Abril—Tion Agod Mangin Makugi sa Maayong mga Buhat!
1 Samtang nagahinampot ang bagyo sa isa ka lugar nga may mga pumuluyo, hilingagawon gid ang kinahanglanon nga paandaman ang mga tawo tuhoy sa nagahilapit nga katalagman. Sa labi nga pagpalapit sang bagyo, labi pa nga mangin madagmit ang mga paandam. Ngaa? Bangod mga kabuhi ang nabutang sa katalagman! Ang iban nga mga tawo mahimo nga wala makabati sang nagligad nga mga paandam. Ang iban naman mahimo nga nakabati apang wala maghulag. Matuod man ini sa paandam sang Dios nga ginsugo sa aton nga ihatag antes hapayon sang “bagyo nga hangin” sang matarong nga kaakig sang Dios ang tanan nga agi sining malauton nga kalibutan. (Hulu. 10:25) Nabutang sa katalagman ang walay katapusan nga kabuhi sang binilyon ka tawo! Ang paandam dapat ihatag. Dapat kita mangin “makugi sa maayong mga buhat.”—Tito 2:11-14.
2 Mga dinekada na nga ang katawhan ni Jehova ginpahulag nga himuon ang panahon sang Memoryal subong isa ka tion para sa pinasahi nga kakugi sa ministeryo. Sang tigpamulak sang 1939, ang Informant, nga ginbuslan sang Ang Aton Ministeryo sa Ginharian, naghatag sini nga pagpalig-on: “Sa pag-abot sang tigpamulak, kag maayong tiempo, ginapaabot namon nga doblehon sang mga manugbantala [sang kongregasyon] ang mga oras sa latagon, kag ang oras sang mga payunir madugangan gid. Ang Abril isa ka bulan nga may lima ka Domingo. May lima man ini ka Sabado. Himua ang tagsa ka Sabado kag Domingo sa Abril . . . nga isa ka tion sang pinasahi nga pagpanaksi.” Isa yadto ka makahalangkat nga tulumuron nga ginpahamtang sa mga kauturan sang nagligad nga 60 ka tuig! Sini nga tuig, subong sang 1939, ang bulan sang Abril may lima ka Sabado kag Domingo. Ano ang imo mga plano sini nga bulan? Ano nga mga marka ang ginsulat mo sa imo kalendaryo para sa Abril 2000? Magplano sa pagpakigbahin sing makahulugan sa maayong mga buhat upod sa iban pa nga katawhan ni Jehova sa sining pinasahi nga bulan sang dugang pa nga espirituwal nga hilikuton.
3 Ang Ginalauman Naton nga Himuon: Ang pinakaimportante nga adlaw sang tuig 2000 nagatupa sa sini nga bulan. Ini amo ang Abril 19, ang anibersaryo sang kamatayon ni Jesus. Manikasog kita sing pinasahi nga agdahon ang pinakamadamo nga tawo sa Memoryal. Subong sang ginpanugda sang nagligad nga bulan, maghimo sing listahan sang tanan nga mahimo magtambong sa Memoryal kag tan-awa nga wala sing malipatan. Ang mga agdahon magalakip sa bisan sin-o nga indi aktibo nga mga manugbantala, estudyante sa Biblia, mga ginaduaw liwat, mga nagatuon anay, mga kaupod sa trabaho, mga kabutho, mga kaingod, mga paryente, kag iban pa nga mga kakilala. Ang mga luyag bala magtambong may transportasyon? Kon wala, mahigugmaon ka bala nga makabulig? Sa gab-i sang Memoryal, pribilehiyo naton tanan nga abiabihon ang mga tumalambong. Pagkatapos sang Memoryal, mabuligan naton sing labi pa sa espirituwal ining mga interesado.
4 Ang ‘kakugi sa maayong mga buhat’ sa mga adlaw antes kag pagkatapos sang Memoryal isa ka maayong paagi agod ipakita kay Jehova nga nagapasalamat gid kita sa tanan nga ginhimo niya para sa aton. Ang mas malawig nga mga oras nga nagasilak ang adlaw kag ang mas maayo nga tiempo sa kalabanan nga mga lugar nagapaposible sa madamo sa aton nga mapauswag ang aton mga panikasog sa ebanghelyo nga hilikuton. Kon ikaw nagaauxiliary payunir, himua ang imo bug-os nga masarangan nga makahinguyang sing 50 ka oras ukon kapin pa sa ministeryo. (Mat. 5:37) Sunda ang iskedyul nga imo ginhimo sa pagsugod sang bulan. (Manugw. 3:1; 1 Cor. 14:40) Kabay nga himuon sang iban sa aton ang aton masarangan agod suportahan ang tanan nga payunir, paagi sa pagpalig-on sa ila kag paagi sa pagpangabudlay upod sa ila sa latagon. (Ipaanggid ang 2 Hari 10:15, 16.) Kon makugi kita nga magsab-ug sa Abril, makapaabot kita sing daku nga kalipay kag pagpakamaayo gikan kay Jehova. (Mal. 3:10) Ayhan mangin tikang ini sa padayon nga pag-auxiliary payunir ukon pagregular payunir. Kabay nga ang espirituwal nga kapagsik nga natigayon naton sang Abril magapadayon sa masunod nga mga binulan samtang padayon kita nga mangin regular nga mga manugbantala sang Ginharian.
5 Sa walay duhaduha, linibo ka katawhan ni Jehova ang magasugod sing madamo pa nga pagtuon sa Biblia sa puluy-an sini nga bulan. Luyag mo bala nga makasugod sing isa? Ipangamuyo sing espesipiko ang isa ka pagtuon, kag magpanghikot suno sa imo mga pangamuyo. Makapat-od ka nga apresyahon ni Jehova ang imo mapainubuson nga pagpangayo sing bulig nga makakita sing isa ka bunayag-sing-tagipusuon nga tawo nga matudluan.—1 Juan 3:22.
6 Yari ang isa ka natilawan-na-sa-latagon nga paagi nga gingamit sing madinalag-on sa pagsugod sing mga paghambalanay. Magasugod ka paagi sa pagpamangkot: “Sa pagbinagbinag sang tanan nga kasingki sa pangpubliko nga mga eskwelahan, sa banta mo resulta bala ini sang pagpanghikot sang demonyo, ukon resulta bala ini sang kakulang sing paghanas sang mga ginikanan?” Pasabta sia. Kon magsiling sia sing “pagpanghikot sang demonyo,” basaha ang Bugna 12:9, 12, kag ipadaku ang papel sang Yawa sa pagdamo sang kagamo sa kalibutan. Nian buksi ang Ginapatuman nga brosyur sa leksion 4, kag pamangkuta sia kon napaligban na niya kon diin naghalin ang Yawa. Padayuna ang pagbasa kag pagbinagbinag sa nahaunang duha ka parapo. Kon ginpili niya ang “kakulang sing paghanas sang mga ginikanan” subong rason sang kasingki sa mga eskwelahan, basaha ang 2 Timoteo 3:1-3 kag ipakita ang mga kinaiya nga maathag nga nakaamot sa sining problema. Nian buksi ang Ginapatuman nga brosyur sa leksion 8, basaha ang parapo 5, kag padayuna ang paghambalanay. Kon makatalana ka sing iskedyul sa pagbalik, ginabuksan mo ang dalan para sa isa ka regular nga pagtuon sa Biblia upod sa iya. Sa masunod nga pagduaw, pamangkuta sia kon may kilala sia nga mahimo nga interesado sa pagpamati sang ginatun-an niya.
7 Ang isa pa ka paagi agod mangin “makugi sa maayong mga buhat” sa Abril amo ang pagpakigbahin sa lainlain nga paagi sang pagbantala. Napamensar mo na bala nga magbantala sa isa ka parke ukon parking lot? Sa pulunduhan sang bus ukon estasyon sang tren? Ukon luyag mo bala tilawan nga magpanaksi sa telepono, sa dalan, ukon sa teritoryo nga may mga negosyo? Ngaa indi mo paghimuon sini nga bulan ini nga mga pamensaron? Si Jehova magabulig sa imo nga matigayon ang kinahanglanon nga kaisog. (Binu. 4:31; 1 Tes. 2:2b) Ayhan maiskedyul mo ang pag-upod sa isa ka payunir ukon sa isa ka manugbantala nga eksperiensiado sa sining mga bahin sang ministeryo.
8 Ang bisan sin-o nga luyag gid sa pagpauswag sang iya bahin sa pagpanaksi nga hilikuton magapakigbahin sa di-pormal nga pagpanaksi. Sa masami ang kinahanglan lamang amo ang mainabyanon nga pagpakighambal sa isa ka tawo. Magpautwas lamang sing topiko nga pareho nga interesante sa inyo, ayhan ginagamit ang paagi nga ginpadaku sa parapo 6. Panikasugi nga himuslan bisan ang diutay nga tion nga mahimo kuntani mawasi. Wala naton ginahaboy ang singko sentimos, dies sentimos, ukon beinte-singko sentimos bangod lamang nga indi ini bilog nga pisoson. Ngaa indi gamiton sing mapuslanon bisan ang singko minutos, dies minutos, ukon kinse minutos sa pagpanaksi sing di-pormal?
9 Tion sa Pagpamalandong: Dumduma ang mabaskog nga mga punto nga ginpatalupangod sa drama sa “Matagnaon nga Pulong Sang Dios” nga Distrito nga Kombension sining karon lang. Ang drama, nga natig-uluhan Pag-apresyar sa Aton Espirituwal nga Palanublion, nagpahunahuna sa aton sing maayo sang kinatuhayan sa ulot ni Jacob kag ni Esau. Si Esau nagsiling nga subong ni Jacob, interesado sia sa espirituwal nga mga butang, apang wala ini makita sa mga binuhatan ni Esau. (Gen. 25:29-34) Isa gid ka daku nga paandam para sa aton! Kaangay ni Jacob, maghanda kita sa pagpakigsumpong, bisan sa pagpakigdumog, agod matigayon ang pagpakamaayo ni Jehova. (Gen. 32:24-29) Ngaa indi mo paggamiton ang Abril kag ang tanan masunod pa nga binulan sa pagpapagsik sang aton kakugi, sa amo wala gid ginapasapayanan ang aton makalilipay nga espirituwal nga palanublion?
10 “Ang dakung adlaw ni Jehova malapit na. Malapit na ini, kag nagadalidali ini sing tama.” (Sof. 1:14) Ang maayong balita sang Ginharian dapat ibantala. Kabuhi ang nabutang sa katalagman! Kabay nga ini nga bulan mangin ilabi na nga ginapakamaayo sa tanan nga katawhan ni Jehova samtang nahiusa naton nga ginapakita nga kita “makugi sa maayong mga buhat.”
[Kahon sa pahina 4]
Mga Pahanumdom sa Memoryal
Ang selebrasyon sang Memoryal sini nga tuig magatupa sa Mierkoles, Abril 19. Dapat talupangdon sang mga gulang ang masunod nga mga butang:
◼ Sa pagtalana sang oras sa pagtipon, pat-ura nga ang mga emblema ginapasa lamang pagkatapos sang pagtunod sang adlaw.
◼ Ang tanan, lakip na ang humalambal, dapat pahibaluon sang eksakto nga oras kag lugar sang selebrasyon.
◼ Ang nagakaigo nga sahi sang tinapay kag alak dapat tigayunon kag ihanda.—Tan-awa ang Agosto 15, 1985, Lalantawan, pahina 19.
◼ Ang mga pinggan, kopa, kag nagakaigo nga lamesa kag mantil dapat dalhon sa tilipunan kag iplastar sing abanse.
◼ Ang Kingdom Hall ukon ang iban pa nga tilipunan dapat tinluan sing maayo sing temprano.
◼ Ang mga attendant kag mga serbidor dapat pilion kag hatagan sing instruksion sing abanse tuhoy sa ila mga katungdanan kag sa nagakaigo nga paagi.
◼ Dapat himuon ang mga kahimusan nga serbehan ang bisan sin-o nga hinaplas nga nagamasakit kag indi makatambong.
◼ Kon kapin sa isa ka kongregasyon ang naiskedyul sa paggamit sa isa lang ka Kingdom Hall, dapat nga may maayo nga koordinasyon sa tunga sang mga kongregasyon agod malikawan ang di-kinahanglanon nga pagginutok sa lobby ukon puwertahan, sa pangpubliko nga mga higad-dalan, kag sa paradahan.