Mangin Pinasahi nga Bulan Bala Para sa Imo ang Abril?
1 Masunson naton ginapatuhuyan ang mga bulan sang Marso kag Abril subong panag-on sang Memoryal. Sanglit ang pagsaulog sang Memoryal pirme nagatupa sa sining tion sang tuig, ang katawhan ni Jehova ginapapagsik nga dugangan ang ila pagpakigbahin sa ministeryo sa latagon subong mga auxiliary payunir. Kag madamo sang nagpayunir sang Marso kag Abril ang masami nga nagpadayon sang ila pag-auxiliary payunir tubtob Mayo, labi na kay bulan gihapon ini sang bakasyon sa eskwelahan.
2 Ngaa indi magtambong sa miting upod sa mga magaauxiliary payunir sa Pebrero 14 sa inyo kongregasyon? Magapalig-on ini sa imo nga binagbinagon ini sing serioso, ilabi na kon makita mo ang tuman kadamo pa nga iban nga nagaplano sa pag-auxiliary payunir. Kon plano ninyo nga magpayunir sa Marso, nian dapat ninyo ihatag sa gilayon ang inyo aplikasyon pagkatapos sining miting.
3 Bisan ang mga indi makapayunir sarang makahimo sang Marso kag Abril nga pinasahi nga binulan paagi sa pagpauswag sang ila ministeryo sa latagon. Madamo pa ang dapat himuon. Ayhan maupod sang mga manugbantala kag mga payunir sa kongregasyon ang bag-ong dibawtismado nga mga manugbantala sa latagon. Dugang pa nga panikasugi nga agdahon ang tanan nga mga interesado sa Memoryal sa Abril 6.
4 Sang nagligad nga tuig 7,554 ang nag-auxiliary payunir sang Marso, 17,009 sang Abril, kag 10,950 sang Mayo. Madamong bag-ong pagtuon sa Biblia ang nasugdan bangod sining dugang nga hilikuton. Upod ang pagpakamaayo ni Jehova sa inyo dugang nga mga panikasog sini nga tuig, ayhan makasugod man kamo sing bag-ong pagtuon sa Biblia kag busa magapamatuod nga ang Abril isa gid ka pinasahi nga bulan para sa imo.—Sal. 34:8; Hulu. 10:22.