Sakdaga sing Bug-os ang Miting Publiko nga Programa sang Inyo Kongregasyon
1 Sang nagligad nga pila ka tuig nakita sang isa ka lamharon nga lalaki ang handbill nga nagaanunsio sang mga miting sa lokal nga kongregasyon. Bangod nagapangita sia sang kamatuoran, namat-od sia nga magtambong sa Miting Publiko sadto nga Domingo, nga nag-abot sing temprano sa tilipunan. Mainit sia nga gin-abiabi sang isa ka manugbantala kag gintanyagan sia sang isa ka pagtuon sa Biblia. Ining lamharon nga lalaki madasig nga nag-uswag kag ginbawtismuhan mga pila ka bulan sang ulihi. Tatlo ka mabuligon nga mga leksion gikan sa sini nga eksperiensia ang mahimo nga matun-an naton.
2 Una, ang Miting Publiko gin-anunsio. Nagagamit bala kamo sing mga handbill sa pag-anunsio sang Miting Publiko sang inyo kongregasyon? Samtang ginapahibalo sang tsirman ang titulo sang pamulongpulong publiko nga ihatag sa madason nga semana, hunahunaa yadtong sa inyo teritoryo nga ayhan ilabi na nga interesado sa tema. Ang iban nga mga tawo indi maluyag magbasa, apang ayhan handa sila nga mamati sa pamulongpulong sa isa ka topiko sa Kasulatan.
3 Ikaduha, ang bag-uhan gin-abiabi sing mainit. Magplano sa pag-abot sing temprano sa tilipunan agod matamyaw ninyo ang inyo mga kauturan kag subong man ang mga interesado. (Heb. 10:24) Kon ang bag-uhan nagatambong sa nahauna nga tion, ayhan wala sia makahibalo kon ano ang paabuton. Ipaathag nga ang aton mga miting ginasugdan sang ambahanon kag pangamuyo, kag sugiri sia kon paano ginahiwat ang miting. Kon nagakaigo, agdaha sia nga maglingkod kaupod mo agod mapaambit mo sa iya ang imo Biblia kag songbook. Agdaha sia nga hambalan upod sa imo ang iya mga pamangkot pagkatapos sang miting.
4 Ikatlo, ang pamulongpulong ginhandaan sing maayo. Yadtong nagarepresentar sa kongregasyon subong mga manugpamulongpulong publiko naghinguyang sing madamong inoras sa paghanda sang materyal agod mapukaw ang tumalambong sa gugma kag maayong mga buhat. Kita tanan ginaipit sa karon, kag ang makapasulhay nga mga kamatuoran gikan sa Pulong sang Dios magabulig sa aton sa pagbatas. Sa pagkamatuod, indi kita makapanginpulos sa pamulongpulong publiko kon indi kita mamati sing maayo sa ginahambal. Nabudlayan bala kamo kon kaisa sa pagkonsentrar sa tion sang pamulongpulong? Ayhan makabulig ang pagkuha sing malip-ot nga mga nota, subong sang ginahimo naton sa tion sang mga kombension. Sa paghanda, hunahunaa kon ano na ang imo nahibaluan tuhoy sa tema kag ang mga pamangkot nga magautwas nahanungod sini. Nian talupangda kon paano ginasabat sang humalambal ang mga pamangkot. Pat-ura nga sundan sa inyo Biblia samtang ginabasa kag ginapaathag ang tagsa ka Kasulatan.
5 Ang Sosiedad nag-aman sing nanuhaytuhay nga mga tema sang pamulongpulong publiko. Nagapangabudlay paagi sa nagadumala nga manugtatap ukon sa isa ka utod nga lalaki nga gintangdo niya, ginahituhog sang hubon sang mga gulang ang Miting Publiko nga programa sang kongregasyon agod ang mga tema nga ihatag nagakaigo sa lokal nga mga kinahanglanon. Indi pagwasiha ang bisan ano sa sining importante nga impormasyon kag palig-una ang mga bag-uhan nga manginpulos sing lubos gikan sa semanal nga Miting Publiko sang inyo kongregasyon.