“Padayon nga Himua Ini sa Handumanan Nakon”

¹ Ang mga tawo nahuyog nga kalimtan ang kahulugan sang importante nga mga butang sa paglipas sang tion. Amo ini ang isa ka rason kon ngaa, sang ginsugdan ang “panihapon sang Ginuo,” ginsugo ni Jesus ang iya mga disipulo: “Padayon nga himua ini sa handumanan nakon.” Sugod sadto, sa anibersaryo sang kamatayon ni Jesus, ang mga Cristiano matinumanon nga nagpadayon sa “pagbantala sang kamatayon sang Ginuo, tubtob nga nag-abot sia.”​—⁠1 Cor. 11:​20, 23-26.

² Sa dili na lang madugay, batunon ni Jesus sa langitnon nga puluy-an ang katapusan sang nagadiutay na lang nga “diutay nga panong.” (Luc. 12:​32; Juan 14:​2, 3) Sini nga tuig ang nagkalabilin sang mga hinaplas upod sang nagadamo nga dakung kadam-an sang “iban nga mga karnero” may pribilehiyo liwat nga saulugon ang Panihapon sang Ginuo, sa Abril 11. (Juan 10:​16; Bug. 7:​9, 10) Ang apresasyon sa dakung gugma ni Jehova sa pagpadala sa iya bugtong nga Anak tungod sa katawhan pabakuron. Ang halimbawa ni Jesus, ang iya gugma, ang iya katutom tubtob sa kamatayon sa pag-aman sang gawad, kag ang iya paggahom karon subong Hari sa natukod na nga Ginharian sang Dios, subong man ang mga pagpakamaayo nga dalhon sang Ginharian sa katawhan ipatalupangod. Isa gid ka okasyon nga dapat dumdumon!

³ Maghanda Na Karon: Magpangabudlay kita tanan agod ining okasyon sang Memoryal mangin isa nga dapat kalipayan sing daku kag pasalamatan naton kag sang tanan nga nagapakig-upod sa aton. Mapauswag naton ang aton apresasyon sa kamatayon ni Jesus paagi sa pagbasa liwat sang rekord sang Biblia tuhoy sa nabilin nga pila ka adlaw sang ministeryo ni Jesus kag sa mga hitabo nga nagdul-ong sa iya kamatayon. Ang aton pamilya nga pagtuon mga pila ka semana antes sang Memoryal mahimo hinguyangon sa pagrepaso sa mga kapitulo 112-16 sang Pinakabantog nga Tawo nga libro.

⁴ Pila ang kilala ninyo nga mahimo makatambong sa Memoryal kon pabakuron ninyo ang ila apresasyon para sa sining okasyon, agdahon sila, kag abiabihon sila? Maghimo karon sing listahan, kag himua ang inyo masarangan nga buligan sila nga makatambong. Pagkatapos sina, buligi sila nga magpadayon sa pagtubo sa espirituwal paagi sa pagpalig-on sa ila nga magtambong sing regular sa mga miting.

⁵ Sa tion sang Memoryal, himuon ang pinasahi nga mga kahimusan agod dugangan ang kahigayunan sang tanan sa pagbantala. Paagi sa nagakaigo nga pag-iskedyul, makaaux­il­iary bala kamo sa Abril? sa Mayo? Ang isa sang pinakamaayo nga mga paagi nga mapakita naton nga ginadumdom naton sing mainapresyahon ang bug-os nga kahulugan sang halad ni Jesus sa aton amo ang paghambal tuhoy sa aton Dios, si Jehova, kag sa mga pagpakamaayo nga dalhon sang paggahom sa Ginharian sang iya Anak.​—⁠Sal. 79:​13; 147:⁠1.