Ang Ginhimo ni Jehova Para Luwason Kita sa Sala kag Kamatayon

1-2. (a) Ano ang sala, kag ngaa sigurado kita nga mahilway kita sa sini? (Tan-awa man ang “Dugang nga Paathag.”) (b) Ano ang binagbinagon naton sa sini nga artikulo kag sa iban pa nga mga artikulo sa sini nga isyu sang Ang Lalantawan? (Tan-awa man ang “Patalupangod sa mga Bumalasa” sa sini nga isyu.)

GUSTO mo bala mabal-an kon daw ano kadaku ang gugma ni Jehova nga Dios para sa imo? Ari ang isa ka maayo nga paagi para mabal-an mo ang sabat sa sini: Tun-i kon ano ang ginhimo niya para luwason ka sa sala kag kamatayon. Mapintas gid nga kaaway ang sala,a kag indi mo ini madaug kon ikaw lang. Makahimo gid kita tanan sang sala adlaw-adlaw, kag nagakapatay kita bangod sa sala. (Roma 5:12) Pero, may maayo nga balita. Sa bulig ni Jehova, mahilway kita sa sala. Sigurado gid ini kay ginagarantiyahan ini ni Jehova.

² Sa sulod na sang mga 6,000 ka tuig, ginabuligan ni Jehova nga Dios ang mga tawo para mangin suod sila sa iya bisan pa makasasala sila. Ngaa? Bangod palangga niya kita. Sugod sang gintuga niya ang mga tawo, ginpalangga na niya sila. Gani, madamo sia sing ginhimo para buligan ang mga tawo kon makasala sila. Kabalo ang Dios nga ang resulta sang sala amo ang kamatayon. Pero, indi niya gusto nga mapatay kita. Sa baylo, gusto niya nga mabuhi kita sing wala sing katapusan. (Roma 6:23) Huo, amo gid ina ang gusto ni Jehova para sa imo. Sa sini nga artikulo, binagbinagon naton ang tatlo ka pamangkot: (1) Ano nga paglaum ang ginhatag ni Jehova sa makasasala nga mga tawo? (2) Ano ang ginhimo sang makasasala nga mga tawo sang panahon sang Biblia para malipay sa ila si Jehova? (3) Ano ang ginhimo ni Jesus para luwason ang mga tawo sa sala kag kamatayon?

ANO NGA PAGLAUM ANG GINHATAG NI JEHOVA SA MAKASASALA NGA MGA TAWO?

3. Paano nangin makasasala ang aton una nga mga ginikanan?

³ Sang gintuga ni Jehova ang una nga lalaki kag babayi, gusto niya nga mangin malipayon sila. Ginhatagan niya sila sang matahom nga ilistaran, sang regalo nga pag-asawahay, kag sang dalayawon nga asaynment. Pun-on nila ang duta sang ila mga kaliwatan, kag himuon nila ang bilog nga duta nga isa ka paraiso pareho sa hardin sang Eden. Dayon, may ginhatag sia sa ila nga isa ka simple lang nga sugo. Kag ginpaandaman niya sila nga kon indi nila pagtumanon ini nga sugo paagi sa hungod nga pagrebelde sa iya, mapatay sila. Kabalo kita kon ano ang masunod nga natabo. May isa ka malain nga anghel nga nagsulay sa ila. Wala sing gugma sa Dios kag sa ila ini nga anghel, kag ginsulay niya sila nga indi pagtumanon ang Dios. Wala nila napakita nga nagasalig sila sa ila mahigugmaon nga Amay, gani nakasala sila. Kabalo man kita nga natabo gid ang ginpaandam sa ila ni Jehova. Bangod wala gintuman ni Adan kag ni Eva ang Dios, nag-antos sila sa bilog nila nga kabuhi. Nagtigulang sila, kag napatay sila sang ulihi.​—Gen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Ngaa indi gusto ni Jehova ang sala, kag ngaa ginabuligan niya kita para mangin suod kita sa iya bisan pa makasasala kita? (Roma 8:​20, 21)

⁴ Ginpasulat ni Jehova sa Biblia ining masubo nga kasaysayan kay may matun-an kita sa sini. Makabulig ini sa aton nga maintiendihan kon ngaa indi gid niya gusto ang sala. Ginaguba sang sala ang aton kaangtanan sa aton Amay, kag nagaresulta ini sa kamatayon. (Isa. 59:2) Sa bahin naman sang rebelde nga anghel nga si Satanas, nga amo ang rason sang tanan naton nga problema, gusto gid niya ang sala. Gani ginsulay niya si Adan kag si Eva, kag padayon niya nga ginasulay ang mga tawo asta subong. Posible nahunahuna niya nga nagdaug sia bangod nasulay niya si Adan kag si Eva sa Eden. Pero wala niya nahangpan sing maayo kon daw ano ka mapinalanggaon si Jehova. Wala ginbag-o ni Jehova ang iya katuyuan para sa mga kaliwatan ni Adan kag ni Eva. Palangga niya ang mga tawo, gani naghatag sia dayon sang paglaum sa ila. (Basaha ang Roma 8:​20, 21.) Kabalo si Jehova nga may mga tawo nga magapalangga kag magatuman sa iya. Kag bilang ila Amay kag Manunuga, naghimo sia sang paagi para hilwayon sila sa sala kag para mangin suod sila sa iya. Ano ang ginhimo ni Jehova para mangin posible ini?

5. San-o ang pinakauna nga tion nga ginhatagan kita ni Jehova sang ideya parte sa paglaum sang makasasala nga mga tawo? Ipaathag. (Genesis 3:15)

⁵ Basaha ang Genesis 3:15. Sang ginhambal ni Jehova kon ano ang matabo kay Satanas, amo ini ang pinakauna nga tion nga ginhatagan kita ni Jehova sang ideya parte sa aton paglaum. Gintagna ni Jehova nga may “kaliwat” nga magaluwas sa mga tawo. Dugmukon sini nga kaliwat si Satanas, kag dulaon niya ang tanan nga problema nga nagsugod sa Eden bangod kay Satanas. (1 Juan 3:8) Pero, magaantos anay ini nga kaliwat. Kay man, pilasan sia ni Satanas kag mapatay sia. Masakit gid ini para kay Jehova. Pero handa sia nga masakitan kag ihatag ini nga “kaliwat” para luwason ang mga tawo sa sala kag kamatayon.

ANO ANG GINHIMO SANG MAKASASALA NGA MGA TAWO SANG UNA PARA MALIPAY SA ILA SI JEHOVA?

6. Ano ang ginhimo sang matutom nga mga tawo, pareho kay Abel kag kay Noe, para mangin suod sila kay Jehova?

⁶ Sa sulod sang madamo nga tinuig, amat-amat nga gin-athag ni Jehova kon paano mangin suod sa iya ang makasasala nga mga tawo. Si Abel, nga ikaduha nga anak ni Adan kag ni Eva, amo ang una nga tawo nga nagpakita sing pagtuo kay Jehova pagkatapos sang natabo sa Eden. Palangga ni Abel si Jehova, gusto niya nga malipay sa iya si Jehova, kag gusto niya nga mangin suod sa Iya. Gani, naghalad sia kay Jehova. Manugbantay sang karnero si Abel, gani ginhalad niya kay Jehova ang pila sa mga panganay sang iya mga karnero. Ano ang reaksion ni Jehova sa sini? “Nahamut-an ni Jehova si Abel kag ang iya halad.” (Gen. 4:4) Nalipay man si Jehova sa mga halad sang iban pa nga mga tawo nga nagapalangga kag nagasalig sa iya pareho kay Noe. (Gen. 8:​20, 21) Paagi sa pagbaton sa sini nga mga halad, ginpakita ni Jehova nga may puede himuon ang makasasala nga mga tawo para malipay sia sa ila kag para mangin suod sila sa iya.b

7. Ano ang matun-an naton sa kahanda ni Abraham sa paghalad sang iya anak?

⁷ Mabakod ang pagtuo ni Abraham kay Jehova. Isa ka bes, ginpangabay sia ni Jehova nga ihalad niya ang iya anak nga si Isaac. Mabudlay gid ini himuon, gani sigurado nga nasubuan gid si Abraham. Pero, gintuman niya si Jehova. Sang hana na niya nga patyon ang iya anak, ginpunggan sia ni Jehova. Pero, ginpakita sini nga halimbawa kon ano ang himuon ni Jehova sa palaabuton. Handa si Jehova nga ihatag ang iya pinalangga nga Anak bilang halad. Huo, palangga gid ni Jehova ang mga tawo.​—Gen. 22:​1-18.

8. Ano ang matun-an naton sa mga halad nga ginpatuman sang Kasuguan? (Levitico 4:​27-29; 17:11)

⁸ Pagligad sang madamo nga tinuig, ginhatagan ni Jehova ang mga Israelinhon sang Kasuguan. Suno sa sini, dapat sila maghalad sang mga sapat para mapatawad ang ila mga sala. (Basaha ang Levitico 4:​27-29; 17:11.) Matun-an naton sa sini nga mga halad nga may isa ka mas daku nga halad nga bug-os nga magahilway sa mga tawo sa sala. Ginsilingan sang Dios ang iya mga manalagna nga ipaathag nga dapat mag-antos kag mapatay ang ginpromisa nga kaliwat, kag patyon sia nga daw isa ka karnero nga ginhalad. Sang ulihi, nakilala kon sin-o ang kaliwat, nga amo gali ang pinalangga nga Anak sang Dios. (Isa. 53:​1-12) Hunahunaa ini: Nagpromisa si Jehova nga ihalad niya ang iya pinalangga nga Anak para luwason ang mga tawo sa sala kag kamatayon. Dalayawon gid ang ginhimo ni Jehova, kag ginhimo niya ini para sa imo.

ANO ANG GINHIMO NI JESUS PARA LUWASON ANG MAKASASALA NGA MGA TAWO?

9. Ano ang ginsiling ni Juan nga Manugbawtismo parte kay Jesus? (Hebreo 9:22; 10:​1-4, 12)

⁹ Sang unang siglo C.E., amo ini ang ginsiling sang alagad sang Dios nga si Juan nga Manugbawtismo parte kay Jesus nga taga-Nazaret: “Tan-awa, ang Kordero sang Dios nga nagakuha sang sala sang kalibutan!” (Juan 1:29) Ginapahangop sang iya ginsiling nga si Jesus amo ang kaliwat nga ginpromisa sang Dios, kag ihalad ni Jesus ang iya kabuhi. Gani, nag-abot na ang kaliwat nga bug-os nga magahilway sa mga tawo sa sala.​—Basaha ang Hebreo 9:22; 10:​1-4, 12.

10. Paano ginpakita ni Jesus nga ‘nagkari sia sa pagtawag’ sa mga makasasala?

¹⁰ Nagpokus si Jesus sa pagbulig sa mga tawo nga nasubuan bangod makasasala sila, kag gin-agda niya sila nga mangin sumulunod niya. Kabalo sia nga ang sala amo ang panguna nga rason kon ngaa nagaantos ang mga tawo. Gani ginbuligan niya ang mga lalaki kag mga babayi nga kilala nga mga makasasala. Paagi sa isa ka ilustrasyon, nagsiling sia: “Ang mga mapagros wala nagakinahanglan sing manugbulong, kundi ang mga masakiton.” Nagsiling pa sia: “Wala ako nagkari sa pagtawag sa mga matarong, kundi sa mga makasasala.” (Mat. 9:​12, 13) Ginhimo gid ini ni Jesus. Halimbawa, sang ginhinawan sang isa ka babayi ang mga tiil ni Jesus paagi sa iya mga luha, ginpatawad ni Jesus ang iya mga sala. (Luc. 7:​37-50) Gintudluan ni Jesus ang isa ka Samaritana sang importante nga mga kamatuoran bisan pa nga kabalo sia nga imoral ang pagkabuhi sini nga babayi. (Juan 4:​7, 17-19, 25, 26) Ang sala amo ang rason kon ngaa nagakapatay ang mga tawo. Pero ginhatagan sang Dios si Jesus sang gahom sa pagbanhaw sa mga patay. Lalaki man ukon babayi, bata man ukon adulto, ginpakita ni Jesus nga masarangan niya sila banhawon.​—Mat. 11:5.

11. Ngaa wala natahap kay Jesus ang makasasala nga mga tawo?

¹¹ Wala kita natingala kon ngaa wala natahap kay Jesus bisan ang mga tawo nga grabe kalain ang mga ginahimo. Kay man, ginpakitaan niya sila sang kaluoy kag kaayo. Gani, komportable sila nga magpalapit sa iya. (Luc. 15:​1, 2) Gindayaw sila ni Jesus kag ginpakitaan sing kaayo bangod nagtuo sila sa iya. (Luc. 19:​1-10) Gani, ginpakita niya kon daw ano ka maluluy-on ang iya Amay. (Juan 14:9) Paagi sa iya mga ginsiling kag ginhimo, ginpakita niya nga palangga sang iya maluluy-on nga Amay ang makasasala nga mga tawo kag gusto sang iya Amay nga buligan sila. Ginbuligan ni Jesus ang makasasala nga mga tawo nga bag-uhon ang ila kabuhi kag magsunod sa iya.​—Luc. 5:​27, 28.

12. Ano ang ginsiling ni Jesus sa iya mga disipulo parte sa iya kamatayon?

¹² Kabalo si Jesus nga ihalad niya ang iya kabuhi. Pila ka beses nga ginsilingan niya ang iya mga disipulo nga luiban sia kag ilansang sa usok. (Mat. 17:22; 20:​18, 19) Suno sa ginsiling ni Juan nga Manugbawtismo kag sa gintagna sang mga manalagna, kabalo si Jesus nga ang iya halad amo ang magakuha sang sala sang kalibutan. Nagsiling man si Jesus nga pagkatapos niya mahalad ang iya kabuhi, ‘buyukon niya ang tanan nga sahi sang tawo.’ (Juan 12:32) Malipay si Jehova sa makasasala nga mga tawo kon batunon nila si Jesus bilang ila Ginuo kag kon ilugon nila ang iya halimbawa. Kon himuon nila ini, mangin ‘hilway na sila sa pagkaulipon sa sala.’ (Roma 6:​14, 18, 22; Juan 8:32) Gani nangin maisog si Jesus kag handa sia nga maeksperiensiahan ang masakit nga kamatayon para luwason kita.​—Juan 10:​17, 18.

13. Paano napatay si Jesus, kag ano ang ginatudlo sa aton sang iya kamatayon parte kay Jehova nga Dios? (Tan-awa man ang piktyur.)

¹³ Ginluiban si Jesus, gindakop, gin-insulto, ginpakalain, ginpamatbatan sang kamatayon, kag ginpaantos. Dayon, ginlansang sia sang mga soldado sa usok. Bisan pa grabe kasakit sang naeksperiensiahan ni Jesus, nangin matutom sia kag ginbatas niya ini. Pero, mas masakit ang nabatyagan ni Jehova nga Dios samtang ginatan-aw niya ang iya Anak nga nagaantos. Puede kuntani gamiton ni Jehova ang iya wala tupong nga gahom para indi mag-antos ang iya Anak, pero wala sia nagpasilabot. Palangga gid ni Jehova ang iya Anak, pero gintugutan niya nga mag-antos sia kag mapatay. Ngaa? Bangod sang iya gugma. Nagsiling si Jesus: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.”​—Juan 3:16.

14. Ano ang natun-an mo sa paghalad ni Jesus sang iya kabuhi?

¹⁴ Ang paghalad ni Jesus sang iya kabuhi amo ang pinakadaku nga pamatuod nga palangga gid ni Jehova ang mga kaliwatan ni Adan kag ni Eva. Pamatuod ini nga palangga ka gid ni Jehova. Ginhalad niya ang iya pinalangga nga Anak kag ginbatas niya ang grabe nga kasakit para luwason ka sa sala kag kamatayon. (1 Juan 4:​9, 10) Gusto gid niya buligan ang kada isa sa aton para maalagad naton sia subong bisan pa makasasala kita, kag dulaon niya ang sala sa palaabuton.

15. Ano ang dapat naton himuon para makabenepisyo kita sa regalo sang Dios nga halad-gawad ni Jesus?

¹⁵ Paagi sa regalo sang Dios nga halad-gawad sang iya bugtong nga Anak, nangin posible nga mapatawad ang aton mga sala. Pero para mapatawad kita sang Dios, may dapat kita himuon. Ano ina? Ginsabat ini ni Juan nga Manugbawtismo, kag ginsiling man ini ni Jesucristo sang ulihi: “Maghinulsol kamo, kay ang Ginharian sang langit malapit na.” (Mat. 3:​1, 2; 4:17) Gani dapat kita maghinulsol para mapatawad ang aton mga sala kag para mangin suod kita sa aton mahigugmaon nga Amay. Pero ano ang nalakip sa paghinulsol, kag paano makabulig ang paghinulsol para malipay sa aton si Jehova bisan pa makasasala kita? Sabton ini sa masunod nga artikulo.