Gikan sa Amon mga Bumalasa
Pagpakigbagay sa Iban
Salamat sa inyo artikulo nga “Pamangkot sang mga Pamatan-on . . . Ngaa Mabudlay Makigbagay sa akon Utod nga Lalaki kag Utod nga Babayi?” (Hulyo 22, 1987) Disisies anyos ako, kag nabudlayan ako pirme sa akon mga utod nga babayi. Sang pila ka adlaw nga nagligad nag-away kami sang isa sa ila, kag daw luyag ko sia dumugon. Gindis-og ko sia apang nakontrol ko pa ang akon kaugalingon. Nahibaluan ko nga ang mga Cristiano indi dapat mag-away subong sang ginahimo namon. Ang inyo artikulo nakabulig sa akon nga mahangpan kon paano kontrolon ang kahimtangan kag huptan ang paghidait sa pamilya. Himuon ko ang tanan nga mahimo agod iaplikar ang mga panugda kag makaamot sa paghiusa sang amon pamilya.
R. A. G., Brazil
Ilahas nga Kasapatan sang Aprika
Naluyagan ko gid ang inyo mga artikulo tuhoy sa ilahas nga kasapatan sang Aprika. (Septiembre 22, 1987) Napakadlaw ako sang mga artikulo, kag kon kaisa nasubuan man ako sa terible nga pagpatay sa sining nanuhaytuhay nga mga sapat para sa negosyo. Salamat sa sining makapasanag nga mga kamatuoran nahanungod sa kon ano ang nagakahanabo sa mga sapat.
S. R., Virgin Islands
Yelo Para sa Sakit sang Ulo
Ginabasa ko ang inyo Septiembre 22, 1987, nga guwa kag nagsugod sa pagsakit ang akon ulo sa tapos mabasa ang “Pagbantay sa Kalibutan.” Ginbuksan ko ang pahina 31. Nagdugang pa ang sakit sang akon ulo, apang yadto didto ang artikulo nga “Kon Magsakit ang Imo Ulo” nga nagasugid kon paano ang nadugmok nga yelo makabulig sa sakit sang ulo. Gani nanaug ako kag nagkuha sing yelo. Isa ini ka paagi nga nabuligan ako sang Magmata!, kag madamo pa. Nuebe anyos ako. Padayuna ang inyo maayong buhat.
M. M., Estados Unidos
Paghambal sing Lainlain nga mga Hambal
Nakabaton ako sing mga kopya sang inyo artikulo nga sa diin ginbalikwat ako sing sayop. (Abril 8, 1987, “Paghambal sing Lainlain nga mga Hambal—Gikan Bala Ini sa Dios?”) Sayop ang pagkahangop ninyo sa akon ginhambal kag daw ginpalutaw ninyo nga nahuy-an ako paagi sa paghambal sing lainlain nga mga hambal, samtang indi gid amo sina. Sa kamatuoran ginbalikwat ko si C. S. Lewis, nga nagsiling nga ang lainlain nga mga hambal makahuluya. Dayon ginpaathag ko ang daku nga importansia sang paghambal sing lainlain nga hambal sa maragtas sang relihion, kon sayoron, kon ngaa indi ini dapat mangin kahuy-anan sa iglesia. . . . Ining sayop nga pagbalikwat daw nagapalutaw nga ginapamatukan ko ang paghambal sing lainlain nga hambal, nga indi gid matuod.
Vinson Synan, Estados Unidos
Ginakasubo namon nga sing dihungod ginpatungod namon ang ginhambal ni C. S. Lewis, nga “Ang paghambal sing lainlain nga hambal kahuy-anan sa amon,” kay Vinson Synan. Apang, ginbalikwat namon sing husto ang ginsiling ni Dr. Synan nga nagguwa sa publikasyon nga “One in Christ”: “Bisan pa mahimo makahuluya ini, ang paghambal sing lainlain nga hambal isa ka regalo nga ginpili sang Dios sa estratehiko nga mga bahin sa maragtas sa pagpasangkad kag sa pagpasag-uli sa Iglesia.” Wala namon ginbalikwat si Dr. Synan agod ipakita nga batok sia sa paghambal sing lainlain nga hambal kundi agod ipakita nga ginakilala niya nga ang paghambal sing lainlain nga hambal mahimo nga isa ka butang nga ginapaligban sang pila ka sinsero nga mga sumilimba karon. Sa sadto nga artikulo ginpakita ni Dr. Synan ang posible nga palaligban para sa pila: “Nagaugyon ako kay Larry Christenson nga nagsiling . . . ‘sa iya soberaniya ginpili sang Dios nga gamiton ang mga hambal nga regalo subong paagi sa pagpasag-uli . . . mahimo nga daw indi ini makatarunganon sa aton pagpangatarungan . . . apang nagakari sia nga nagapanuktok kon luyag niya . . . ’” Nagalaum kami nga makapaathag ini sang tindog ni Dr. Synan sa paghambal sing lainlain nga hambal, nga tuhay sa amon.—ED.