Paghalad Sang Aton Kaugalingon Sing Kinabubut-on

¹ Si salmista David nagtagna nga ang katawhan ni Jehova ‘magahalad sang ila kaugalingon sing kinabubut-on.’ (Sal. 110:3) Bilang katumanan sini, sa tagsatagsa sang nagligad nga apat ka tuig sang pag-alagad, ang katawhan ni Jehova naghinguyang sing kapin sa isa ka bilyon ka oras sa pagpalapnag sing maayong balita sang Ginharian. Kag may yara madamong paagi, dugang sa pagbantala kag paghimo sing disipulo nga hilikuton, nga sarang naton mahalad ang aton kaugalingon sing kinabubut-on agod buligan ang iban.

² Mga Paagi nga Mapakita Naton ang Aton Pagkakinabubut-on: Ang iban sa kongregasyon mahimo nga nagakinahanglan sing bulig sa pagkadto sa mga miting. Ngaa indi magboluntaryo nga sugaton sila? Ang iban mahimo nga nagamasakit, maluya, ukon naospital. Mahimo mo bala sila maduaw ukon mabuligan sa pila ka paagi? Nahunahuna mo na bala ang pag-agda sa mga nagakinahanglan sing pagpalig-on nga magbuylog sa inyo pagtuon sang pamilya sa pulupanag-on? Ang isa ka payunir ukon isa ka manugbantala mahimo nga nagakinahanglan sing kaupod sa ministeryo. Ngaa indi mo sia updan sa pag-alagad? Amo ini ang pila ka paagi nga kinabubut-on kita nga makahimo sing kon ano ang maayo sa mga may labot sa aton sa pagtuo.​—⁠Gal. 6:⁠10.

³ Sarang mapakita sang mga kauturan nga lalaki ang ila pagkakinabubut-on paagi sa pagpanikasog nga malab-ot ang mga kalipikasyon para sa mga gulang kag ministeryal nga mga alagad. (1 Tim. 3:​2-10, 12, 13; Tito 1:​5-9) Samtang padayon kita nga nagadamo, ang dugang nga kalipikado nga mga utod nga lalaki nga handa sa pagpanguna sa pagbantala kag pagtudlo kag sa pagbantay sa mga kongregasyon ginakinahanglan.​—⁠1 Tim. 3:⁠1.

⁴ Ayhan ang pila sa aton handa nga gamiton ang kaugalingon sa pag-alagad kay Jehova sa mas daku nga kasangkaron paagi sa pag-auxiliary payunir sa tion kag tion. Subong man, paagi sa pila ka pagbalhin sa aton iskedyul, mahimo kita makaauxiliary payunir sing dalayon ukon makaregular payunir. Ginatugot bala sang aton kahimtangan nga makasaylo kita sa isa ka lugar diin mas daku ang kinahanglanon nga bulig? Ang mga naghalad sang ila kaugalingon sing kinabubut-on para sa sining maayong mga buhat ginapabaloran sing daku, kag ginpakamaayo sila sing bugana!​—⁠Luc. 6:⁠38.

⁵ Kon mangagda si Jehova, paagi sa iya organisasyon, nga makigbahin sa dugang pa nga hilikuton sa Ginharian, maayo nga pamangkuton naton ang aton kaugalingon, ‘Ginahalad ko pa bala ang akon kaugalingon sing kinabubut-on?’ Ang aton diosnon nga debosyon magapahulag sa aton nga himuon ang bug-os nga masarangan naton sa sagrado nga pag-alagad, sa amo ginapahalipay sing daku ang tagipusuon ni Jehova!​—⁠Sof. 3:⁠17.