Ang Maayong Balita Suno kay Jesus—Kon Paano Ini Ginhimo

Sa sini nga tuig, ang isa sa mga ginpaabot gid sang mga Saksi ni Jehova amo nga matan-aw ang Episode 1 sang Ang Maayong Balita Suno kay Jesus. Minilyon na ang nakatan-aw sini. Kag amo ini ang una sa 18 ka episode! Paano ginhimo ining serye sang mga video, kag paano ka nakabulig?

Pag-atipan sa mga Cast kag Crew

Sa branch sa Australasia, diin ginahimo ang kalabanan nga bahin sang serye sang Maayong Balita, mga 50 asta 80 ka tawo ang ara sa set samtang gina-shooting ang kada eksena.a May pagkaon para sa panyaga, panyapon, kag snacks nga ginahatag sa tanan nga cast kag crew. Kag abanse ini nga ginahanda. “Nagabakal kami sang mga pagkaon sa sarisari nga mga supplier para makakuha kami sang maayo gid nga klase sang mga ingredients sa barato nga presyo,” siling ni Esther, nga naasayn sa Food Service Department. “Kag pirme namon gina-adjust ang amon mga recipe para masigurado nga wala sing may mausik nga pagkaon.” Kada adlaw, mga apat ka dolyarb kada tawo ang magasto namon sa pagkaon.

Indi lang pagkaon ang kinahanglan sang mga cast kag crew kundi proteksion man. Ngaa? Sa Australia, pirme gid mainit ang tiempo, gani kinahanglan gid maghalong sa ultraviolet radiation nga halin sa silak sang adlaw. Para mahaganhagan ang halit sini kag masarangan ang kainit, ang mapisan nga mga production assistant nag-set up sang mga tent kag mga cooling station. Ginasigurado man nila nga ang tanan may ara sang bastante nga sunscreen, mga payong, kag tubig. Si Kevin, nga naasayn sa Audio/Video Services, nagsiling: “Ang kalabanan sining mga production assistant mga commuter Bethelite. Nalipay gid sila kag mapainubuson nga ginahimo ang ila mga asaynment. Indi gid namon ini mahimo kon wala sila.”

Pag-shooting sa Iban nga Lugar

Para mangin tuodtuod tan-awon ang pila ka eksena, wala lang ini gina-shooting sa back lot sa branch office ukon sa studio kundi sa iban nga lugar. Para ma-shooting ang mga eksena sang panahon sang Biblia, dapat magbiyahe ang mga cast kag crew sa mga lugar nga wala sing mga linya sang kuryente, wala sang moderno nga mga bilding, kag indi sementado ang dalan. May nakaasayn man nga utod para maghimos, magdala, kag magtago sang mga costume, props, kag mga equipment sa lugar nga shootingan. Antes magsugod ang shooting, ginasigurado sang mga assistant production coordinator nga may ara sang mga generator, mainom nga tubig, kag matinlo nga mga CR. Ang mga cast kag crew nagadayon sa balay sang mga kauturan, sa mga trailer, ukon sa mga hotel ukon mga cabin.

Ang pag-shooting sa iban nga lugar magasto kag kinahanglan sang daku nga tion. Makapakapoy man ini sa tanan nga nagaobra sa project. Gani sang 2023, gin-aprobahan sang Nagadumala nga Hubon ang pagbakal sang 2.5 ka milyon ka dolyar nga video wall nga maka-display sang sarisari nga background nga nagapakita nga daw ara ka sa iban nga lugar. May mga video screen ini nga maka-display sang maathag gid nga mga piktyur, kag mga suga nga nagadungan sa kon ano ang makita sa mga screen nga daw gin-shooting gid ini sa iban nga lugar. Bangod sini, makakinot kita kay wala na kita naga-shooting sa iban nga lugar. Si Darren, nga miembro sang Branch Committee sa Australasia, nagsiling: “Ang pag-shooting gamit ang video wall nakabulig nga indi masyado makapoy ang mga cast kag puede pa ipasulit sing pila ka beses sang mga crew ang pila ka eksena. Halimbawa, kon mag-shooting sa gua sang studio, may pila lang kami ka minuto para maabtan ang sunset. Pero paagi sa video wall, mapakita namon ang sunset kag maka-shooting kami sing sulitsulit asta nga makuha gid namon ang insakto nga eksena.”

“Mas Labaw Gid ang Kalipay Sangsa mga Ginsakripisyo Ko”

Ginatos ka cast kag madamo pa nga crew ang kinahanglan sa kada episode sang serye sang Maayong Balita. Ano ang ila reaksion sa tanan nga pangabudlay sang mga kauturan para maatipan sila?

Si Amber, nga nagabiyahe sing sobra 700 ka kilometro halin sa iya balay sa Melbourne para makabulig sa project, nagsulat: “Sang nag-abot ’ko sa airport, gin-atipan gid ako sang mga utod sa Bethel. Madamo nga Bethelite ang nag-invite sa akon para mag-upod sa ila sa pagkaon ukon mag-tsa. Sa set, ginpabatyag gid sang tanan nga palangga nila ako, gani nangin komportable ako. Madamo gid ako sang nabaton nga pagpakamaayo. Mas labaw gid ang kalipay sangsa mga ginsakripisyo ko!”

Si Derek nga naasayn sa production team, nagsiling: “Madamo nga department ang nagbulig sa amon halin sang nagsugod ang project. Nagapasalamat gid ako sa mga kauturan nga naghatag sang ila tion, pagkabutang, kag kusog. Mainayuhon gid sila kag handa magbulig. Ginpakamaayo gid sila ni Jehova kag kami man. Kumbinsido gid ako nga importante para sa iya ang resulta sang amon nahimo kag pati man kon paano namon ini ginhimo.”

Salamat gid sa inyo pagsuporta sa sini nga serye sang video paagi sa inyo mga donasyon, lakip na ang mga gin-donate paagi sa donate.jw.org.