Ang mga Kabuhi Nabutang sa Katalagman!

¹ Ginaathag sang Biblia ang kabubut-on ni Jehova “nga ang tanan nga sahi sang tawo maluwas.” Apang, matuod man nga ang mga paglaum sa kabuhi sang binilyon sa duta nasandig sa panimuot nila kay Jehova nga Dios kag sa iya Ginharian paagi kay Jesucristo. Ang nagakaigo nga panimuot mahimo lamang mapasad sa “sibu nga ihibalo sang kamatuoran.” (1 Tim. 2:​3, 4) Samtang nagatalupangod nga sa dili madugay ang duta tinluan sang tanan nga kalautan agod ihanda ang dalan para sa bag-ong kalibutan sang Dios sang pagkamatarong, ginsugo man kita nga himuon ang kinahanglanon nga hilikuton nga nagaluwas sang kabuhi.​—⁠Mat. 24:​14; 28:​19, 20; Roma 10:​13-15.

² Ngaa Tuman ka Hilingagawon? Si Jesus nagpaandam tuhoy sa “dakung kapipit-an nga ang subong sini wala pa mahanabo kutob sa ginsuguran sang kalibutan.” (Mat. 24:21) Ang talipuspusan sina nga kapipit-an amo ang Armagedon. (Bug. 16:16) Ang hubon sang mga tawo nga mahimo laglagon kon indi sila magpamati sa maayong balita nagalakip sa aton di-tumuluo nga mga himata, mga kaingod, mga kaupod sa trabaho, mga kabutho, kag mga kakilala. Apang interesado kita nga lab-uton ang “tanan nga sahi sang mga tawo” bilang pag-ilog sa Dios, nga nagpakita sang iya gugma para sa bug-os nga kalibutan sang katawhan paagi sa paghatag sa iya Anak, si Jesucristo, subong gawad para sa tanan. (Juan 3:16) Dapat kita manikasog sing makugi nga agdahon ang tanan sa pagdangop sa gin-aman sang Dios nga duog nga palagyuhan. Paagi sa paghimo sing bug-os sang aton pagbantala nga hilikuton, malikawan naton nga makasala sa dugo.​—⁠Ezeq. 33:​1-7; 1 Cor. 9:⁠16.

³ Ano ang Aton Tulumuron? Ang pagkaimportante sang pagbantala nga hilikuton ginpatalupangod sa bug-os nga Pulong sang Dios. Subong sa ginpabutyag ni apostol Pablo, “ang gugma ni Cristo nagatiklod sa aton” sa pagkabuhi suno sa mga dalanon sang Dios. (2 Cor. 5:14) Dugang pa, masunson ginapatalupangod sang Ang Lalantawan ang aton obligasyon nga magbantala. Ang Aton Ministeryo sa Ginharian padayon nga nagahatag sing panuytoy kon paano himuon ang pagbantala nga hilikuton. Ang mga gulang nagaorganisar sang hilikuton kag nagapalig-on sa aton nga makigbahin sa sini. Ang mga masigkamanugbantala nagaagda sa aton nga magbuylog sa ila sa ministeryo. Madamo kita sing nabatian tuhoy sa paghanda sang aton mga presentasyon, pagtanyag sing mga magasin kag iban pa nga mga literatura, paghimo sing mga pagduaw liwat, pagdumala sing mga pagtuon sa Biblia, kag paggamit sang tanan nga kahigayunan sa pagpanaksi. Ini tanan nagabulig sa aton sa pagtuman sang aton tulumuron nga makaluwas sing mga kabuhi.​—⁠1 Cor. 9:​22, 23; Efe. 1:⁠13.