Ang Pinakaimportante nga Hilikuton
1. Ano ang ginapalig-on sa aton nga himuon bangod sang aton tudok nga apresasyon sa ministeryo?
1 Ngaa pirme kita ginapalig-on nga gamiton ang aton tion, kusog, kag pagkabutang para sa ministeryo? Bangod amo ini ang pinakaimportante nga hilikuton. Kon pamalandungan naton ang mga resulta sini, magalambo pa gid ang aton handum nga makigbahin sa sining indi na maliwat nga hilikuton.—Binu. 20:24.
2. Paano ang aton pagbantala nagapakabalaan sa ngalan ni Jehova?
2 Nagapakabalaan sa Ngalan ni Jehova: Ginapadaku sang pagbantala nga ang Ginharian ni Jehova paagi kay Cristo Jesus amo ang magabulos sa tanan nga gobierno sang tawo kag magadula sang tanan nga problema sang katawhan. (Mat. 6:9, 10) Mahimaya si Jehova bangod sia lamang ang makaluwas sa aton gikan sa balatian kag kamatayon. (Isa. 25:8; 33:24) Bangod ginadala naton ang iya ngalan, mahimo sia himayaon sang iban nga nakatalupangod sa aton maayo nga paggawi kag kakugi. (1 Ped. 2:12) Makalilipay gid nga mapahibalo naton sa bug-os nga duta ang ngalan sang Soberanong Ginuo, si Jehova!—Sal. 83:18.
3. Ano ang mga pagpakamaayo sa mga magbaton sang mensahe sang Ginharian?
3 Nagaluwas sang Kabuhi: Indi luyag ni Jehova nga “ang bisan sin-o malaglag kundi luyag niya nga ang tanan makadangat sa paghinulsol.” (2 Ped. 3:9) Apang, kon wala sing magtudlo sa ila, paano mahibaluan sang mga tawo kon ano ang husto ukon sayop nga paggawi sa pagtamod ni Jehova? (Jon. 4:11; Roma 10:13-15) Kon batunon sang mga tawo ang maayong balita, mangin maayo ang ila pagkabuhi bangod ginbiyaan nila ang malaut nga mga buhat. (Miq. 4:1-4) Dugang pa, nakatigayon sila sing makalilipay nga paglaum nga mabuhi sing walay katapusan. Ang aton aktibo nga pagbantala kag pagpanudlo nagaluwas sa aton kag sa mga nagapamati sa aton. (1 Tim. 4:16) Dalayawon gid ang aton papel sa sining pinakaimportante nga hilikuton!
4. Ngaa dapat kita mangin aktibo sa pagpakigbahin sa pagbantala kag paghimo sing disipulo nga hilikuton?
4 Sa indi madugay, hinali nga malaglag ining malaut nga kalibutan sa dakung kapipit-an. Maluwas ang mga nagadampig kay Jehova. Gani, ang pagbantala kag paghimo sing disipulo amo ang labing hilingagawon, importante, kag mapuslanon nga hilikuton subong. Kabay nga mangin importante sa aton kabuhi ini nga hilikuton!—Mat. 6:33.