Kon Paano Gamiton ang Maayong Balita Halin sa Dios!

Bag-o nga Brosyur nga Gindesinyo Para Buligan Kita sa Pagduaw Liwat kag sa Pagsugod sang Pagtuon sa Biblia

1. Anong bag-o nga brosyur ang ginpagua sa aton “Bantayi ang Imo Tagipusuon!” Distrito nga Kombension nga gindesinyo para buligan kita sa pagduaw liwat kag sa pagsugod sang pagtuon sa Biblia?

¹ Sa aton “Bantayi ang Imo Tagipusuon!” Distrito nga Kombension, nalipay kita sa pagbaton sang bag-o nga brosyur nga magabulig sa aton sa pagduaw liwat kag sa pagsugod sang pagtuon sa Biblia. Ini amo ang Maayong Balita Halin sa Dios! Pareho sa ginbuslan sini nga brosyur nga Ginapatuman, may malip-ot man ini nga mga leksion. Gani mahapos lang ini gamiton sa pagtuon sa Biblia sa ganhaan. Samtang ang Ginapatuman nga brosyur nagabinagbinag sa mga dapat himuon sang isa ka Cristiano, nga mahimo mabudlay batunon sang bag-uhan nga mga estudyante, ining bag-o nga brosyur nagasentro sa maayong balita gikan sa Biblia.—Binu. 15:35.

2. Ngaa ginhimo ang Maayong Balita nga brosyur?

² Ngaa ginhimo ini? Ang mga kauturan sa bug-os nga kalibutan nagapangabay sang simple nga publikasyon nga makaganyat sa mga tawo sa kamatuoran kag magaliton sa libro nga Ginatudlo Sang Biblia, ang aton panguna nga galamiton sa pagtuon sa Biblia. Ang mga tawo nga natak-an sa mga libro mahimo maganyat sa pagtuon sa Biblia paagi sa brosyur. Subong man, mas mahapos badbaron ang brosyur sa madamo nga lenguahe.

3. Ngaa tuhay ini nga brosyur sangsa iban nga publikasyon nga aton ginagamit sa pagtuon?

³ Kon Paano Ini Gindesinyo: Madamo sa aton publikasyon nga ginagamit sa pagtuon ang ginhimo agod mabasa kag maintiendihan sang mga tawo ang kamatuoran bisan wala sing magbulig sa ila. Pero tuhay ini nga publikasyon. Ginhimo ini subong giya sa pagtuon sa Biblia upod ang isa ka manunudlo. Gani sa pagtanyag sini, mas maayo gid kon binagbinagon ang isa ukon duha ka parapo. Malip-ot ang mga parapo, gani mahimo ini mabinagbinag sa ganhaan ukon sa duog sang negosyo. Maayo nga sugdan ang pagtuon sa leksion 1, pero mahimo man ini umpisahan sa bisan diin nga bahin sang brosyur.

4. Paano makabulig sa aton ang brosyur nga makatudlo halin mismo sa Biblia?

⁴ Sa kalabanan naton nga publikasyon, ang sabat sa mga pamangkot makita sa parapo. Pero sa sini nga brosyur, ang mga sabat makita sa Biblia. Madamo nga tawo ang luyag magtuon sa Biblia sangsa aton publikasyon. Gani, halos wala sing makita nga kinutlo nga mga teksto. Dapat basahon mismo ang mga teksto sa Biblia. Makabulig ini sa estudyante nga mahangpan nga ang iya ginatun-an halin sa Dios.—Isa. 54:13.

5. Ngaa importante nga nakahanda ang manunudlo sa tagsa ka pagtuon?

⁵ Wala ginapaathag sang brosyur ang tanan nga teksto. Ngaa? Para mapahulag ang estudyante nga mamangkot kag magamit sang manunudlo ang iya ikasarang sa pagtudlo. Gani, importante nga nakahanda ang manunudlo sa tagsa ka pagtuon. Pero maghalong: Likawi nga ikaw lang pirme ang nagahambal. Nanamian kita magpaathag sang Kasulatan. Pero mas maayo kon pangabayon naton ang estudyante nga ipaathag kon ano sa banta niya ang buot silingon sang teksto. Paagi sa mataktika nga paggamit sang mga pamangkot, mabuligan naton sia nga mangatarungan suno sa ginasiling sang teksto.—Binu. 17:2.

6. Paano naton magamit ini nga brosyur sa: (a) mga tawo nga nagapangduhaduha sa Dios kag sa Biblia? (b) pagpamalaybalay? (c) direkta nga pagtanyag sing pagtuon sa Biblia? (d) pagduaw liwat?

⁶ Pareho sa iban nga publikasyon nga ginagamit sa pagtuon, mahimo matanyag ini nga brosyur sa bisan ano nga tion, bisan ano man ang tanyag sina nga bulan. Madamo ang manamian sa paggamit sini sa direkta nga pagtanyag sing pagtuon sa ganhaan. Subong sang ginsambit sa kombension, ang paggamit sini sa pagbalik sa mga nagpakita sang interes makabulig gid para mangin makalilipay ang pagduaw liwat.—Tan-awa ang mga kahon sa pahina 5-7.

7. Paano sugdan ang pagtuon sa Biblia paagi sini nga brosyur?

⁷ Kon Paano Dumalahan ang Pagtuon: Mahimo kita makasugod paagi sa pagbasa sang mga pamangkot nga nasulat sing madukot. Dayon, basahon ang parapo kag ang (mga) teksto nga may nasulat nga “basaha.” Mataktika nga pamangkuta ang tagbalay para mahangpan niya ang kahulugan sang teksto. Antes magliton sa masunod nga seksion, pangabaya ang tagbalay nga sabton ang ginpautwas nga pamangkot. Sa una nga mga pagduaw, mas maayo kon isa lang ka pamangkot ang binagbinagon. Sa ulihi, mahimo na ini palawigon asta nga matuptupan ang bug-os nga leksion.

8. Ano ang aton likawan kon maghambal kita parte sa isa ka teksto, kag ngaa?

⁸ Ang mga teksto nga may nasulat nga “basaha” amo ang direkta nga nagasabat sa pamangkot. Kon nagahambal parte sa isa ka teksto, likawi nga magsiling, “Si apostol Pablo nagsulat,” ukon, “Talupangda kon ano ang gintagna ni Jeremias.” Basi hunahunaon sang tagbalay nga ang aton ginasiling naghalin lamang sa tawo. Mas maayo kon magsiling kita, “Ang Pulong sang Dios nagsiling,” ukon, “Talupangda ang gintagna sang Biblia.”

9. Dapat bala basahon ang tanan nga teksto?

⁹ Dapat bala naton basahon ang tanan nga teksto ukon ang mga teksto lamang nga may nasulat nga “basaha”? Depende sa kahimtangan. Ang mga teksto wala lamang nagasugid kon diin sa Biblia makita ang ideya. Ang tagsa ka teksto nagaunod sing impormasyon nga mapuslanon. Pero sa pila ka kahimtangan, bangod sa kakulang sing tion, interes, ukon ikasarang sa pagbasa sang estudyante, mas nagakaigo kon basahon lamang naton ang mga teksto nga may nasulat nga “basaha.”

10. San-o iliton ang pagtuon sa Ginatudlo Sang Biblia nga libro?

¹⁰ Kon San-o Iliton sa Libro nga Ginatudlo Sang Biblia: Pagkatapos sang pila ka paghinun-anon kag kon regular na ang pagtuon sa Biblia, mahimo na naton ini iliton sa libro nga Ginatudlo Sang Biblia ukon tapuson na lang anay ang brosyur. Pat-uron sing maayo sang mga manugbantala kon san-o nila iliton ang pagtuon. Kinahanglan bala magsugod sa una nga kapitulo sang libro kon iliton na ang pagtuon? Wala sing pagsulundan sa sini nga bahin. Lainlain ang kahimtangan sang tagsa ka tawo. Pero, mas makabenepisyo ang estudyante kon tun-an ang pareho nga mga topiko nga ginabinagbinag sing detalyado sa Ginatudlo Sang Biblia nga libro.

11. Ngaa dapat naton gamiton sing maayo ining bag-o nga brosyur?

¹¹ Sa kalibutan nga malaka na lang mabatian ang maayong balita, may daku kita nga pribilehiyo nga ipahayag ang pinakamaayo nga balita—nga nagagahom na ang Ginharian sang Dios kag malapit na lang ang bag-o nga kalibutan sa diin magapuyo ang pagkamatarong! (Mat. 24:14; 2 Ped. 3:13) Pat-od gid nga ang mga makabati sa sini nga mensahe magaugyon sa inspirado nga pulong: “Daw ano katahum sa mga bukid ang mga tiil sang nagadala sang maayong mga balita, nga nagabantala sang paghidait, nga nagadala sang maayong mga balita sang kaayohan, nga nagabantala sang kaluwasan, nga nagasiling sa Sion, ‘Ang imo Dios nagahari.’” (Isa. 52:7) Kabay nga gamiton naton ining bag-o nga brosyur sa pagdala sang maayong balita halin sa Dios sa mga ginauhaw sa aton teritoryo!

[Kahon sa pahina 5]

Kon Nagapangduhaduha ang Tagbalay Parte sa Dios kag sa Biblia:

● Sa pila ka lugar, ang paggamit sang mga tinaga nga “Dios” kag “Biblia” mahimo magpauntat sa paghambalanay. Sa sini nga kahimtangan, mas maayo kon istoryahan sa una nga pagbisita ang topiko nga ginakabalak-an sa inyo lugar, pareho sang maayo nga panggobierno, praktikal nga bulig para sa mga pamilya, ukon parte sa palaabuton. Pagkatapos sang pila ka pag-istoryahanay, mahimo na naton itanyag ang Maayong Balita nga brosyur agod ipakita nga nagaluntad gid ang Dios kag masaligan ang Biblia.

[Kahon sa pahina 6]

Kon Nagapamalaybalay:

● “Nagaduaw ako para ipakita sa imo nga mahapos lang mahibaluan kon ano ang himuon sang Dios sa mga tawo sa palaabuton. Napamensaran mo na bala kon dulaon gid ayhan sang Dios ang aton pag-antos? [Tuguti sia nga magsabat.] Ginapakita sini nga brosyur kon diin makita sa Biblia ang sabat sa sina nga pamangkot. [Ihatag sa iya ang brosyur, kag basaha ang una nga parapo sa leksion 1, pati na ang Jeremias 29:11.] Suno diri, makasiling ka bala nga luyag gid sang Dios nga mangin maayo ang aton palaabuton? [Tuguti sia nga magsabat.] Imo na ina nga kopya. Sa sunod, istoryahan naton ang ikaduha nga parapo agod mahibaluan ang sabat sang Biblia sa pamangkot nga, ‘Paano dulaon sang Dios ang kabangdanan sang aton pag-antos?’” Kon may tion pa ang tagbalay sa una nga pagbisita, mahimo ninyo basahon kag binagbinagon ang ikaduha nga parapo kag ang tatlo ka teksto. Maghimo sing kahimusan sa pagbalik para hinun-anunan ang ikaduha nga pamangkot.

● “Halos tanan nga tawo nagapangamuyo, ilabi na kon may problema sila. Nagapangamuyo ka man bala kon kaisa? [Tuguti sia nga magsabat.] Sa banta mo ginapamatian ayhan sang Dios ang tanan nga pangamuyo, ukon may pila ka pangamuyo nga wala niya nagustuhan? [Tuguti sia nga magsabat.] Ini nga brosyur nagabulig kon paano makita ang sabat sang Biblia sa sini nga pamangkot. [Ihatag sa iya ang kopya, kag binagbinaga ninyo ang una nga parapo sa leksion 12 kag ang teksto nga may “basaha.”] Indi bala makalilipay nga ang Dios handa sa pagpamati sa aton? Pero agod makabenepisyo kita sing bug-os sa pangamuyo, dapat kilalahon naton sing maayo ang Dios. [Buksi ang leksion 2 kag basaha ang mga subtitulo.] Ibilin ko ini sa imo, kag sa sunod hibaluon naton ang sabat sang Biblia sa sining mga pamangkot.”

● “Ang mga tawo subong nabalaka kon ano ang matabo sa kalibutan sa palaabuton. Sa banta mo magaayo pa ayhan ang aton kahimtangan? [Tuguti sia nga magsabat.] Madamo nga tawo ang nalipay sang nahibaluan nila nga ang Biblia nagaunod sing maayong balita nga makahatag sa aton sing paglaum. Ari ang pila sa mga pamangkot nga ginasabat sang Biblia.” Ihatag sa iya ang brosyur, kag papilia sia sang pamangkot sa likod. Nian buksi ang leksion nga iya ginpili, kag sugdi ang pagtuon. Maghimo sing kahimusan sa pagbalik para binagbinagon ang masunod nga pamangkot.

[Kahon sa pahina 7]

Direkta nga Pagtanyag:

● “Gusto ko ipakita sa imo ang bag-o nga kurso sang pagtuon sa Biblia. Ini nga brosyur may 15 ka leksion nga nagatudlo kon diin sa imo Biblia makita ang sabat sa importante nga mga pamangkot. [Ipakita sa iya ang atubang kag likod sang brosyur.] Natestingan mo na bala magtuon sa Biblia? [Tuguti sia nga magsabat.] Ipakita ko sa imo kon daw ano kahapos tun-an ang mga leksion. [Binagbinaga ang una nga parapo sang pamangkot 3 sa leksion 3, kag basaha ang Bugna 21:4, 5. Kon nagakaigo, binagbinaga ang masunod nga parapo kag mga teksto nga basahon.] Ibilin ko ini nga brosyur sa imo. Testingi nga tun-an ang Biblia bisan kaisa lang. Kon maluyagan mo, padayunon naton ini. Sa pagbalik ko binagbinagon naton ang una nga leksion. Isa man lang ina ka pahina.”

[Kahon sa pahina 7]

Kon Nagaduaw Liwat:

● “Maayo gid kay nagkit-anay kita liwat. Gindal-an ko ikaw sini nga brosyur nga nagahatag sing sabat sang Biblia sa pila ka makapainteres nga pamangkot. [Ihatag sa iya ang brosyur, kag agdaha sia nga tan-awon ang likod sini.] Diin sa sini nga mga topiko ang nanamian mo? [Tuguti sia nga magsabat. Nian buksi ang ginpili niya nga leksion.] Ipakita ko sa imo kon paano gamiton ini nga brosyur sa pagpangita sang sabat sang Biblia.” Ipasundayag ang pagtuon paagi sa paghinun-anon sang isa ukon duha ka parapo kag sang mga teksto nga basahon. Amo lang sina kahapos ang pagsugod sing pagtuon sa Biblia! Ibilin ang brosyur sa tagbalay, kag maghimo sing kahimusan sa pagbalik. Kon matapos na ang leksion, puede ninyo binagbinagon ang leksion nga pilion sang tagbalay ukon magsugod sa una nga leksion sang brosyur.