Ginabuligan Nila ang Kabataan sa Pagbasa
ANG pagbasa isa sang labing importante nga mga kalantip nga maton-an sang isa ka tawo, ginatukib ang madamo nga sahi sang ihibalo. Apang minilyon ka pamatan-on, nga nagahinguyang sing daku nga tion sa pagtan-aw sing telebisyon, ang napaslawan sa paghanas sini nga kalantip. Gani nawasi nila ang pagtuon sing madamo gid nga mapuslanon nga mga butang, lakip ang ihibalo tuhoy sa mga katuyoan sang Dios nga nagagikan sa pagbasa sing Biblia kag sing mga literatura sa Biblia. Apang paano matudloan sa pagbasa ang isa ka bata?
Ginalaragway sang isa ka Cristianong ginikanan sa Manitoba, Canada, ang mga resulta nga natigayon gikan sa paggamit sing publikasyon nga Ang Akon Libro sang mga Sugilanon sa Biblia upod sa album sang apat ka cassette tape sini nga libro. Ang ginikanan nagpaathag:
“Kuatro anyos si Peter. Ang iya magulang nga utod nga lalaki kag babayi nagaeskwela na kag sia lang ang nagakabilin sa balay. Kon makalakat na ang iya iban nga kabataan agod mag-eskwela, nagakadto dayon si Peter sa sala kag ginapatokar ang mga teyp sang My Book of Bible Stories. Sang primero ginaupdan ko sia, kag samtang ginabasa ang libro nga Bible Stories sa teyp ginatudlo ko ang mga tinaga sa pahina. Madali nga nakatuon si Peter. Wala madugay sia na lang nagamatomato sa paghimo sini. Ginpadayon ini tubtob nga nag-eskwela na sia sa kindergarten.
“Isa ka adlaw, sang kuatro anyos pa lang si Peter, gindala sang manunudlo ang bug-os nga klase sa paglakatlakat, kag gintudlo ni Peter sa manunudlo ang medyo malaba nga karatula. Ang manunudlo nagsiling, ‘Mabasa mo bala ang ginasiling sina?’ Gani ginbasa ni Peter ang bug-os nga karatula. Nakibot gid ang manunudlo. Sang makabalik na ang klase sa eskwelahan, nagkuha ang manunudlo sing libro sa librarya kag ginpapungko si Peter sa tupad niya. Ginbasa ni Pedro sa iya manunudlo ang pila ka sugilanon, kag natingala gid sia.
“Wala madugay naglapta ang balita sa iban pa nga mga manunudlo kag sang ulihi sa prinsipal sang eskwelahan. Gindala niya si Peter sa iya opisina kag ginpabasa sia. Didto man ang isa pa ka manunudlo. Ginpamangkot nila sia kon paano sia nakatuon sa pagbasa sing maayo. Nagsiling sia nga ginbuligan sia sang iya pamilya, apang ang labi nga nakabulig sa iya amo ang mga teyp sang Bible Stories.
“Sang ulihi, nabatian sang iban nga kabataan sa eskwelahan ang ikasarang ni Peter sa pagbasa kag ginakadtoan pa gani nila si Peter sa iya klase agod pabasahon sia, agod tan-awon kon matuod gid ang ila nabatian. Sang ulihi namat-od ang prinsipal nga pabasahon si Peter sa atubangan sang bug-os nga hubon sang mga estudyante sa awditoryom.
“Nahamuot gid ang prinsipal amo kon ngaa ginteleponohan niya ako. Nagsiling sia nga sa masami kon teleponohan niya ang mga ginikanan may ginasugid sia nga isa ka malain nga butang nga nahimo sang bata, apang sini nga tion sugiran niya kami kon daw ano kaayo magbasa si Peter kag ginapabugal gid nila sia. Nagsiling sia nga ang tingog ni Peter nagataas kag naganubo nga subong sang nagapakighambal kag wala gid nagapangalag-ag. Ginsugiran niya kami nga ginpamangkot niya si Peter kon paano sia nakatuon sa pagbasa kag ang labi nga ginpadunggan ni Peter amo ang mga teyp sang Bible Stories. Namangkot sia kon mabasa ni Peter ang bug-os nga libro sang Bible Stories, kag nagsiling ako: ‘Huo, mabasa niya.’
“Nian nangabay sia nga hulamon ang amon mga teyp agod hibaluon ang grado nga nibel sini. Isa ka semana sang ulihi nagtelepono sia kag nagsiling nga nahamuot gid sia sa mga teyp kag sa maayo nga pagbasa sini. Nangabay sia sing isa ka set sang mga teyp para sa iya kaugalingon bangod ipakita niya ini sa iya mga hinablos.”
May kilala ka bala nga isa ka bata nga makatuon sa pagbasa, ukon makapauswag sang ikasarang sa pagbasa, paagi sa pagpamati sa mga kasaysayan sang Biblia samtang nagasunod, sing letra por letra, sa publikasyon nga ginabasa? “Nalipay gid kami sa nabulig sa amon sang mga teyp,” sulat sang mag-asawa gikan sa Manitoba, Canada, “kag sa pagkamatuod ginarekomendar namon nga gamiton ini sang iban pa nga mga ginikanan.”