Pamangkot

◼ Ngaa dapat naton hatagan sing pinasahi nga igtalupangod ang aton pamayo kag pamustura kon nagaduaw sa mga pasilidad sang Sosiedad sa ­Brooklyn, ­Patterson, kag ­Wallkill, ­New ­York, kag mga sanga talatapan sa bug-os nga kalibutan?

Ang mga Cristiano ginalauman nga maghupot sing nagakaigo nga pagginawi. Sa tanan nga tion ang aton pamayo kag pamustura dapat magapabanaag sing pagkadesente kag dignidad nga nagakaigo sa mga alagad ni Jehova nga Dios. Matuod ini ilabi na kon nagaduaw sa mga pasilidad sang Sosiedad sa ­New ­York kag sa mga sanga sa bug-os nga kalibutan.

Sa 1998, hiwaton ang distrito kag internasyonal nga mga kombension. Linibo sang aton mga kauturan gikan sa madamong kadutaan ang magaduaw sa ulong-talatapan sang Sosiedad sa ­New ­York subong man sa mga sanga sa iban nga mga pungsod. Indi lamang kon nagaduaw sa sining mga pasilidad kundi sa iban man nga tion, dapat naton ‘irekomendar ang aton kaugalingon subong mga ministro sang Dios sa tanan nga paagi,’ lakip na sa aton nagakaigo nga pamayo kag pamustura.​—⁠2 Cor. 6:​3, 4.

Sa paghinun-anon sa pagkaimportante sang nagakaigo nga pamayo kag pamustura, ang Organisado sa Pagtuman sang Aton Ministeryo nagakomento tuhoy sa pagkinahanglan sing pisikal nga katinlo, maugdang nga pamayo, kag maayo nga pamustura kon nagaalagad kita sa latagon kag nagatambong sa Cristianong mga miting. Nian, sa pahina 131, parapo 2, ini nagasiling: “Naaplikar man ini kon nagaduaw kita sa puluy-an ­Bethel sa ­Brooklyn ukon sa bisan diin nga sanga-talatapan sang Sosiedad. Dumduma, ang ngalan ­Bethel nagakahulugan ‘Balay sang Dios,’ gani ang aton pamayo, pamustora kag paggawi dapat nga mangin kaangay sa ginapaabot sa aton kon nagatambong sa mga miting para sa pagsimba sa Kingdom Hall.” Ining mataas man nga talaksan dapat ipakita sang mga manugbantala sang Ginharian gikan sa lokal nga duog subong man sadtong naggikan sa malayo nga mga duog nga nagkari sa pagduaw kag sa pagpakig-upod sa mga katapo sang pamilya ­Bethel kag sa pagduaw sa mga pasilidad sang sanga.

Ang aton pagpanapot dapat nga may positibo nga impluwensia sa iban sa kon paano nila tamdon ang matuod nga pagsimba kay Jehova. Apang, natalupangdan nga kon nagaduaw sa mga pasilidad sang sanga, ang pila ka kauturan nga lalaki kag babayi nahuyog nga mangin kaswal katama sa ila pamayo. Ina nga pamayo indi nagakaigo kon nagaduaw sa bisan diin man nga mga puluy-an ­Bethel. Sa sining bagay, subong sa tanan iban pa nga bahin sang aton Cristianong pagkabuhi, luyag naton nga huptan ang amo man kataas nga mga talaksan nga nagapakilala sa katawhan sang Dios gikan sa kalibutan paagi sa paghimo naton sang tanan nga butang sa himaya sang Dios. (Roma 12:​2; 1 Cor. 10:31) Nagakaigo man nga sugilanunon ang aton mga ginatun-an sa Biblia kag ang iban pa nga ayhan magaduaw sa ­Bethel sa nahauna nga tion kag pahanumdumon sila sang importansia nga hatagan sing igtalupangod ang nagakaigo nga pamayo kag pamustura.

Gani kon nagaduaw sa mga pasilidad sang Sosiedad, pamangkuta ang imo kaugalingon: ‘Maugdang bala ang akon pamayo kag pamustura?’ (Ipaanggid ang Miqueas 6:⁠8.) ‘Ginapabanaag bala sini sing maayo ang Dios nga akon ginasimba? Matublag bala ukon masaklaw ang iban sa akon hitsura? Nagapahamtang bala ako sing nagakaigo nga halimbawa sa iban nga mahimo nagaduaw sa nahauna nga tion?’ Kabay nga pirme kita, paagi sa aton pamayo kag pamustura, “magapuni sang panudlo sang aton Manluluwas, ang Dios, sa tanan nga butang.”​—⁠Tito 2:⁠10.