Mga Pagtuon Sa Biblia Nga Nagapatubas Sing Mga Disipulo
1 “Ano bala ang nagasablag sa akon sa pagpabawtismo?” pamangkot sang taga-Etiopia nga eunuco pagkatapos nga “ginpahayag [ni Felipe] sa iya ang maayong balita nahanungod kay Jesus.” (Binu. 8:27-39) Sa bahin sang eunuco, ginhigugma na niya ang inspirado nga mga sinulatan sang Dios, kag sa tapos makabaton sing espirituwal nga bulig gikan kay Felipe, handa na sia nga mangin isa ka disipulo. Apang indi tanan nga tawo ang kumbinsido nga dapat nila usisaon ang Kasulatan.
2 Sing mapasalamaton, ang organisasyon ni Jehova nag-aman sing brosyur, Ano ang Ginapatuman sang Dios sa Aton?, agod palig-unon ang katawhan nga usisaon ang mensahe sang Biblia. Sa pila lamang ka malip-ot nga mga pahina, may madamo nga matun-an ang katawhan nahanungod sa Kasulatan. Subong man, ang mga Leksion 15 kag 16 magabulig sa ila nga mahangpan kon ano ang ginapatuman sang Dios sa ila. Ining matahom nga instrumento gindesinyo agod pahulagon ang mga tawo sa malip-ot nga tion nga maghimo sing mga tikang nga pahamut-an si Jehova.
3 Kon nagasugod sing isa ka pagtuon sa Biblia, mabuligon nga repasuhon ang labing maayo nga mga panugda nga ginbalhag sa suplemento sang Hunyo 1996 nga Ang Aton Ministeryo sa Ginharian sa kon paano dumalahan ang isa ka mapatubason nga pagtuon sa Ihibalo nga libro. Sa tion sang pagtuon, binagbinaga ang pag-uswag nga nahimo sang estudyante agod mapat-od mo kon sa diin nga mga bahin sia nagakinahanglan sing dugang pa nga igtalupangod. Palig-una ang estudyante nga handaan sing abanse ang iya mga leksion, nga ginatan-aw ang mga kasulatan. Ang mga komento niya sa iya kaugalingon nga tinaga mahimo magpakita sang iya tinagipusuon nga apresasyon sa kamatuoran. Ang mga nagahimo sing dugang nga pagbasa sa mga publikasyon sang Sosiedad kag pagtambong sing tayuyon sa mga miting sa kongregasyon amo sa masami ang madasig nga nagauswag. Palig-una sia nga isugid sing di-pormal sa iban ang tuhoy sa iya natun-an. Ipakita sa iya sing malulo ang dapat niya himuon agod mag-uswag sa espirituwal. Indi kita dapat magdumala sing mga pagtuon tubtob sa tion nga wala sing pat-od upod sa mga indi desidido. Ang mga estudyante dapat mismo magbuot sa pagtuon, magtindog sing malig-on para sa kamatuoran, kag mag-uswag padulong sa dedikasyon kag bawtismo.
4 Sa pila ka panimalay, indi lang isa ka pagtuon ang ginadumalahan, kay ang lainlain nga katapo sang pamilya may tuhay nga mga pagtuon. Apang, sa masami ang isa ka nahiusa nga pangpamilya nga pagtuon mas maayo, kay magabulig ini nga mahiusa ang pamilya sa espirituwal.
5 Ang sugo ni Jesus amo nga maglakat kita sa paghimo sing mga disipulo. (Mat. 28:19) Agod mahimo ini, dapat kita magdumala sing mga pagtuon sa Biblia nga magabulig sa iban sa pag-uswag tubtob sa punto nga mahimo sila mamangkot, “Ano bala ang nagasablag sa akon sa pagpabawtismo?”