Pagpasayod—Daw Ano ka Kinahanglanon?

ANG asul nga pea­cock sa India hinali nga nagpabadlak sang iya matahom nga duag. Ang mga pakpak, nga mas malaba sa iya lawas sing lima ka pilo, nga nagainggat kag may daw mata nga mga marka, nagpaitaas gikan sa iya likod agod magtindog nga nagabadlakbadlak sa silak sang adlaw. Isa ka matahom gid nga talan-awon, hinayhinay sia nga nagaparada sa atubangan sang iya munga, ang pea­hen. Paano mapamatukan sang munga ang ginlaragway subong “amo ang labing matahom . . . nga pagpasayod sa kalibutan”? Ang pagpasayod lapnag sa kalibutan. Ang amon mga serye nagausisa sang motibasyon kag mga epekto sini suno sa nakita sang koresponsal sang Magmata! sa Britanya.

Ano gid ang pagpasayod? Amo ini ang pagpakilala sa isa ka butang. Sa kinaugali masami nga kinahanglanon ini para sa pagtipig kag sa pagpamuad sang kabuhi.

Ang nagauwang nga mga lobo, halimbawa, nagapasayod sang ila presensia agod malikawan ang indi kinahanglanon nga pagbangigay batok sa iban nga mga sapat samtang ang tagsatagsa nagapangita sing kalan-on. Ang babayi nga lamlok makamutik sang pila ka molekula sang pher­o­mone, isa ka kemikal nga sustansya, nga ginapaguwa madamo nga milya ang kalayuon sang lalaki nga lamlok nga nagapasayod sang pagpaliwat. Maalamon nga ginalikawan sang mga sapat nga manunukob ang mapula nga ulod, nga ang dalag kag itom nga mga gurayguray sini nagapasayod nga indi lamang ini malain sing sabor kundi makahililo pa.

Kamusta naman sa mga tawo? Nag-uswag kita kag ginnegosyo ang arte sa pagpasayod. Binagbinaga ang pila ka halimbawa.

Komersial nga Pagpasayod

Ang Egiptohanon nga papiro nga natukiban sa ­Thebes mahimo nga amo ang pinakadumaan nga komersial nga pagpasayod. Ginsulat sang nagligad nga tatlo ka libo ka tuig, ginpasayod sini ang padya sa pagpapanumbalik sa naglayas nga ulipon.

Ang publiko nga mga manugsinggit sang dumaan nga Gresya, nga sang ulihi kaanggid sa mga manugsinggit sa Europeanhon nga mga siudad, mga tawo nga nagapasayod, nga nagaganyat sing igtalupangod sa ila mga ginapasayod.

Sa Inglaterra sa panahon sang Edad Media, ang simbulo sang tatlo ka nagakabit nga bulawanon nga mga bola, nga ginsunod sa tsapa sang Italyano nga pamilya Medici sang mga manugkapital, nagpasayod sa mga manugpahulam sing kuwarta. Sa karon, ina gihapon nga tanda ginagamit sa pagpakilala sa prendahan.

Sang nagligad nga 250 ka tuig, si Dr. Sam­uel John­son sang London nagreklamo: “Sobra kadamo na karon sing mga pasayod amo kon ngaa wala na ini ginabasa. . . . Ang negosyo sa pagpasayod malapit na gid karon sa pagkahimpit amo kon ngaa indi mahapos magpanugda sing pag-uswag.” Apang sugod sadto, nagbalhin gid sing daku ang mga butang! Sang nagligad nga 50 ka tuig, ang negosyo nangin isa ka industriya.

Ang pagpasayod isa karon ka daku nga negosyo, tuman gid kadaku. Ang mga ­pamantalaan, mga bill­board, nagainggat nga mga pahina sang mga magasin, mga suga, mga komersial sa radyo kag sa telebisyon—nagakompetensiahanay tanan sa pagkuha sang aton igtalupangod paagi sa wala untat nga pagpanghaylo, kon kaisa prangka kag sa iban nga tion makatilingala nga tuso kag malalangon.

Ang matagsing nga bagrong sang moderno nga mga air­ship nagaganyat sa aton nga himutaran ang dalagku nagalinutaw nga mga pasayod. Ang diutay nga mga eroplano ginapakabitan sing mga eslogan samtang nagalupad sa kahanginan. Daw wala sing katapusan ang pagkananuhaytuhay! Apang kinahanglanon gid bala ini?

Paano nagapanghikot ang pagpasayod? Kon diutay lamang ini, kita bala nga mga bumalakal, magaayuhan—ukon magalain? Ano mahimo ang mangin papel sini sa aton kabuhi?

Sa aton adlaw-adlaw nga pagkabuhi, pirme kita ginapadayag sa mga pasayod. Sa telebisyon kag radyo, sa mga magasin kag mga pamantalaan, subong man sa iban pa nga paagi, ginatanyagan kita sing mga produkto kag mga serbisyo sang mga tawo nga nabalaka sa pagbaligya sini. Ano ang maayong mga punto kag malain nga mga punto sang pagpasayod? Paano ini tanan nagaapektar sa imo?