Kamusta Ang Imo Mga Himata?
1 Kalabanan sa aton may mga himata nga wala sa kamatuoran. Daw ano gid ang aton handum nga magabuylog sila sa aton sa dalan padulong sa kabuhi! Matuod ini ilabi na kon mga katapo sila sang aton kaugalingon nga panimalay. Bisan pa tinuig na naton sila nga gintinguhaan nga buligan, indi kita dapat maghinakop nga wala na gid sing paglaum.
2 Sang nagbantala si Jesus, “ang iya mga utod, sa katunayan, wala magtuo sa iya.” (Juan 7:5) Sang isa ka bes, ang iya mga himata naghunahuna nga nagbuang sia. (Mar. 3:21) Apang, wala mag-ampo si Jesus sa ila. Sang ulihi, ang iya mga utod nagbaton sang kamatuoran. (Binu. 1:14) Ang iya utod sa iloy nga si Santiago nangin haligi sang Cristianong kongregasyon. (Gal. 1:18, 19; 2:9) Gani indi mag-untat sa pagtinguha nga bantalaan sing maayong balita sang Ginharian ang imo mga himata.
3 Mangin Makaparepresko, Indi Makapabug-at: Sang nagbantala si Jesus sa iban, ang iya mga tagpalamati nakabatyag nga narepreskuhan, indi nabug-atan. (Mat. 11:28, 29) Wala niya sila ginpabug-atan sing mga panudlo nga indi nila mahangpan. Agod marepreskuhan sing tubig sang kamatuoran ang imo mga himata, hatagi sila sing tigdiutay sa isa ka tion, indi sing madamo! Ang isa ka nagalakbay nga manugtatap nagsiling: “Natigayon sang mga nagpukaw sing pagkamausisaon sa ila mga himata ang labing maayo nga mga resulta paagi sa pagpanaksi sing utay-utay.”—1 Corinto 3:1, 2.
4 Madamong Saksi ang epektibo nga nakapanaksi sa ila ditumuluo nga mga tiayon paagi sa pagbilin sing literatura nga nakabukas sa mga topiko nga mahimo magwili sa ila. Ang isa ka utod nga babayi nga naghimo sini nagdumala man sing pagtuon upod sa iya kabataan sa palamatin-an sang iya bana, nagahatag sing mga paathag nga mapuslanon sa iya. Kon kaisa ginapamangkot niya sia: “Amo sini ang natun-an ko sa akon pagtuon karon nga adlaw. Ano ang opinyon mo tuhoy sini?” Sang ulihi ang iya bana nagbaton sang kamatuoran.
5 Mangin Matinahuron, Mapailubon: Ang isa ka manugbantala nagkomento nga “bisan ang mga himata may kinamatarong sa ila kaugalingon nga mga pagpati kag mga opinyon.” Gani dapat kita magpakita sing pagtahod kon nagahatag sila sang ila opinyon ukon kon espesipiko sila nga nagapangabay sa aton nga indi sila pagsugilanunon tuhoy sa kamatuoran. (Manugw. 3:7; 1 Ped. 3:15) Paagi sa pagpailob kag pagpamati sing maayo, makapangita kita sing nagakaigo nga mga kahigayunan agod makapanaksi sa ila sing mahalungon. Ini nga pagpailob makapaladya, subong sa natabo sa isa ka Cristianong bana nga mapailubon nga nagbatas sang indi maayo nga pagginawi sang iya ditumuluo nga asawa sa sulod sang 20 ka tuig. Sang nagbalhin sia, ang bana nagsiling: “Daku gid ang akon pagpasalamat kay Jehova nga ginbuligan niya ako nga mapalambo ang bunga sang espiritu nga pagkamabinatason, bangod nakita ko karon ang resulta: Ang akon asawa nagalakat na sa banas sang kabuhi!”
6 Kamusta ang imo mga himata? Mahimo nga paagi sa imo maayong Cristianong pagginawi kag sa imo pagpangamuyo tungod sa ila, “madaug mo sila kay Jehova.”—1 Ped. 3:1, 2, footnote.