Gamita Sing Maayo Ang Mga Handbill

¹ Ang mga handbill sang kongregasyon madali gamiton sa pagsugid sa mga tawo sa komunidad sang direksion sang Kingdom Hall kag sang eksakto nga oras sang mga miting. Maayo nga bilinan sini ang tagsa ka tawo nga masugilanon mo. Bangod sina, ang kada kongregasyon dapat maghupot sing nagakaigo nga suplay sang mga handbill. Kon ginbag-o sang mga kongregasyon ang oras sang mga miting, ang bag-ong mga handbill dapat orderon agod magamit sa dalayon ang suplay nga may bag-ong oras sang mga miting. Ang Handbill Request nga porma dapat gamiton para sa sining katuyuan. Kon may yari na kamo sini, paano ninyo magamit sing labing maayo ang mga handbill?

² Nasapwan sang madamong manugbantala nga ang pagdaho sa isa ka tawo sing handbill isa ka epektibo nga paagi sa pagpakilala sang ila kaugalingon kag sa pag-umpisa sing paghambalanay. Ang pagpakita sang iskedyul sang mga miting ukon sang mensahe sa likod nga pahina makabukas sing dalan sa isa ka paghambalanay tuhoy sa aton hilikuton kag sa katuyuan sini. Mahimo mabuligan sang mga ginikanan ang ila magagmay nga mga kabataan nga makapakigbahin sa ministeryo paagi sa pagtugot sa ila sa pagtanyag sing handbill sa ganhaan. Ang mga manugbantala nga nagapanaksi paagi sa sulat dapat maglakip sing handbill sa ila sulat kag agdahon sia sa pagtambong sa mga miting. Ang mga handbill mahimo ibilin sa mga balay nga wala sing tawo, nagahalong nga ginabutang ini sa idalom sang ganhaan agod indi makita sang nagalabay.

³ Ang mga handbill nangin instrumento sa pagtuytoy sa mga bunayag sing tagipusuon sa kamatuoran. Ang isa ka eksperiensia nagasugid tuhoy sa isa ka babayi nga, bangod sa isa ka handbill, natuman ang iya madugay na nga handum nga mahangpan ang Biblia. Pagkatapos sang bug-os nga gab-i nga pagpangamuyo sa Dios, isa ka Saksi nga mag-asawa ang nagtimbre sa iya doorbell pagkaaga. Nagalingling sa buho, nagsiling sia nga indi kombeniente nga buksan ang ganhaan. Ang mga Saksi nagsuksok sing handbill sa idalom sang ganhaan. Ini mabasa: “Know Your Bible.” Nakita niya ini kag ginbuksan ang ganhaan. Isa ka pagtuon ang nasugdan sa gilayon, kag sang ulihi ginbawtismuhan sia. Wala gid ginapakadiutay ang gahom sang espiritu sang Dios, kabay nga tayuyon naton nga gamiton sing maayo ang mga handbill samtang ginatuman naton sing bug-os ang aton ministeryo.​—⁠Tan-awa man ang Pebrero 1994 sang Ang Aton Ministeryo sa Ginharian, pahina 1.