Kon San-o Madula ang Kanser
“Sa tuig 2100 ang mga pag-uswag sa sadsaran nga pagpanalawsaw sa biolohiya mahimo magatapna sa kanser sa paagi nga indi karon makita.”—The Causes of Cancer.
SUNO sa tagna sang Biblia, ang kanser madula sa dili madugay, kag sa pagkamatuod sa “paagi nga indi karon makita” sang mga manunulat sang ginbalikwat sa ibabaw nga libro. Ngaa ginasiling namon ini?
Bangod si Cristo Jesus, nga ginpadala sa duta sang nagligad nga 1,900 ka tuig, ginhatagan sing gahom sa pagpasag-uli sing kabuhi kag kapagros sa katawhan. Sa isa ka okasyon, bisan pa wala makita ang pasyente, gin-ayo niya ang alagad sang Romanong opisyal sa hangaway nga “nahamyang nga paralitiko sa balay, nga nagaantos sing tama gid.” (Mateo 8:5-13) Sa isa pa gid ka okasyon, gin-ayo niya ang ugangan nga babayi sang iya disipulo nga si Pedro, nga ginhilanat. Paano niya ginhimo ini? “Gintandog niya ang iya kamot, kag ang hilanat nagbiya sa iya, kag nagbangon sia.”—Mateo 8:14-17.
Ang pag-usisa sa ministeryo ni Jesus nagapakita nga gin-ayo niya ang nanuhaytuhay nga balatian sa mga tawo sang duha ka sekso kag sang nanuhaytuhay nga mga edad. Ginpasag-uli niya ang kapagros sang piang, kumpol, bulag, kag apa, sang kuyapon, paralitiko, sang babayi nga may tagas sang dugo, sang tawo nga may itos nga kamot, kag sang isa pa ka tawo nga bilbilon. Ginbanhaw man niya ang mga tawo gikan sa minatay. Paano niya ginhimo ini? Paagi bala sa pinasahi nga terapiya?
Sa kamatuoran, indi yadto hypnotherapy, psychotherapy, ukon iban pa nga sahi sang medikal nga paagi. Indi man yadto bangod sa personal nga kaalam, ihibalo, ukon gahom ni Jesus. Isa yadto ka milagruso nga pag-ayo gikan sa labaw sa tawo nga Tuburan. (Mateo 8:17; Isaias 53:4) Ang espiritu kag gahom sang iya Amay ang nagpahanabo sang pag-ayo. Apang, gin-aplikar yadto sa minoridad lamang sang mga balatianon sang adlaw ni Cristo, kag wala sini pagpunggi ang mga gin-ayo nga mapatay sa ulihi. Gani ano ang katuyoan sadto?
Ang pag-ayo nga ginhimo ni Jesus nagtudlo sa adlaw nga ang tanan matinumanon nga katawhan makabenepisyo gikan sa pagpasag-uli sang kapagros kag kabuhi nga dulot sang Dios. Sa amo ang makainspirar nga saad sang Biblia amo: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan [diri sa duta]. . . Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”—Bugna 21:3, 4.
Lakip sa nahaunang mga butang nga magataliwan amo ang kanser, upod ang mga kabangdanan sini. Sa idalom sang paggahom sang Ginharian nga pangulohan sang Dios paagi kay Cristo, ang makamamatay nga mga kabangdanan sa palibot madula. Ang makahalalit nga kahuol madula, kag ang immune system sang tawo magapanghikot suno sa gintuyo sa sini. Ang mapagros nga mga lawas magakooperar sa mapagros nga mga hunahuna, nga nasentro sa matuod espirituwal nga mga kinaiya.—Isaias 33:24; 35:5, 6.
Daw tuman bala ini kaayo tanan nga mangin matuod? Apang, suno sa Biblia, may garantiya kita sang Dios: “Kag ang Isa nga nagalingkod sa trono nagsiling: ‘Yari karon! Ginabag-o ko ang tanan nga butang. . . . Isulat ini, kay ining mga pulong matutom kag matuod.’” (Bugna 21:5) Amo ini ang buhi nga paglaum nga nagapabaskog sa mga Saksi ni Jehova nga nagabatas sang mga halit sang kanser, ang iban tubtob sa kamatayon. Nahibaloan nila nga si Jehova nga Dios nanaad sing “bag-ong mga langit kag bag-ong duta.”—Isaias 65:17, 18.