Bag-ong Programa Sang Pinasahi Nga Adlaw Nga Asambleya
“Himua ang Tanan nga Butang Tungod sa Maayong Balita” amo ang tema sang bag-ong programa sang pinasahi nga adlaw nga asambleya sugod sa Pebrero. (1 Cor. 9:23) Ang maayong balita sang Ginharian amo ang labing importante nga balita nga nabatian sa karon. Ang programa magabulig sa aton nga pabaloran ang aton pinasahi nga pribilehiyo subong mga manugdala sining makalilipay nga balita. Magapalig-on man ini sa aton nga padayon nga ibantala ang maayong balita sa walay untat.—Binu. 5:42.
Ang programa magapakita sa aton kon paano gamiton sing bug-os ang aton teokratikong paghanas agod mahimo naton sing labing maayo ang ministeryo. Makabati kita gikan sa pila nga naghimo sing mga pagbag-o agod mapasangkad ang ila pag-alagad, lakip na ang mga pamatan-on nga nagahimo sang bug-os nila nga masarangan sa pagbantala sing maayong balita.—Ipaanggid ang Filipos 2:22.
Ang pangunang pamulongpulong, nga ihatag sang dinapit nga humalambal, magapadaku sang kinahanglanon nga magpabilin kita nga ‘nagakabagay nga tugyanan sing maayong balita.’ (1 Tes. 2:4) Buligan kita sa paghangop nga agod mahuptan naton ang pribilehiyo nga mapaambit sa iban ang maayong balita, dapat naton ipahisuno sing dalayon ang aton panghunahuna kag paggawi sa mga sugo kag mga talaksan sang Dios. Ipadaku man ang mga pagpakamaayo nga matigayon naton gikan sa paghimo sini.
Tambungi ining pinasahi nga programa. Dapat pahibaluon sa gilayon sang bag-ong mga dedikado nga luyag magpabawtismo sa pinasahi nga adlaw nga asambleya ang nagadumala nga manugtatap. Agdaha ang tanan nga imo ginatun-an sa pagtambong. Tugutan naton si Jehova sa pagpabakod sa aton nga himuon ang tanan nga butang tungod sa maayong balita kag busa matapos ang labing daku nga hilikuton sa wala pa ang Armagedon.