Paggamit sang mga Literature Cart “Subong Panaksi sa Tanan nga Pungsod”

Sa sulod sang sobra na pulo ka tuig, nangin bahin na sang aton pagministeryo ang mga literature cart para makuha ang atension sang mga tawo. Sa bilog nga kalibutan, pamilyar na ang mga tawo sa sini nga mga cart. Ang desinyo sini manami kag mahapos man ini gamiton. Posible nga ugyon ka kay Asenata, nga isa ka sister sa Poland, nga nagsiling: “Simple lang ang desinyo sang mga cart, pero kanami gid sini. Mahapos ini gamiton kag saylusayluhon.”

Napensaran mo bala kon paano gindesinyo kag ginhimo ang mga cart?

Isa ka Manami nga Desinyo

Sang 2001, nagpasugot ang Nagadumala nga Hubon nga testingan sang aton mga kauturan sa France ang sarisari nga paagi sang public witnessing, lakip ang paggamit sang mga cart. Sang primero, sarisari ang desinyo sang ila cart. Halimbawa, naggamit sila sang mga maleta kag mga cart nga pang-grocery para may butangan sila kag maka-display sang mga literatura. Sang ulihi, ang branch sa France nagpili sang desinyo nga gamiton sang tanan, kag amo ini ang gingamit sang mga manugbantala sa sulod sang madamo nga tinuig.

Nalipay ang mga kauturan sa France sa resulta sang ila gintestingan nga mga pamaagi sa pag-public witnessing. Gani sang 2011, gin-aprobahan sang Nagadumala nga Hubon ang isa ka bag-o nga programa sang public witnessing sa New York City, U.S.A., paagi sa paggamit sang mga cart kag mga lamesa. Narealisar sang mga payunir nga nagpartisipar sa sini nga programa nga madamo sing bentaha ang mga cart, lakip na nga puede ini masaylosaylo. Naghatag man sang suhestyon ang mga payunir kon paano mapanami ang desinyo sang mga cart. Ang una nga mga cart nga human sa kahoy mabug-at, gani mabudlay ini ipasaka kag ipanaug sa mga hagdanan. Gani naghimo sila sang mas mamag-an nga cart, pero dapat indi man ini mapalid sang hangin. Ining bag-o nga desinyo ginbutangan man sang mas dalagku kag mas shock-absorbent nga mga karito, para mas mahapos ini guyuron sa batsihon nga dalan. May gamay man ini nga box sa likod para butangan sang dugang nga literatura.

Nangin madinalag-on ining bag-o nga programa! Gani sang 2012, gin-aprobahan sang Nagadumala nga Hubon nga gamiton ang mga literature cart sa bilog nga kalibutan. Nakakita ang mga kauturan sang manufacturer nga makahimo sang madamo sining mamag-an pero mapag-on nga mga cart.

Sa sulod sang mga tinuig, may gamay nga mga pagbag-o nga ginhimo sa mga cart. Halimbawa, sang 2015, ginbutangan ini sang plastik nga kober sa atubangan. Si Diana, nga nagaistar sa Georgia, nanamian gid sa sini. Sia nagsiling, “Ang cart may kaugalingon nga ‘raincoat’ para indi mabasa ang mga publikasyon.” Sang 2017, nangin available sa pila ka lenguahe ang magnetic poster. Si Tomasz, nga isa ka brother sa Poland, nagsiling: “Kabudlay islan sang una nga mga poster nga ginapatapik, gani nami gid nga ideya ang magnetic poster.” Sang 2019, may gindugang pa nga mga pagbag-o sa materyales kag sa paghimo sang mga cart para mangin mas mapag-on pa gid ini.

Ang Paghimo sang mga Literature Cart

Isa lang ka manufacturer ang nagahimo sang tanan nga literature cart kag ginapadala ini dayon sa mga kongregasyon sa bilog nga kalibutan. Subong, ang isa ka cart nagabili sang $43 U.S., wala labot sa shipping kag iban pa nga gasto. Asta sa sini nga report, sobra na $16 million U.S. ang nagasto para sa mga cart, kag sobra 420,000 ang napadala na sa mga kongregasyon sa bilog nga kalibutan.

Para magamit sing maayo ang mga donasyon, ginatingob ang pag-order sang mga cart. Dugang pa, ang mga kongregasyon subong puede na makaorder sang spare parts, para makay-o nila ang cart imbes nga islan gid ini.

Paggamit sang mga Cart sa Pagpanaksi

Ang mga manugbantala sa bilog nga kalibutan nanamian gid maggamit sang mga literature cart. Si Martina, nga taga-Ghana, nagsiling: “Sa kalabanan nga paagi sang aton pagministeryo, kita ang nagapalapit sa mga tawo. Pero kanami kon naga-cart kay ang mga tawo ang nagapalapit sa aton. Mapanaksihan naton bisan ang mga nagalabay lang.”

Sa isa pa ka pungsod sa Africa, ang isa ka tawo nagpalapit sa cart kag nagkuha sang mga publikasyon sa iya lenguahe. Nagbalik sia pagkadason nga semana kag nagsiling: “Nabasa ko na ang tanan nga literatura. Importante gid ini, gani isugid ko ini sa akon pamilya sa amon baryo.” Ang iya baryo mga 500 ka kilometro kalayo. Pagligad sang duha ka bulan, nagbalik sia kag nagsiling: “Nabasa na sang mga tawo sa amon baryo ang tanan nga literatura, kag nalipay gid sila sa ila nabasahan. Gusto nila mangin mga Saksi ni Jehova. Pero may mga pamangkot sila. Halimbawa, naintiendihan nila nga para mabawtismuhan sila, kinahanglan nga itum-oy sila sa tubig. Pero, wala sang suba nga malapit sa amon baryo. Kinahanglan bala nga magkadto gid kami diri para mabawtismuhan?” Ginpakilala sia sang mga kauturan sa isa ka payunir nga nagahambal sang iya lenguahe. Halin sadto, regular sila nga nagaistoryahanay parte sa Biblia.

Makalilipay gid nga makita ang mga literature cart nga ginagamit sa pagbantala “sa bug-os nga duta subong panaksi sa tanan nga pungsod.” (Mateo 24:14.) Sa diin nagahalin ang ginagasto para mahimo ini nga mga cart? Sa mga donasyon sa bilog kalibutan nga hilikuton, nga ang kalabanan sini ginahimo paagi sa donate.jw.org. Salamat gid sa imo kaalwan.