Buligi ang mga Bulag nga Makatuon Parte kay Jehova
1. Paano ginpakita ni Jesus ang kaluoy sa mga bulag?
1 Pila na lang ka adlaw kag patyon na si Jesus. Samtang nagapagua sia sa siudad sang Jerico, may duha ka bulag nga nagapakilimos nga nagsinggit: “Ginuo, maluoy ka sa amon!” Bisan pa ginahunahuna ni Jesus ang mabudlay nga mga pagtilaw nga iya maatubang, nagdulog sia, ginpatawag ang mga lalaki, kag gin-ayo sila. (Mat. 20:29-34) Paano naton mailog ang kaluoy ni Jesus sa mga bulag?
2. Paano kita makapanaksi sa isa ka bulag sa publiko?
2 Mangin Mabinuligon: Kon may masumalang ka nga bulag, mahimo sa publiko, magpakilala sa iya kag buligi sia. Bangod masami sila nga ginatunto, mahimo sila magduhaduha sa primero. Pero mahimo sila mapahamtang sa imo pagkamainabyanon kag sinsero nga interes sa ila. Dumduma nga lainlain ang kasangkaron sang pagkabulag, kag ang pagbulig sa ila nagadepende sa ila kinahanglanon. Sa tapos mo sia buligan, mahimo mo isugid sa iya nga nagabulig ka sa mga tawo nga matun-an ang Biblia. Silinga sia nga luyag mo basahon sa iya ang kasulatan, kaangay sang Salmo 146:8 ukon Isaias 35:5, 6. Kon makahibalo sia magbasa sang Braille, pamangkuta sia kon gusto niya magbasa sang Braille nga publikasyon nga magabulig sa iya nga matun-an sing dugang pa ang Biblia. Mahimo mo man sia buligan nga makatigayon sang mga audio file sa jw.org. Kon ang iya kompyuter may screen reader program nga may nagabasa sang mga text sa screen, mahimo maapresyar niya ang mga naimprinta nga artikulo sa jw.org lakip ang mga publikasyon nga puede ma-download sa RTF (Rich Text Format).—Tan-awa ang kahon nga “Kon Nagabulig sa Bulag . . .”
3. Ano ang aton himuon para makita naton ang mga bulag sa teritoryo?
3 Pangitaa ang mga Bulag: Talagsa lang kita makakita sang mga bulag sa aton pagpamalaybalay bangod nahuya sila mag-atubang sa iban nga tawo. Gani, tinguhaan gid naton nga ‘pangitaon’ sila para mapanaksihan. (Mat. 10:11) May kaupod ka bala sa trabaho ukon kaeskwela nga bulag? Istoryaha sia. Kon ang inyo teritoryo may eskwelahan para sa mga bulag, itanyag ang pila sang aton Braille nga publikasyon para sa librarya sang ila eskwelahan. May kilala ka bala nga may bulag nga miembro sang pamilya? May organisasyon bala sa inyo lugar nga nagahatag sing serbisyo sa mga bulag ukon nagabulig sa mga pasilidad nga ginaistaran sang mga bulag? Ipaathag sa miembro sang pamilya, sa receptionist, ukon sa manugdumala nga ang mga Saksi ni Jehova interesado gid sa pagbulig sa mga bulag, kag magtanyag sang Braille nga literatura ukon mga audio recording. Ipakita sa iya ang saad sa Biblia nga dulaon sang Dios ang pagkabulag sing permanente. Mahimo mo man ipakita sa ila ang video sa jw.org nga natig-uluhan nga “Without It, I Would Feel Lost,” nga nagasaysay sang eksperiensia sang bulag nga nakabenepisyo sa pagtigayon sang Braille nga Biblia. Paagi sa pagpaathag sang katuyuan sang imo pagbisita, magabukas ini sang kahigayunan nga maistorya mo ang mga bulag.
4. Ano ang matun-an naton sa eksperiensia ni Janet?
4 Ang isa ka bulag nga utod nga si Janet nagkadto sa isa ka pasilidad para sa mga bulag. Naistorya niya ang isa ka pamatan-on nga babayi. Ginsilingan sia ni Janet, “Gin-ayo ni Jesus ang mga bulag agod ipakita kon ano ang iya himuon sa tanan nga bulag.” Ginbinagbinag nila ang Bugna 21:3, 4, kag ginpaathag sa iya ni Janet kon paano ini nga saad matuman paagi sa Ginharian sang Dios. Naghipos sing makadali ang babayi kag nagsiling: “Wala ko pa gid ini mabatian nga pagtamod sa isa ka bulag. Madamo nga indi bulag ang nagapati nga nagakabulag ang mga tawo bangod sa ila ginhimo ukon sa ginhimo sang ila katigulangan.” Gin-e-mail ni Janet ang link sang Ginatudlo sang Biblia nga libro, kag nagatuon na sila subong sa Biblia sing duha ka beses kada semana.
5. Bisan pa indi naton mapaayo ang mga bulag kaangay sang ginhimo ni Jesus, ano nga pagpakamaayo ang mabaton naton kon pakitaan naton sila sing interes?
5 Matuod, indi naton mapaayo ang mga bulag kaangay sang ginhimo ni Jesus, pero mabuligan naton ang mga tawo nga ang hunahuna ginbulag sang dios sini nga sistema sang mga butang, lakip ang literal nga mga bulag, nga mahangpan ang kamatuoran sa Pulong sang Dios. (2 Cor. 4:4) Gin-ayo ni Jesus ang duha ka bulag sa Jerico bangod “naluoy gid” sia sa ila. (Mat. 20:34) Kon ipakita man naton ang interes sa mga bulag, mabatyagan naton ang kalipay sa pagbulig sa iban nga matun-an ang parte kay Jehova, ang isa nga magadula sang pagkabulag sa walay katubtuban.