Mga Proyekto nga Makabulig sa mga Kauturan kag sa Planeta

Bilang mga Saksi ni Jehova, kabalo kita nga sa indi madugay, may himuon gid si Jehova nga Dios para kay-uhon ang halit nga ginhimo sang mga tawo sa aton duta. (Bugna 11:18) Pero, bisan pa nabal-an naton ini, ginahimo naton gihapon ang aton bug-os nga masarangan para atipanon ang aton planeta. Halimbawa, gindesinyo naton ang mga bilding nga ginagamit sa pag-alagad kay Jehova sa paagi nga indi makahalit sa palibot.

Ginapanikasugan naton nga mabuhinan ang malain nga epekto sa aton palibot paagi sa mga proyekto nga ginahimo naton. Ano ini nga mga proyekto? Kag paano ini makabulig sa aton nga magamit sing maayo ang mga donasyon?

Ang Ginhimo Para Mangin Mabugnaw ang Assembly Hall

Sang una, ang Matola Assembly Hall sa Mozambique gindesinyo nga wala sang dingding kag sin ang atop. Bangod sini, grabe gid kainit sa sulod sang auditorium. Ang isa ka brother nagsiling: “Grabe gid ang amon pamahulay bangod sa init! Kon matapos ang programa, ang mga kauturan nagagua dayon para makahaklo sang preska nga hangin kag para makapabugnaw.” Ano ang mahimo naton para mangin komportable ang mga kauturan sa Assembly Hall kag makapamati sila sing maayo?

Amo ini ang ginhimo naton: nag-install kita sang mga roof ventilator pati man sang insulator. Ang insulator nagabulig para mabuhinan ang init nga nagasulod sa auditorium, kag ang roof ventilator naman sigesige nga nagapasulod sang mabugnaw nga hangin. Indi kinahanglan sang kuryente para mag-andar ini nga mga ventilator, kay ginapatiyog ini sang hangin para mapagua ang init nga hangin sa sulod sang auditorium. Ang presyo sini nga mga ventilator mga $50 kada isa.a

Nakabulig gid ini nga proyekto para magbugnaw ang hangin sa Assembly Hall. Bangod nagatiyog ang hangin, wala nagakahumog ang bilding gani wala sing agup-op. Gani, mas madamo na nga oxygen ang nagasulod kag mabuhinan ang carbon dioxide. Bangod sini, mas komportable na ang mga naga-attend gani makapamati sila sing maayo. Ang brother nga ginsambit kaina nagsiling: “Subong, wala na kami dayon nagagua pagkatapos sang programa. Kundi, nagatener na kami sa auditorium sa tion sang panyaga kag nagapakig-istorya kami sa amon mga abyan. Bangod ginbutangan sang ventilator kag insulator ang amon atop, daw pareho lang nga nagapungko kami sa idalom sang daku nga kahoy!”

Pagkuha sang Enerhiya Halin sa Adlaw

Nag-install man kita sang mga photovoltaic (PV) system sa madamo naton nga mga pasilidad sa bilog nga kalibutan. Ini nga system nagagamit sang mga solar panel para i-convert ang silak sang adlaw nga mangin kuryente, kag ini nga enerhiya wala gid nagakaubos. Gani, wala na kita masyado nagadepende sa kuryente halin sa mga fossil fuel. Mas nabuhinan ang polusyon bangod sang PV system kag mas nakakinot pa kita sa donasyon.

Sang 2023, may gin-install nga PV system sa branch office sa Slovenia. Amo ini ang nagasuplay sa 30 porsiento sang enerhiya nga ginagamit sang bilding. Halimbawa kon may sobra nga kuryente sa PV system sang branch office, ang sobra nga enerhiya puede masuplay sa linya sang kuryente sa mga pumuluyo sa sina nga lugar. Ini nga PV system nagabili sang $360,000. Sa sulod sang apat ka tuig, ang kuarta nga nakinot naton bangod sang PV system mas daku pa sangsa kuarta nga gingasto naton para sa sini nga system.

Sang 2024, nag-install kita sang mga PV panel kag sang isa ka daku nga battery sa branch office sa Sri Lanka. Ina nga proyekto nagabili sang mga $3 ka milyon, kag nagasuplay ini sa 70 porsiento sang kuryente nga ginagamit sang branch. Sa sulod sang tatlo ka tuig, mas daku ang makinot naton nga kuarta sangsa aton gingasto sa sini nga mga panel. Sina man nga tuig, nag-install kita sang PV system sa branch office sa Netherlands. Ini nga system nagabili sang $1.1 ka milyon kag nagasuplay ini sa 35 porsiento sang kuryente nga ginagamit sang branch. Sa sulod sang siam ka tuig, mas daku ang makinot naton nga kuarta sangsa aton gingasto sa sini nga PV system.

Nag-install man kita sang mga PV system sa sarisari nga remote translation office (RTO) sa Mexico. Ari ang isa ka halimbawa: ang Tarahumara (Central) RTO makita sa Chihuahua. Kon winter, ang temperatura puede magnubo sa 0 degrees Celsius, kag kon summer, nagalab-ot ini sa sobra 40 degrees Celsius kon kaisa. Pero, bangod mahal ang bayad sa kuryente didto, wala na lang nagagamit sang heating kag cooling system ang mga kauturan. Ang isa ka brother nga si Jonathan, nga nagaalagad sa RTO, nagsiling: “Nagapanghabol kami kag nagasuksok sang madamol nga mga bayo kon winter kag ginabuksan namon ang mga bintana kon summer.”

Sang 2024, may PV system nga gin-install sa RTO. Ini nga system nagabili sing $21,480, pero sa sulod sang lima ka tuig, mas daku ang makinot naton nga kuarta sangsa aton gingasto sa sini nga system. Subong, puede na makagamit ang aton mga kauturan sang heating kag cooling system kon kinahanglanon nila. Si Jonathan nagsiling: “Mas na-enjoy na namon ang amon asaynment, kag mas madamo nga obra ang amon mahimo. Kag nalipay man kami kay nabal-an namon nga ginagamit sing maayo sang RTO ang kuarta sang organisasyon kag sa paagi nga indi makahalit sa palibot.”

Paggamit sang Tubig-ulan

Sa Africa, ang pila ka Kingdom Hall wala sang makuhaan sang tubig. Gani, kinahanglan pa sang mga brother nga manag-ub sang tubig mga pila pa ka kilometro ang kalayuon pakadto sa ila Kingdom Hall. Sa iban nga mga lugar, ang mga kauturan kinahanglan magbakal sang tubig nga ginadeliber sang truck, pero mahal ini kag makahalit sa palibot.

Para may tubig ang aton mga kauturan, nag-install kita sang mga tarog kag sang dalagku nga mga tangke sang tubig sa madamo nga Kingdom Hall sa bilog nga Africa. Antes nila gin-install ang equipment, gintun-an anay nila ang tiempo kag klima sa sina nga mga lugar, para mabal-an nila ang pinakamaayo nga paagi sa pagsalod sang tubig sa mga Kingdom Hall. Ang mga tarog kag ang mga tangke nagabili sang $600 asta $3,000. Pero bangod sini, nabuhinan ang gasto sang mga Kingdom Hall kay indi na kinahanglan magbayad sang mga kauturan para sa tubig.

Daku gid ang nabenepisyo sang mga kauturan bangod sining gin-install nga tarog kag tangke. Ang isa ka sister sa Mozambique nagsiling: “Sang una, layo pa ang amon ginakuhaan sang tubig. Gani, kon mag-abot kami sa Kingdom Hall kapoy na kami. Kag bangod iwat ang tubig, mabudlay gid mangin matinlo sa pisikal. Pero subong, makapanghinaw na sang kamot ang tanan. Gani, ma-enjoy na namon ang miting sa Kingdom Hall nga indi kami kapoy. Madamo gid nga salamat!”

Diin nagahalin ang mga gingasto sa sini nga mga proyekto? Nagahalin ini sa mga donasyon para sa bilog kalibutan nga hilikuton, nga ang kalabanan ginahimo sa sarisari nga paagi nga makita sa donate.jw.org. Madamo gid nga salamat sa imo maalwan nga donasyon!