Pamangkot

◼ Kon ang kongregasyon ginapangabay sa pagbulig sa paghimo sing kahimusan para sa isa ka lubong, ang masunod nga mga pamangkot mahimo magautwas:

Sin-o ang magahatag sing diskurso sa lubong? Isa ini ka desisyon nga dapat pamat-uran sang mga katapo sang pamilya. Mahimo nila pilion ang bisan sin-o nga bawtismado nga utod nga maayo sing rekord. Kon ang hubon sang mga gulang ginapangabay sa pag-aman sing isa ka humalambal, masami sila nga nagapili sing isa ka sangkol nga gulang sa paghatag sing pamulongpulong pasad sa balayan sang Sosiedad.

Mahimo bala magamit ang Kingdom Hall? Huo, kon ginatugot sang mga hubon sang mga gulang kag kon wala ini nagatublag sa regular nga iskedyul sang mga miting. Ang tilipunan mahimo magamit kon ang napatay may matinlo nga reputasyon kag katapo sang kongregasyon ukon menor-de-edad nga anak sang isa ka katapo. Kon ang indibiduwal nakilal-an sing dayag bangod sang di-cristiano nga pagginawi, ang mga gulang mahimo mamat-od nga indi magtugot nga gamiton ang tilipunan.​—⁠Tan-awa ang Aton Ministeryo nga libro, pahina 62-3.

Kinaandan na nga ang mga Kingdom Hall wala ginagamit para sa lubong sang mga di-tumuluo. Ang eksepsion sa sini amo kon ang nabilin nga mga katapo sang pamilya aktibo nga nagapakig-upod subong bawtismado nga mga manugbantala, ang napatay nakilal-an sang pila ka manugbantala sa kongregasyon subong nga nagaugyon sa kamatuoran kag may maayo nga reputasyon sa komunidad, kag wala sing kalibutanon nga mga kinabatasan ang ginalakip sa programa. Wala sing butang nga pagahimuon nga magasaklaw sa kongregasyon ukon magadagta sa reputasyon sini.

Kon nagahatag sing pahanugot nga gamiton ang Kingdom Hall, binagbinagon sang mga gulang kon bala kinabatasan na nga ginapaabot nga makita ang lungon sa lubong. Kon amo sini ang kinabatasan, mahimo sila magatugot nga pasudlon ini sa tilipunan.

Ano naman ang mga lubong para sa mga kalibutanon? Kon ang napatay may maayo nga reputasyon sa komunidad, ang isa ka utod nga lalaki mahimo makahatag sing makalulugpay nga pamulongpulong sa Biblia sa punerarya ukon sa patyo. Ang kongregasyon indi magahiwat sing lubong sa isa nga kilala sa imoral, dimaayo nga pagginawi ukon nga ang iya estilo sang pagkabuhi nagasupak sa mga prinsipio sang Biblia. Ang utod nga lalaki indi gid magabuylog sa isa ka klerigo sa paghimo sing serbisyo nga nagalakip sa iban pa nga pagtuluuhan ukon sa bisan ano nga lubong nga pagahimuon sa simbahan sang Babilonia nga Daku.

Ano naman kon ang napatay gin-‘disfellowship’? Ang kongregasyon kinaandan na nga indi magpasilabot, ukon ang Kingdom Hall pagagamiton. Kon nagpakita sia sing pamatuod sang paghinulsol kag nagpadayag sing handum nga makapanumbalik, ang konsiensia sang isa ka utod nga lalaki mahimo magtugot sa iya sa paghatag sing pamulongpulong sa Biblia sa punerarya ukon sa patyo, sa pagpanaksi sa mga ditumuluo kag sa paglugpay sa mga himata. Apang, antes himuon ini nga desisyon, maalamon nga pamangkuton niya ang hubon sang mga gulang kag binagbinagon kon ano ang ila irekomendar. Kon indi maalamon nga magpasilabot ang utod, ayhan nagakaigo nga ang isa ka utod nga lalaki nga katapo sang pamilya sang napatay ang magahatag sing pamulongpulong agod lugpayan ang mga himata.​—⁠Tan-awa Ang Lalantawan sang Oktubre 15, 1990, pahina 30-1; Marso 15, 1982, pahina 23; kag Disiembre 1, 1977, pahina 717-22.