Ang Daku Nga Ganhaan Padulong Sa Hilikuton Bukas

¹ Subong isa ka makugi nga manugbantala sang maayong balita, malangkagon nga ginpangita ni Pablo ang mga teritoryo diin mas daku ang kinahanglanon, ang isa sini amo ang siudad sang Efeso. Madinalag-on ang iya pagbantala didto amo nga nagsulat sia sa mga masigka-Cristiano: “Isa ka daku nga ganhaan nga nagatuytoy padulong sa hilikuton ang nabuksan sa akon.” (1 Cor. 16:9) Si Pablo nagpadayon sa pag-alagad sa sadto nga teritoryo kag ginbuligan ang madamong taga-Efeso nga mangin mga tumuluo.—Binu. 19:1-20, 26.

² Sa karon, ang isa ka daku nga ganhaan nga nagatuytoy padulong sa hilikuton ginbuksan sa aton. Ginaagda kita nga buligan ang mga kongregasyon nga indi makasarang sa pagpangabudlay sa ila tanan nga teritoryo sing maid-id kada tuig. Busa ang aton mga panikasog magapamag-an sang mga kinahanglanon sa iban nga mga lugar.​—⁠Ipaanggid ang 2 Corinto 8:​13-15.

³ Makaalagad Bala Kamo sa Kon Diin Mas Daku ang Kinahanglanon? Nabinagbinag na bala ninyo sing mapangamuyuon ang posibilidad nga makaalagad sa iban nga lugar? Ayhan indi na kinahanglan nga magsaylo pa kamo kon may isa ka kongregasyon nga nagakinahanglan sing bulig mismo sa inyo siudad. Ngaa indi ipakighambal sa manugtatap sa sirkito ang tuhoy sini kag hibaluon kon ano ang mapanugda niya? Ukon ayhan sa teritoryo mismo sang inyo kongregasyon, may madamo nga bungol ukon dumuluong-sing-hambal nga populasyon nga wala sing nagaatipan. Agod mapaayawan ini nga kinahanglanon, makapanikasog bala kamo nga tun-an ang ila hambal? Dugang pa, ayhan may isa na ka grupo nga nagagamit sing tuhay nga hambal ukon kaingod nga kongregasyon nga ‘nagapakitluoy sa Agalon sing dugang pa nga mga manugpangabudlay sang Ginharian.’ (Mat. 9:​37, 38) Kon amo, makabulig bala kamo?

⁴ Sining karon nga mga dekada, linibo ka Cristianong pamilya ang nagsaylo sa iban nga kadutaan agod labi pa nga makapakigbahin sa hilikuton nga pagpangani. Ang isa ka mag-asawa nga naghimo sini nagsiling: “Luyag namon mag-alagad kay Jehova sa kon diin labi gid kami nga makabulig.” Kon amo sini ang inyo handum kag posible para sa inyo ang magsaylo sa iban nga lugar, ipakighambal anay ang inyo mga plano sa mga gulang sa inyo kongregasyon.

⁵ Kon luyag ninyo mamangkot sa Sosiedad tuhoy sa kon diin ang nagakinahanglan sing bulig, ihatag sa Congregation Service Committee ang isa ka sulat nga nagabalay sang inyo espesipiko nga handum. Ilakip nila ang ila mga komento kag ipadala ini sa Sosiedad. Sa ano man nga paagi, tubtob ang daku nga ganhaan padulong sa hilikuton nagapabilin nga bukas, kabay nga kita tanan padayon nga mangin masako sa pag-alagad kay Jehova.​—⁠1 Cor. 15:⁠58.