisyo sa pagpakig-upod nga maagom naton subong man sa programa mismo. Gani sa baylo nga magguwa sa udto agod magbakal sing pagkaon sa malapit nga mga restawran, mas mapuslanon nga magbalon na lamang. Sa sini makapakig-upod .kita sa aton mga kauturan nga lalaki kag babayi kag malikawan man nga mawasi ang bisan ano nga bahin sa programa sa hapon. Indi man kinahanglan nga magbakal kita sa mga nagabaligya sa guwa nga ayhan nagahingalit sa dalagku nga kadam-an.
16 Bangod napapagsik sa espirituwal pagkatapos sang programa sa hapon, mahimo padayunon sang iban ang Cristianong pag-inupdanay sa mas makabulusog nga panyapon upod sa pamilya kag mga abyan sa lokal nga mga restawran. Ayhan ang iban mahimo magbakal sing pagkaon sa groserya sa pagpauli. Yadtong nagapauli sa ila balay mahimo makapanyapon didto, subong sang ginahimo nila sa iban pa nga mga adlaw nga nagatrabaho ukon nagaguwa sila sa latagon.
17 Nagakalipay gid kita sa espirituwal nga sinalusalo sa sining mga asambleya kag mga kombension, diin nagabaton kita sing bag-ong mga publikasyon, maayo nga panudlo, kag mapuslanon nga laygay. Ining mga pagpakamaayo amo ang ginadumdom sang tanan, upod ang kalipay nga makaupod ang nagtilipon nga katawhan sang Dios. Ang Hulubaton 10:22 nagasiling: “Ang pagpakamaayo ni Jehova—amo ina ang nagapamanggaranon, kag wala sia sing ginadugang nga kasakit sa sini.” Ini bangod subong katawhan ni Jehova, wala kita nagatambong sa mga kombension nga may ginapaabot nga materyal nga mga luyag kag mga kasulhayan. Nagatipon kita upod ang handum nga matigayon ang labing daku nga benepisyo sa espirituwal nga paagi, kag si Jehova bugana nga nagapadya sa aton tungod sa espiritu nga aton ginapakita.—1 Tim. 6:6-8; Heb. 11:6.
18 Ining mga okasyon sang pagpalig-on nagapahanumdom man sa aton sang pag-uswag sang espirituwal nga pag-ani. (Juan 4:35, 36) Ang nagabukas nga pinamulong sang Isaias 54 nagapanawag sa kaangay sing asawa nga organisasyon ni Jehova nga maghanda para sa makalilipay nga mga pag-uswag. Ang dugang nga pag-uswag, pagsangkad, kag nabag-o liwat nga kusog ginapaabot subong sang gintagna ni Isaias: “Palapara ang duog sang imo layanglayang. Kag ipahitad sa ila ang mga kumbong sang imo mga puluy-an. Dili pagpunggi. Palabaa ang imo mga banting kag palig-una ang imo mga palpal. Kay magasangkad ka sa tuo kag sa wala.” Ang katumanan sining makalilipay nga tagna nagresulta sa tumalagsahon nga pagsangkad sang matuod nga pagsimba nga nakita naton karon.—Isa. 54:1-4.
19 Isa gid ka maayo nga desisyon nga ipatuman ining dugang pa ginpasimple nga kahimusan sa kombension agod ang tanan makapamati sa espirituwal nga programa nga ginhanda bangod sang kubos nga tublag. Nagasalig kami nga pakamaayuhon man ini ni Jehova, kay magatugot ini sang mas maayo nga pag-atipan sa dugang pa nga pag-uswag. Paagi sa pagtalupangod sa kon ano ang kinahanglanon, magakalipay kita sa aton ginplano nga mga adlaw sang makalilipay nga pag-inupdanay kag espirituwal nga maayong mga butang. Ginapangamuyo namon sing hanuot nga pakamaayuhon ni Jehova ang aton tanan nga mga panikasog samtang padayon kita nga nagatipon kag nagakaon sa iya latok.—Ipaanggid ang Deuteronomio 16:14, 15.
[Kahon sa pahina 6]
Mga Benepisyo sang mga Kahimusan nga Wala Na sing Food Service
◼ Diutay nga trabaho antes, sa panahon, kag pagkatapos sang programa, nagatugot para sa dugang pa nga pag-inupdanay
◼ Wala sing alatipanon nga galamiton sa food service
◼ Mas madamo nga tawo ang makapamati sing maayo sa espirituwal nga programa
◼ Mas madamo nga boluntaryo ang makabulig sa iban nga mga departamento
◼ Mas madamo nga tion ang magamit para sa iban pa teokratikong mga hilikuton
Ginapanugda nga mga Butang nga Balunon
◼ Diutay, simple, naluto na nga daan nga palanyagahon
◼ Ginbulad nga mga prutas, mga sandwich, preska nga prutas
◼ Gamay nga cooler kon kinahanglanon
◼ Soft drink, duga sang prutas, ukon tubig sa di-mabuka nga mga suludlan
INDI Dalhon sa Pasilidad sang Kombension
◼ Alkoholiko nga mga ilimnon
◼ Kristal nga mga suludlan
◼ Dalagkung pangpamilya nga mga picnic cooler
◼ Bisan anong galamiton sa pagluto