Magpadayon sa Pagbantala!
1 Kabubut-on sang Dios nga “ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Tim. 2:4) Bangod sini, ginsugo niya kita nga ibantala ang maayong balita. (Mat. 24:14) Kon nahangpan naton kon ngaa dapat kita magpadayon sa pagbantala, ang bisan ano man nga pagluya sing buot ukon posible nga tublag nga masumalang naton indi magaupang sa aton.
2 Ngaa Magpadayon? Madamo nga tublag sa kalibutan ang nangin kabangdanan nga kalimtan ukon pasapayanan sang mga tawo ang ginasugid naton sa ila. Gani dapat naton pirme sila pahanumdumon sang mensahe sang Dios tuhoy sa kaluwasan. (Mat. 24:38, 39) Dugang pa, ang mga kahimtangan sa kabuhi sang mga tawo pirme nagabalhin. Bisan ang mga kahimtangan sa kalibutan mahimo hinali nga magbalhin sing daku. (1 Cor. 7:31) Sa masunod nga adlaw, sa masunod nga semana, ukon sa masunod nga bulan, ang mga tawo nga ginabantalaan naton mahimo mag-atubang sing bag-ong mga problema ukon mga kabalaka nga magatiklod sa ila nga binagbinagon sing serioso ang maayong balita nga ginadala naton sa ila. Wala ka bala nagapasalamat nga ang Saksi nga nagdala sa imo sing kamatuoran mapinadayunon anay?
3 Sa Pag-ilog sa Kaluoy sang Dios: Mapailubon nga gintugutan ni Jehova nga magligad ang tion antes ipatuman ang paghukom sa mga malauton. Paagi sa aton padayon sia nga nagapakitluoy sa mga matarong sing tagipusuon nga magdangop sa iya kag maluwas. (2 Ped. 3:9) Mahimo kita makasala sa dugo kon wala naton ginabantala ang maluluy-on nga mensahe sang Dios sa mga tawo kag ginapaandaman sila tuhoy sa nagapakari nga paghukom sang Dios sa tanan nga wala magtalikod sa ila malain nga mga dalanon. (Ezeq. 33:1-11) Bisan pa nga ang aton pagbantala wala pirme ginabaton sing maayo, indi gid kita dapat maghinay sa paghimo sang tanan nga panikasog agod buligan ang mga sinsero nga mahangpan ang daku nga kaluoy sang Dios.—Binu. 20:26, 27; Roma 12:11.
4 Sa Pagpakita sang Aton Gugma: Si Jehova nga Dios, paagi kay Jesucristo, amo ang nagsugo nga ang maayong balita ibantala sa bug-os nga duta. (Mat. 28:19, 20) Bisan pa nga indi magpamati ang mga tawo, may kahigayunan kita nga ipakita ang aton gugma kag debosyon sa Dios paagi sa pagpadayon sa paghimo kon ano ang matarong.—1 Juan 5:3.
5 Kabay nga mangin determinado kita sa pagpadayon sa pagbantala! Himuon naton ini sing makugi samtang ‘adlaw [pa ini] sang pagluwas’ ni Jehova.—2 Cor. 6:2.