Unaha Ang Mas Importante Nga Mga Butang
1 Ano ang pila ka importante nga butang nga kinahanglanon sa aton espirituwal nga kaayuhan? Pat-od gid nga magalakip ini sa personal nga pagtuon, pagtambong sa mga miting, padayon nga pagpangamuyo, maayo nga pagpakig-upod, kag Cristianong ministeryo. Indi naton mahuptan ang maayong espirituwal nga kapagros kon wala naton ginauna ang importante nga butang sa aton kabuhi.
2 Apang, kita tanan dapat makig-away batok sa undanon nga mga kailigbon kag nagakinahanglan sing disiplina. (Gal. 5:17) Indi gid kita dapat magbatyag nga labi pa ang matigayon paagi sa pagtinguha sing makagod nga mga interes. (Jer. 17:9) Busa, agod amligan ang aton tagipusuon kag likawan nga mapatalang, ang tayuyon nga pag-usisa sa kaugalingon kinahanglanon.—Hulu. 4:23; 2 Cor. 13:5.
3 Usisaa ang Imo Kaugalingon nga Tagipusuon: Sarang mo ini mahimo paagi sa pagpamangkot sa imo kaugalingon sing pila ka tampad nga mga pamangkot: Nalangkag bala ako sa pagbasa sa Pulong sang Dios? (1 Ped. 2:2) Ginapabaloran ko bala ang pagkaimportante nga tambungan ang tanan nga miting sa kongregasyon? (Heb. 10:24, 25) Padayon bala ako nga nagapangamuyo? (Roma 12:12) Luyag ko bala nga makig-upod sa mahunahunaon sa espirituwal nga katawhan? (Roma 1:11, 12) Nabatyagan ko bala ang personal nga obligasyon nga ibantala ang maayong balita? (1 Cor. 9:16) Ang positibo nga mga sabat magapakita nga luyag mo unahon ang mas importante nga mga butang.
4 Usisaa ang Imo Adlaw-adlaw nga Hilikuton: Dapat mo sundan ang pag-usisa sa mga luyag sang imo tagipusuon paagi sa pagpasad sing mga prioridad sa paggamit sing tion. Nagalakip ini sang pag-iskedyul sing regular nga tion sa pagbasa sang Biblia kag sang tagsa ka guwa sang Ang Lalantawan kag Magmata!, subong man sa paghanda para sa mga miting. Dapat man magpain sing tion para sa pagtuon kag sa pagpangamuyo sing tingob sang pamilya. Magtalana sing limitasyon kon ano kadamo nga tion ang ginahinguyang sa atubangan sing TV ukon kompyuter. Mangin determinado nga tambungan ang tanan nga miting sa kongregasyon, kag unaha ang pagtambong sa mga miting. Planuha ang pagpakigbahin sang bug-os nga pamilya sa pag-alagad sa latagon kada semana.
5 Sa walay duhaduha, ang pag-una sa mas importante nga mga butang sa aton kabuhi mangin rason gid sa pagkalipay.