“Hamili Gid Ikaw”

1-2. Ano ang makabulig sa aton nga makumbinsi nga palangga kita ni Jehova?

PALANGGA gid ni Jehova ang iya mga alagad. Pero may pila sa ila nga indi kumbinsido sa sini. Ngaa? Posible ginpabatyag sa ila sang iban nga wala sila sing pulos ukon indi sila importante. Amo bala sina ang imo ginabatyag? Kon huo, ano ang makabulig sa imo nga makumbinsi nga palangga ka ni Jehova?

² Puede mo basahon ang mga kasaysayan sa Biblia nga nagapakita kon ano ang pagtan-aw ni Jehova sa mga tawo. Sa bahin sang iya Anak nga si Jesus, ginpabatyag niya sa mga tawo nga ginarespeto niya sila kag ginpakitaan niya sila sang kaayo. Paagi sini, ginpakita niya nga ginapabaloran gid niya kag sang iya Amay ang mga tawo nga nagabatyag nga wala sila sing pulos. (Juan 5:19; Heb. 1:3) Sa sini nga artikulo, binagbinagon naton: (1) kon paano ginbuligan ni Jesus ang mga tawo nga makumbinsi nga palangga sila ni Jehova kag (2) kon paano naton makumbinsi ang aton kaugalingon nga palangga gid kita sang Dios.—Hag. 2:7.

GINBULIGAN NI JESUS ANG MGA TAWO NGA MAKUMBINSI NGA IMPORTANTE SILA

3. Paano gintratar ni Jesus ang mga taga-Galilea nga nangayo sa iya sang bulig?

³ Sang nagabantala si Jesus sa Galilea, madamo nga tawo ang nagakadto sa iya para mamati sa iya kag para ayuhon niya. Nagsiling si Jesus nga “ginpanitan sila kag nag-alaplaag kaangay sang mga karnero nga wala sing manugbantay.” (Mat. 9:36) Para sa mga lider sang relihion, indi salapakon ini nga mga tawo kag “ginapakamalaut sila sang Dios.” (Juan 7:47-49) Pero ginpabatyag sa ila ni Jesus nga importante sila paagi sa pagtudlo kag pag-ayo sa ila. (Mat. 9:35) Kag para madamo pa gid sia sing mabuligan, ginhanas niya ang iya mga apostoles nga magbantala kag ginsilingan niya sila nga ayuhon ang mga masakiton.—Mat. 10:5-8.

4. Ano ang matun-an naton sa pagtratar ni Jesus sa mga tawo nga ginapakanubo sang iban?

⁴ Ginpabatyag ni Jesus sa mga tawo nga ginarespeto niya sila kag ginpakitaan niya sila sang kaayo. Matun-an naton sa sini nga palangga niya kag sang iya Amay ang mga tawo nga ginapakanubo sang iban. Kon nagaalagad ka kay Jehova pero nagaduhaduha ka kon bala palangga ka gid niya, hunahunaa kon paano gintratar ni Jesus ang mga tawo nga gusto magtuon sa iya. Kon himuon mo ini, makumbinsi ka nga palangga ka gid ni Jehova.

5. Ano ang sitwasyon sang isa ka babayi sa Galilea sang nagbantala didto si Jesus?

⁵ Magluwas nga gintudluan ni Jesus ang madamo nga tawo, ginbuligan man niya ang mga indibiduwal. Halimbawa, sang nagbantala si Jesus sa Galilea, may isa ka babayi didto nga ginatagasan sing dugo sa sulod sang 12 ka tuig. (Mar. 5:25) Suno sa Kasuguan, indi sia matinlo. Gani, mangin indi man matinlo ang bisan sin-o nga makatandog sa iya. Bangod sini, posible gid nga nagaisahanon lang sia pirme. Indi man sia makaupod sa iban para magsimba kay Jehova sa sinagoga ukon sa tion sang mga kapiestahan. (Lev. 15:19, 25) Gani magluwas nga nagamasakit sia, posible gid nga nagbatyag sia nga wala sing may nagapalangga sa iya.—Mar. 5:26.

6. Ano ang ginhimo sang babayi para mag-ayo sia?

⁶ Grabe gid ang pag-antos sini nga babayi kag gusto kuntani niya nga ayuhon sia ni Jesus. Pero wala niya direkta nga ginpangabay si Jesus nga ayuhon sia. Ngaa? Posible nahuya sia bangod sa iya balatian. Ukon posible nakulbaan sia kay basi akigan sia ni Jesus kay nagpalapit sia sa madamo nga tawo bisan pa indi sia matinlo. Gani gintandog lang niya ang bayo ni Jesus kay sigurado sia nga magaayo sia kon himuon niya ini. (Mar. 5:27, 28) Bangod sa iya mabakod nga pagtuo, nag-ayo sia sa iya balatian. Sang namangkot si Jesus kon sin-o ang nagtandog sa iya, gin-aku sang babayi ang iya ginhimo. Paano sia gintratar ni Jesus?

7. Paano gintratar ni Jesus ang nagaantos nga babayi? (Marcos 5:34)

⁷ Ginpabatyag ni Jesus sa babayi nga ginarespeto niya sia kag ginpakitaan niya sia sang kaayo. Natalupangdan ni Jesus nga “nagakurog sa kahadlok” ang babayi. (Mar. 5:33) Naintiendihan ni Jesus ang iya ginabatyag, gani ginpaumpawan niya sia. Gintawag pa gani sia ni Jesus nga “anak.” Paagi sini, ginpabatyag sa iya ni Jesus nga palangga niya sia. (Basaha ang Marcos 5:34.) Amo lang ini ang rekord sa Biblia nga gintawag ni Jesus ang isa ka babayi nga “anak.” Posible gingamit niya ini nga tinaga kay nakita niya nga nahadlok gid ang babayi. Sigurado nga naumpawan gid sa sini ang babayi. Kon gin-akigan ni Jesus ang babayi, posible gid nga konsiensiahon ang babayi bisan pa nga nag-ayo sia. Gani magluwas nga gusto ni Jesus nga ayuhon sia, gusto man niya nga makumbinsi ang babayi nga hamili gid sia nga anak sang aton Amay sa langit.

8. Ano nga mga kabudlayan ang naeksperiensiahan sang isa ka sister sa Brazil?

⁸ Subong, nagabatyag man ang pila ka alagad sang Dios nga wala sila sing pulos bangod sa ila balatian ukon sitwasyon. Binagbinaga si Mariaa nga isa ka regular payunir sa Brazil. Sang natawo sia, wala sia sing mga tiil kag tuo lang ang iya kamot. Nagsiling sia: “Pirme ako gina-bully sa eskwelahan bangod sa akon diperensia sa lawas. Nasakitan gid ako sa mga ginatawag nila sa akon. Kag may mga tion pa gani nga ginapabatyag sa akon sang akon pamilya nga wala ako sing pulos.”

9. Ano ang nakabulig kay Maria nga makumbinsi nga hamili sia kay Jehova?

⁹ Ano ang nakabulig kay Maria? Sang nangin isa sia ka Saksi ni Jehova, ginpaumpawan sia sang mga kauturan kag ginbuligan nila sia nga tan-awon ang iya kaugalingon suno sa pagtan-aw sa iya ni Jehova. Nagsiling sia: “Madamo gid nga kauturan ang nagbulig sa akon. Nagapasalamat gid ako kay Jehova kay ginhatagan niya ako sang mahigugmaon nga pamilya paagi sa kongregasyon.” Ginbuligan si Maria sang iya mga kauturan nga makumbinsi nga hamili sia sa panulok sang Dios.

10. Ano nga mga problema ang nagpaantos kay Maria Magdalena? (Tan-awa man ang mga piktyur.)

¹⁰ Binagbinaga kon paano ginbuligan ni Jesus si Maria Magdalena nga ginsudlan sang pito ka demonyo. (Luc. 8:2) Bangod sa impluwensia sang mga demonyo, posible nga daw nagbuang sia. Gani, ginlikawan sia sang mga tawo. Posible nga nagbatyag sia nga wala sing may nagapalangga sa iya kag wala sing may makabulig sa iya. Grabe gid kabudlay sang iya sitwasyon. Gani ginpagua ni Jesus ang mga demonyo nga nagsulod kay Maria Magdalena, kag nangin matutom niya sia nga sumulunod. Paano pa gid ginbuligan ni Jesus si Maria Magdalena nga makumbinsi nga hamili sia sa Dios?

11. Paano ginpakita ni Jesus kay Maria Magdalena nga hamili sia sa Dios? (Tan-awa man ang mga piktyur.)

¹¹ Gin-upod ni Jesus si Maria Magdalena sa iya pagministeryo.b Gani, nabatian niya ang gintudlo ni Jesus sa mga tawo. Nagpakita man sa iya si Jesus sang adlaw nga ginbanhaw si Jesus. Sia ang isa sa pinakauna nga disipulo nga gin-istorya ni Jesus sadto nga adlaw. Ginsugo pa gani sia ni Jesus nga pabal-on ang iya mga apostoles nga nabanhaw na sia. Paagi sa mga ginhimo ni Jesus, ginpakita niya kay Maria Magdalena nga hamili gid sia kay Jehova.—Juan 20:11-18.

12. Ngaa nagbatyag si Lidia nga wala sing may nagapalangga sa iya?

¹² Pareho kay Maria Magdalena, madamo man subong ang nagabatyag nga wala sing may nagapalangga sa ila. Binagbinaga si Lidia nga isa ka sister sa Spain. Suno sa iya, gusto kuntani sang iya iloy nga ipahulog sia. Kag sang gamay pa sia, madumduman niya nga ginapabay-an lang sia sang iya iloy kag pirme sia ginabuyayaw. Nagsiling si Lidia: “Nagalaum ako nga palanggaon man kuntani ako sang iban nga tawo kag pilion man nila ako nga abyan. Pero nahunahuna ko nga bisan ano pa ang himuon ko, wala gid sing may magapalangga sa akon kay ginpabatyag sa akon sang akon iloy nga malain ako nga tawo.”

13. Ano ang nakabulig kay Lidia para maintiendihan niya nga hamili sia kay Jehova?

¹³ Sang natun-an ni Lidia ang kamatuoran, nagbag-o ang iya pagtamod sa iya kaugalingon. Paagi sa pagpangamuyo niya kay Jehova, pagtuon niya sang Biblia, kag kaayo nga ginpakita sa iya sang mga kauturan, naintiendihan niya nga hamili sia kay Jehova. Nagsiling sia: “Pirme ako ginasilingan sang akon bana nga palangga gid niya ako. Pirme man niya ginapahanumdom sa akon ang akon maayo nga mga kinaiya. Amo man sini ang ginahimo sa akon sang akon mga abyan.” May kilala ka bala nga utod nga nagakinahanglan sang bulig para maintiendihan niya nga hamili gid sia kay Jehova?

KON PAANO NATON MAILOG ANG PAGTAN-AW SA ATON NI JEHOVA

14. Suno sa 1 Samuel 16:7, ano ang ginatan-aw sa aton ni Jehova? (Tan-awa man ang kahon nga “Ngaa Ginapabaloran ni Jehova ang Iya Katawhan?”)

¹⁴ Dumduma nga indi pareho sa pagtan-aw sang kalibutan ang pagtan-aw sa imo ni Jehova. (Basaha ang 1 Samuel 16:7.) Para sa madamo nga tawo sa kalibutan, nagadepende sa hitsura, kuarta, kag tinapusan sang isa ka tawo ang iya balor. Pero indi amo sina ang ginabasihan ni Jehova kon ginatan-aw ka niya. (Isa. 55:8, 9) Gani panikasugi nga iluga ang pagtan-aw sa imo ni Jehova, indi ang pagtan-aw sa imo sang kalibutan. Puede mo basahon ang kasaysayan sang mga karakter sa Biblia nga nagbatyag nga wala sila sing pulos, pareho kay Elias, Noemi, kag Hana. Dayon binagbinaga kon paano ginpakita ni Jehova nga palangga niya sila. Puede mo man isulat ang imo mga eksperiensia nga nagapamatuod nga palangga ka gid ni Jehova kag ginapabaloran ka niya. Kag kon nagabatyag ka nga wala ka sing pulos, puede mo tun-an sa aton mga publikasyon ang parte sa sini nga topiko.c

15. Ngaa “hamili gid” si Daniel kay Jehova? (Daniel 9:23)

¹⁵ Mangin kumbinsido nga hamili ka kay Jehova bangod matutom ka sa iya. Isa ka bes, sang posible lapit na mag-100 ang edad ni manalagna Daniel, nabatyagan niya nga “kapoy na gid” sia kag nagluya ang iya buot. (Dan. 9:20, 21) Paano sia ginpalig-on ni Jehova? Ginpadala niya ang anghel nga si Gabriel para ipahanumdom kay Daniel nga ‘hamili gid sia’ kag ginpamatian ang iya mga pangamuyo. (Basaha ang Daniel 9:23.) Ngaa hamili gid si Daniel sa Dios? Bangod sa iya madamo nga maayo nga mga kinaiya, ilabi na ang iya pagpabalor sa pagkamatarong kag ang iya katutom. (Ezeq. 14:14) Ginpasulat ni Jehova sa Biblia ini nga kasaysayan para pabakuron kita. (Roma 15:4) Gani makasalig ka nga bangod ginahimo mo ang husto kag matutom ka kay Jehova, hamili ka sa iya kag ginapamatian man niya ang imo mga pangamuyo.—Miq. 6:8, mga footnote; Heb. 6:10.

16. Ano ang puede mo himuon para tamdon mo si Jehova bilang isa ka mahigugmaon nga Amay?

¹⁶ Tamda si Jehova bilang isa ka Amay nga nagapalangga sa imo. Wala niya ginabantayan ang imo mga sala, kundi gusto niya nga buligan ka. (Sal. 130:3; Mat. 7:11; Luc. 12:6, 7) Madamo nga nagabatyag nga wala sila sing pulos ang napabakod sa sini nga kamatuoran. Binagbinaga si Michelle nga isa ka sister sa Spain. Pamatyag niya wala sing may nagapalangga sa iya kag wala sia sing pulos bangod sa madamo nga tinuig nga pagpakanubo sa iya sang iya bana. Nagsiling sia, “Sa kada tion nga makabatyag ako nga wala ako sing pulos, ginaimadyin ko nga ginakungkong ako ni Jehova para proteksionan ako kag para ipabatyag sa akon nga palangga niya ako.” (Sal. 28:9) Binagbinaga man si Lauren nga isa ka sister sa South Africa. Ginasilingan niya ang iya kaugalingon, “Bangod ginbuyok ako ni Jehova paagi sa pisi sang gugma, bangod ginbuligan niya ako nga mangin suod sa iya sa sulod sang madamo na nga tinuig, kag bangod gingamit niya ako para tudluan ang iban, sigurado gid nga may balor ako kag importante ako sa iya.”—Os. 11:4.

17. Paano mo mabal-an nga nahamuot sa imo si Jehova? (Salmo 5:12) (Tan-awa man ang piktyur.)

¹⁷ Mangin kumbinsido nga nahamuot sa imo si Jehova. (Basaha ang Salmo 5:12.) Ginkumparar ni David ang kahamuot ni Jehova sa “daku nga taming” nga nagaamlig sa matarong nga mga tawo. Kon kumbinsido ka nga nahamuot sa imo si Jehova kag buligan ka niya, makaamlig ini sa imo kon makabatyag ka nga wala ka sing pulos. Paano mo mabal-an nga nahamuot sa imo si Jehova? Paagi sa Biblia, ginasugid ni Jehova nga nahamuot sia sa aton. Kag ginagamit man niya ang mga gulang, ang aton suod nga mga abyan, kag ang iban pa para ipahanumdom sa aton nga hamili kita sa iya. Ano ang dapat mo himuon kon palig-unon ka sang iban?

18. Ngaa dapat mo batunon ang mga komendasyon sang iban?

¹⁸ Kon komendahan ka sang imo mga kilala kag sang mga nagapalangga sa imo, indi paghunahunaa nga indi husto ang pagtan-aw nila sa imo. Dumduma nga posible ginagamit sila ni Jehova para buligan ka nga mangin kumbinsido nga nahamuot sia sa imo. Si Michelle, nga ginsambit kaina, nagsiling: “Amat-amat ko nga nakumbinsi ang akon kaugalingon nga husto ang mga komendasyon sang iban parte sa akon. Nabudlayan ako nga magpati nga may maayo sila nga nakita sa akon, pero kabalo ’ko nga gusto ni Jehova nga patihan ko sila.” Ginbuligan man si Michelle sang mahigugmaon nga mga gulang nga makumbinsi nga nahamuot sa iya si Jehova. Subong, isa na sia ka payunir kag remote volunteer sa Bethel.

19. Ngaa makasalig ka nga hamili ka sa Dios?

¹⁹ Ginapahanumdom sa aton ni Jesus nga importante gid kita sa aton Amay sa langit. (Luc. 12:24) Gani makasalig kita nga hamili kita kay Jehova. Kabay nga dumdumon gid naton ini pirme. Kag kabay nga himuon naton ang aton bug-os nga masarangan para buligan ang iban nga makumbinsi nga hamili gid sila sa Dios.