PAMANGKOT SANG MGA PAMATAN-ON

Importante Gid Bala nga Mangin Sikat Ka Online?

Ang isa ka tin-edyer nga si Elaine nagsiling: “Sang nakita ko nga ginatos ka tawo ang naga-follow sa akon mga schoolmate, sa pensar ko, ‘Wow, sikat gid sila ba!’ Sa tuod lang, daw nahisa ako sa ila.”

Nabatyagan mo man bala ini? Kon huo, mabuligan ka sini nga artikulo nga malikawan ang mga problema sang mga tawo nga gusto mangin sikat online.

Ano ang mga katalagman?

Sa Hulubaton 22:1, ang Biblia nagsiling nga “ang maayo nga ngalan mas maayo nga pilion sangsa madamo nga manggad.” Gani natural lang nga gusto naton nga maayo ang pagtan-aw sang iban sa aton, kag gusto naton nga magustuhan nila kita.

Pero kon kaisa, puede ini masobrahan. Amo nga gusto na naton nga mangin sikat na. Delikado bala ini? Huo. Amo ini ang ginsiling ni Onya nga 16 anyos:

“Madamo ako sing nakita nga mga tawo nga nagahimo sing binuang nga mga butang—pareho sang paglumpat halin sa second floor sa amon eskwelahan—para lang mangin sikat.”

Para mangin sikat sa pareho nila nga mga tin-edyer, gina-videohan sang iban ang ila kaugalingon nga nagahimo sang delikado nga mga stunt kag gina-post ini. Halimbawa, may mga tin-edyer nga nag-upload sang mga video nga nagakaon sila sang labada nga habon, nga indi gid dapat paghimuon!

Ang Biblia nagasiling: “Indi kamo . . . magpadayawdayaw sa inyo mga ginahimo.”—Filipos 2:3, Maayong Balita nga Biblia.

Pamensari ini:

Daw ano ka importante sa imo nga mangin sikat online?
Handa mo bala nga himuon ang tanan para mangin sikat ka kag magustuhan sang pareho mo nga tin-edyer bisan pa mahalitan sini ang imo panglawas ukon kabuhi?

Ang ginasiling sang iban

“Delikado gid ang handum nga mangin sikat, kay ginahimo sang iban ang tanan para lang mangin sikat sila. Abi nila kon maghambal sila, magpamayo, ukon maghulag sa isa ka paagi—bisan online—mangin sikat sila. Wala gid sing pulos kon isakripisyo mo ang imo mga pagpati kag mga prinsipio para lang mangin sikat ka.”—Leianna.

‘Sikat, pero indi man’

Indi lang delikado nga butang ang ginahimo sang iban para mangin sikat. Ginsugid ni Erica, nga 22 anyos, kon ano ang ginahimo sang iban:

“May mga tawo nga naga-post sang madamo nga piktyur parte sa ila kabuhi, para maggua nga madamo sila sing close friend nga pirme nila upod. Gani nagapensar ang iban nga daw kasikat gid sa ila. Pero ang tuod, indi man.”

Si Cara nga 15 anyos nagsiling nga nagabinutig ang iban para paguaon nga sikat sila:

“May kilala ako nga mga tawo nga ara man lang gani sa ila balay, pero ginapagua nila sa ila mga piktyur nga daw ara sila sa party.”

Gin-aku ni Matthew, nga 22 anyos, nga ginhimo niya man ina:

“May gin-post ako nga piktyur kag Mt. Everest ang gin-tag ko nga lugar, bisan wala pa ’ko gani kakadto sa Asia!”

Ang Biblia nagasiling: “Luyag namon magkabuhi sing bunayag [ukon honest] sa tanan nga butang.”—Hebreo 13:18.

Pamensari ini:

Kon nagagamit ka sang social media, may gin-post ka na bala nga indi matuod para lang mangin sikat ka sa iban?
Makita bala sa mga piktyur kag mga comment nga gina-post mo kon sin-o ka gid kag kon ano ang imo ginapatihan?

Ang ginasiling sang iban

“Ginahimo sang iban ang bisan ano para madamo ang mag-like sa ila. Pero gusto mo bala nga makilala ka nga nagahambal kag nagapamayo sing indi maayo ukon nagapakitakita sang imo mga gamit? Ukon gusto mo bala nga makilal-an ka sa imo maayo nga pamatasan ukon sa imo pag-ulikid sa iban? Kanami batyagon nga nanamian ang iban sa imo, pero siguraduha nga gusto ka nila bangod sa maayo nga mga rason.”—Hannah.

Importante gid bala ang mga follower kag mga like?

Madamo ang nagapati nga para mangin sikat ka online, dapat madamo gid ang naga-follow sa imo kag naga-like sang imo mga post. Si Matthew, nga ginsambit kaina, nagsiling nga amo man sina ang ginabatyag niya sadto:

“Ginapamangkot ko ang iban, ‘Pila na ang imo follower?’ ukon ‘Pila ang pinakadamo nga nag-like sa imo?’ Para magdamo ang akon follower, gina-follow ko bisan ang indi ko kilala kay basi pa lang i-follow man ’ko nila. Gusto ko mangin sikat, kag nadugangan pa gid ’ni sang naggamit ako sang social media.”

Mga piktyur: 1. Tin-edyer nga nagatan-aw sa kadamuon sang nag-like sa iya page sa social media kag nagayuhum. 2. Ang amo gihapon nga tin-edyer nga nagakaon sang dulse. 3. Ginahikap sang tin-edyer ang iya tiyan kag daw indi maayo ang iya pamatyag. — Ang mangin sikat online pareho sa pagkaon sing junk food—nag-enjoy ka pero makadali lang, kay sa tuod lang gutom ka man gihapon

Natalupangdan ni Maria, nga 25 anyos, nga ang pagtan-aw sang iban sa ila kaugalingon nagadepende sa kadamuon sang ila follower kag sa mga naga-like sa ila:

“Kon diutay lang ang nag-like sa selfie sang isa ka babayi, mahimo niya pensaron nga law-ay sia. Kag siempre indi ’na tuod pero amo na sina ang pagpati sang kalabanan. Daw pareho lang nga sila mismo ang naga-bully sa ila kaugalingon.”

Ang Biblia nagasiling: “Indi kita magpabugal sang aton kaugalingon, nga ginahalinan sang paindisanay kag paghinisaay.”—Galacia 5:26.

Pamensari ini:

Kon nagagamit ka sang social media, natalupangdan mo bala nga ginakumparar mo na ang imo kaugalingon sa iban?
Mas importante bala sa imo ang kadamuon sang imo follower sangsa magpangita sing matuod nga mga abyan nga nagaulikid sa imo?

Ang ginasiling sang iban

“Para mangin sikat online, dapat mangin pareho ka sa mga tawo nga ginadayaw sang iban. Buot silingon nga sundon mo ang ila mga ginahimo. Gani, basi pensaron mo na lang pirme kon ano ang pagtan-aw nila sa imo kag kon ano ang himuon mo para manamian sila sa imo. Normal lang nga gusto mo nga manamian ang iban sa imo. Pero kon dira ka na lang nagapokus, kabuangan na ina.”—Joshua.

Likawi ang “pasimple lang nga pagpabugal”

Natalupangdan mo bala nga may mga tawo nga kuno abi nagareklamo pero ang tuod gusto lang nila ipabugal ang ila nahimo?

“Sang nagbakal ako sang bag-o nga salakyan, kailinit kay damo sang gusto magsakay!”
“Gaugtas ’ko kay damo ang nagamuno nga angayan ’ko kay nagniwang ako!”

May mga tawo nga nagareklamo para indi bal-anon nga nagapabugal sila.

Paandam: Ini nga klase sang pagpabugal indi gid maayo ang resulta bangod indi mo man mainto ang mga tawo. Kag bangod bal-an sang mga tawo nga ginahambal mo ini para magpabugal, mas mainit pa gid sila sa imo kay mas gusto nila nga magpabugal ka na lang sangsa magpabatibati ka pa.

Sa sunod nga mag-comment ka ukon mag-post sang piktyur sa social media, likawi ang pasimple nga pagpabugal. Sunda ang laygay sang Biblia: “Pabay-i nga iban ang magdayaw sa imo, kag indi ang imo baba.”—Hulubaton 27:2.