Lab-uta Ang Ditumuluo Nga Mga Tiayon

¹ Daku gid nga kalipay kon ang mga mag-asawa nahiusa sa matuod nga pagsimba. Apang, sa madamong pamilya isa lamang sang mga magtiayon ang nagbaton sa dalan sang kamatuoran. Paano naton malab-ot ining ditumuluo nga mga tiayon kag mapalig-on sila nga magsimba kay Jehova kaupod naton?​—⁠1 Tim. 2:​1-4.

² Hangpa ang Ila Panghunahuna: Bisan pa nga ang iban nga ditumuluo nga mga tiayon mahimo nga nagapamatok, sa masami ang problema amo lamang ang dipagsapak ukon dipaghangpanay. Ang isa ka tawo mahimo magbatyag nga ginapabay-an ukon nagapangimon tungod sa bag-ong espirituwal nga interes sang iya tiayon. “Nagaisahanon sa balay, nagbatyag ako nga ginsikway,” hinumdom sang isa ka bana. “Ang pamatyag ko daw ginbayaan ako sang akon asawa kag kabataan,” siling sang isa pa. Ang iban nga mga lalaki mahimo maghunahuna nga nawasi nila ang ila pamilya tungod sa isa ka relihion. (Tan-awa ang Agosto 15, 1990, Lalantawan, pahina 20-3.) Amo sina kon ngaa labing maayo, kon mahimo, nga ilakip ang bana upod sa iya asawa sa kahimusan sang pagtuon sa Biblia sa puluy-an kutob sa ginsuguran.

³ Mangabudlay Sing Magkaupod: Isa ka Saksi nga mag-asawa ang madinalag-on nga nangabudlay sing magkaupod sa pagbulig sa mga mag-asawa pasulod sa kamatuoran. Pagkatapos makatukod sing isa ka pagtuon ang utod nga babayi sa asawa, ginaduaw sang utod nga lalaki ang bana kag masami nga nakasugod sing isa ka pagtuon.

⁴ Mangin Mainabyanon kag Maabiabihon: Ang mga pamilya sa kongregasyon sarang makabulig paagi sa pagpakita sing interes sa mga pamilya nga wala pa nahiusa sa matuod nga pagsimba. Ang pila ka mainabyanon nga mga pagduaw mahimo makabulig sa ditumuluo nga tiayon nga makita ang mga Saksi ni Jehova subong mainabyanon kag mainulikdon gali nga mga Cristiano nga nagakabalaka sa kaayuhan sang isa kag isa.

⁵ Sa tion kag tion, sarang marepaso sang mga gulang kon anong ulihi nga mga panikasog ang nahimo sa paglab-ot sa ditumuluo nga mga tiayon kag kon ano pa ang himuon sa paglaum nga mahaylo sila dampig kay Jehova.​—⁠1 Ped. 3:1, footnote.