Mga Anak—Kamo ang Amon Kalipay!
1 Mga bata nga lalaki kag babayi, pamilyar bala kamo sa sugo ni Jehova nga ilakip kamo sa mga hilikuton sa kongregasyon? (Deut. 31:12; Sal. 127:3) Makalilipay gid nga maupod kamo samtang ginasimba naton sing ululupod si Jehova! Ginapahalipay ninyo ang amon tagipusuon kon maglingkod kamo sing malinong sa mga miting kag magpamati sing maayo. Labi gid kami nga malipay kon magapanikasog kamo nga magkomento sa inyo kaugalingon nga mga tinaga. Nalipay ang bug-os nga kongregasyon kon ginahatag ninyo ang inyo mga bahin sa Teokratikong Eskwelahan sa Pagministro, kon malangkagon kamo nga nagabuylog sa amon sa pag-alagad sa latagon, kag kon mabatian namon nga nagapanaksi kamo sing masidla sa inyo mga kabutho kag mga manunudlo.—Sal. 148:12, 13.
2 Luyag namon nga mahibaluan ninyo nga nalipay kami kon makita namon ang inyo maayo nga pamatasan, ang inyo mahipid nga dagway, ang inyo matinlo nga paggawi, kag ang inyo pagtahod sa mga hamtong. Daku gid ang amon kalipay ilabi na kon magpakita kamo nga inyo ‘ginadumdom ang inyo Dakung Manunuga’ paagi sa pagpahamtang ninyo sing teokratikong mga tulumuron.—Manugw. 12:1; Sal. 110:3.
3 Sugiri Kami Sang Inyo mga Tulumuron: Ang isa ka otso-anyos nga bata nga lalaki nagsiling sa manugtatap sang distrito: ‘Una luyag ko magpabawtismo, dayon luyag ko magbulig sa kongregasyon paagi sa pag-atipan sa sistema sa tunog kag sa paghatag sing mga mikropono, sa pag-alagad subong isa ka attendant, sa pagbulig sa literatura, sa pagbasa sa mga pagtinuon sa libro kag sa mga Pagtinuon sa Lalantawan. Pagkatapos sina luyag ko mangin ministeryal nga alagad, dayon mangin isa ka gulang. Luyag ko man magpayunir kag mag-eskwela sa pioneer school. Nian luyag ko makakadto sa Bethel, mangin manugtatap sang sirkito ukon manugtatap sang distrito.’ Daw ano ka daku nga apresasyon ang ginpakita niya sa pribilehiyo nga maalagad ang Dios!
4 Samtang nagatubo kamo sa pisikal kag sa espirituwal, nalipay kami nga makita nga ginalab-ot ninyo ang inyo mga tulumuron. (Ipaanggid ang Lucas 2:52.) Kada tuig, linibo sa inyo ang nangin dibawtismado nga mga manugbantala kag nian nangin kalipikado nga magpabawtismo subong dedikado nga mga alagad ni Jehova. Daku gid ang amon kalipay kon makita namon kamo dayon nga nagahimud-os sa pag-auxiliary payunir kag bisan sa pagsulod sa bug-os tion nga pag-alagad. Sa pagkamatuod, mga anak, kamo ang amon kalipay kag tuburan gid sang pagdayaw sa aton langitnon nga Amay. Kabay nga pakamaayuhon kamo sing bugana ni Jehova!—Hulu. 23:24, 25.