“Bulig Sa Husto Nga Tion”
1 Daw ano ka makapabaskog nga makabaton sing eksakto gid nga bulig kon kinahanglan naton ini! (Heb. 4:16) Sa “Mga Mensahero sang Diosnon nga Paghidait” nga Distrito nga Kombension, nalipay kita sang ginhatagan kita sing duha ka pinasahi nga aman sang bulig sa husto nga tion.
2 Ang bag-ong libro, Ang Sekreto sang Kalipay sa Pamilya, nag-abot sa nagakaigo nga tion. Nasentro ini sa apat ka kinahanglanon nga nagapasanyog sing isa ka malipayon nga pagkabuhi sang pamilya: (1) Pagpugong sa kaugalingon, (2) pagkilala sa pagkaulo, (3) maayo nga komunikasyon, kag (4) gugma. Ang laygay nga ginhatag sa Kalipay sa Pamilya nga libro magabulig sa tanan nga pamilya nga nagaaplikar sini nga makasapo sing diosnon nga paghidait. Magtalana sing tion agod mabasa sing maayo ang bag-ong libro kag agod matun-an ini sing tingob subong isa ka pamilya. Mangin pamilyar sa mga kaundan sini agod mangin handa ka sa paggamit sini sing epektibo kon itanyag ini sa nahaunang tion sa publiko, sa Marso.
3 Ang bag-ong brosyur, Ano ang Ginapatuman sang Dios sa Aton?, nag-abot sa husto nga tion sa pagbulig nga mapadasig ang aton hilikuton nga paghimo sing mga disipulo. Walay sapayan nga gamiton ini agod buligan ilabi na ang mga tawo nga may limitado nga ikasarang sa pagbasa, madamong hamtong kag kabataan nga makahibalo magbasa kag magsulat ang makapanginpulos man gikan sa simple nga pagpaathag sini sa sadsaran nga mga panudlo sa Biblia. Mahimo nga amo gid ini ang ginakinahanglan agod makasugod sing pagtuon subong paghanda sa pagtuon sa Ihibalo nga libro. Ining aman pat-od gid nga makabulig sa madamo pa nga pabaloran kon paano sila pakamaayuhon sing bugana kon ginahimo nila ang ginapatuman sang Dios.
4 Ano ang nangin balatyagon naton bangod sang mahigugmaon nga “bulig [ni Jehova] sa husto nga tion”? Ginpabutyag sing himpit ni David ang aton mga balatyagon sang nagsiling sia nga ‘wala sia ginkulang, ang iya kalag narepreskuhan, kag ang iya tagayan napuno!’ (Sal. 23:1, 3, 5) Malipayon kita nga nagapaabot nga mapalab-ot ining matahom nga espirituwal nga bulig sa madamo pa nga hanuot nga nagahandum nga makilala kag maalagad ang matuod nga Dios, si Jehova.