Ang Dulot nga mga Hambal Bahin Bala sang Matuod nga Cristianismo?

“SAMTANG nagapamati ako sa iya nga nagapangamuyo sa mga hambal, pamatyag ko daw may koryente sa hangin,” siling ni Bill pagkatapos sia kag ang anum pa nagtipon sa atubangan sang manugwali malapit sa altar sang simbahan. Ginasulit bala sina nga mga eksperiensia ang nahaunang-siglo nga pagpanghikot sang balaan nga espiritu? Ginapakilala bala sini ang relihion sang Biblia? Makita naton ang makaalayaw nga mga sabat paagi sa pag-usisa sing maayo sang mga Kasulatan.

Ang rekord sang Biblia nagapakita nga kon ginaliton ang bisan anong milagruso nga dulot sang espiritu, sa dimagkubos yara ang isa sang 12 ka apostoles ukon si apostol Pablo. Ang nahauna sa tatlo ka ginrekord nga okasyon sang pagpamulong sang mga hambal natabo sa tunga sang 120 ka disipulo ni Jesus nga nagtipon sa Jerusalem sang Pentecostes 33 C.E. (Binuhatan 2:1-4) Pagligad sang tatlo ka tuig kag tunga, samtang ang isa ka grupo sang disirkunsidado nga mga Italyano nagapamati kay Pedro nga nagawali, nakabaton sila sang espiritu kag nagsugod sa ‘pagpamulong sang mga hambal kag sa pagpakadaku sang Dios.’ (Binuhatan 10:44-48) Kag 19 ka tuig pagligad sang Pentecostes, sang mga 52 C.E., si Pablo nagpamulong sa isa ka grupo sa Efeso kag nagtakdung sang iya kamot sa 12 ka disipulo. Sila man “nagpamulong sing mga hambal kag nagpanagna.”—Binuhatan 19:6.

Ngaa May Dulot nga mga Hambal?

Antes sia magkayab sa langit, nagsiling si Jesus sa iya mga sumulunod: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag . . . tubtob sa ukbong sang duta.” (Binuhatan 1:8) Talupangda nga naghatag sia sing indikasyon kon paano himuon ining daku katama nga pagpanaksi nga hilikuton—sa bulig sang balaan nga espiritu.

Ang modernong teknolohiya sang komunikasyon nga nagapaposible sa aton nga makapadala sing mga mensahe sa bug-os nga duta sa madamong hambal wala sadto anay. Ang maayong balita dapat gid ipalapnag paagi sa pulong sa baba, kag sa sini ang milagruso nga dulot sang pagpamulong sing dumuluong nga mga hambal mapamatud-an nga mapuslanon katama. Amo sina ang natabo sang ang nahaunang-siglo nga mga Cristiano nagbantala sa mga Judiyo kag sa mga proselita sa Jerusalem sang Pentecostes 33 C.E. Ang mga taga-Parto, mga taga-Medo, mga taga-Elam, mga taga-Creta, mga taga-Arabia, kag mga pumuluyo sa Mesopotamia, Judea, Capadocia, Ponto, kag ang distrito sa Asia, subong man ang mga dumuluong gikan sa Roma, nakabati sang “dalagkung mga buhat sang Dios” sa ila kaugalingon nga hambal kag nakahangop kon ano ang ginhambal. Sa gilayon tatlo ka libo ang nangin mga tumuluo.—Binuhatan 2:5-11, 41.

Ang pirme nalipatan nga katunayan amo nga ang pagpamulong sang mga hambal isa lamang sang siam ka pagpanghikot sang balaan nga espiritu nga ginsambit ni apostol Pablo sa iya sulat sa mga Cristiano sa Corinto. Bisan pa gintamod ni Pablo ang pagpamulong sang mga hambal subong mas kubos nga dulot, hamili ini sa kongregasyon anay sa pagpalapnag sang maayong balita nahanungod sa langitnon nga Ginharian sang Dios. Isa ini sa “mga dulot” nga nag-amot sa pagdamo kag pagbakud sang bata pa nga kongregasyon sang mga Cristiano.—1 Corinto 12:7-11; 14:24-26.

Ang lainlain nga pagpanghikot sang balaan nga espiritu sang nahaunang siglo, lakip ang pagpamulong sang mga hambal, kitaon man nga pamatuod nga wala na ginagamit sang Dios ang 1,500-anyos nga kongregasyon sang Israel subong ang iya pinasahi nga katawhan. Sing dimapangduhaduhaan, yara na karon ang iya kahamuot sa bag-ong Cristianong kongregasyon, nga gintukod sang iya bugtong nga Anak.—Ipaanggid ang Hebreo 2:2-4.

Ining mga pagpadayag sang espiritu amo ang pangunang mga elemento sa pagtukod sang lamharon pa nga Cristianong kongregasyon kag sa pagbulig sa sini sa pagtubo sa pagkahamtong. Ginpaathag ni Pablo nga sa tapos natuman ang ila katuyuan, ining milagruso nga mga dulot magauntat: “Kon nahanungod sa tagna, ini mataliwan; kon nahanungod sa mga hambal, magauntat sila.”—1 Corinto 13:8.

Huo, maathag sa Biblia nga ang mga dulot sang mga hambal magauntat. Apang san-o? Ang Binuhatan 8:18 nagapakita nga ang mga dulot sang espiritu nabaton “paagi sa pagtakdung sang mga kamot sang mga apostoles.” Sing maathag, nian, kon mapatay ang katapusan nga apostol, ang pagliton sang mga dulot sang espiritu magauntat—lakip ang pagpamulong sang mga hambal. Busa, kon ang mga tawo nga nakabaton sining mga dulot gikan sa mga apostoles mapatay man sa duta, ang milagruso nga mga dulot magauntat. Sa sina nga tion ang Cristianong kongregasyon mahimo nga may tion na nga mapasad sing maayo kag mahimo nga naglapnag na sa madamong kadutaan.

“Wala Mahibalui nga mga Hambal” kag ang Ila Interpretasyon

Ang karon nga adlaw nga pagbalik sang pagpamulong sang mga hambal “ginkabig sang iban subong emosyonal nga buhat sang mga tawo nga walay kalig-unan agod makaganyat sing igtalupangod, samtang ginakabig ini sang iban subong kaanggid sa natabo nga pagpamulong sang mga hambal sang panahon sang mga Apostoles.” Sa modernong-adlaw nga pagtinipon sang iglesia diin ang pagpamulong sang “wala mahibalui nga mga hambal” nagakatabo, masunson ini nagalakip sang masadya nga pagpautwas sang dimahangpan nga mga tunog. Sing nahisuno, ang isa ka tawo nagtu-ad: “Ginagamit ko ang akon dulot nga mga hambal sing pribado lamang para sa akon kaugalingon nga pagpamalandong. . . . Nahuya ako sa atubang sang iban nga mga tawo.” Ang isa pa ka lalaki nagsiling: “Mabatian ko ang akon kaugalingon nga hambal, indi ko ini mahangpan, apang padayon ko nga mabatyagan ang akon dila nga ginatulod sa paghambal.”

Anong may kabilihanan gid nga impormasyon ang ginapaalinton sinang wala mahibalui nga mga hambal, kag kamusta ang interpretasyon? Ang mga nagaangkon nga makapatpat sining hambal naghatag sing lainlain nga mga paathag sa pareho dimahangpan nga mga hambal. Ngaa lainlain? Ginapakamatarong nila ina nga paglainlain paagi sa pagsiling nga “ang Dios nagahatag sa isa ka tawo sing isa ka interpretasyon sa hambal kag sa lain nga tawo sing lain nga interpretasyon.” Ang isa ka indibiduwal nagbaton: “Natalupangdan ko ang mga okasyon diin ang interpretasyon indi eksakto.” Si D. A. Hayes, sa iya libro nga The Gift of Tongues, nagpatuhoy sa isa ka okasyon diin ang isa ka lalaki nagdumili sa pagpatpat sang pinamulong sang isa ka babayi nga nagpamulong sing wala mahibalui nga hambal bangod “ang hambal amo ang pinakamalaw-ay sa tanan nga malaw-ay.” Kabaliskaran gid sa pagpamulong sang mga hambal nga nagluntad sa nahaunang siglo kag ina sa pagkamatuod para sa pagpalig-on sa kongregasyon!—1 Corinto 14:4-6, 12, 18.

Ang iban karon nagaangkon nga nakabati sing makawiwili nga mga interpretasyon, kag mahimo sila nagapati sing hanuot nga ginagamit sang Dios ining dulot kon “luyag [niya] maghatag sing direkta nga mensahe sa mga tawo.” Apang anong mensahe gikan sa Dios nga ginakinahanglan naton karon ang wala ginhatag sa aton ni Jesucristo kag sang mga apostoles? Si Pablo, nga may dulot mismo sang balaan nga espiritu, nagsiling: “Ang bug-os nga Kasulatan ginbugna sang Dios kag mapuslanon sa pagpanudlo, sa pagsabdong, sa pagsaway, kag sa paghanas sa pagkamatarong, agod nga ang tawo sang Dios mahimpit, nga masangkapan nga sa tagsa ka maayong buhat.”—2 Timoteo 3:16, 17.

Ang kamatuoran amo, ang Cristianong kongregasyon indi na bata, kag busa ang balaan nga mga pagpahayag ukon milagruso nga mga dulot sang espiritu indi na kinahanglan sa pagpalig-on sang papel sini. Ang Biblia nagapaandam: “Apang bisan kami ukon ang manugtunda gikan sa langit magwali sa inyo sing maayong balita nga tuhay sang sa amon ginwali [“lain sa,” The New English Bible] magmanginpinakamalaut sia.”—Galacia 1:8.

Ang milagruso nga pagpamulong sang mga hambal indi na kinahanglan, kag wala sing sadsaran sa Biblia para magpati nga bahin ini sang matuod nga Cristianismo karon. Karon nga ang Biblia kompleto na kag matigayon sing lapnag, ang ginakinahanglan naton yara na sa Pulong sang Dios. Nagatugot ini sa aton sa pagkuha sing sibu nga ihibalo tuhoy kay Jehova kag sa iya Anak nga nagadul-ong sa kabuhi nga walay katapusan.—Juan 17:3; Bugna 22:18, 19.

Bisan sadtong nahaunang siglo, si apostol Pablo napahulag sa pagsulat sa kongregasyon sa Corinto agod tadlungon ang ila pagtamod sa kon ngaa ang dulot nga mga hambal ginhatag sa mga Cristiano anay. Mahimo nga ang iban nawili sa dulot nga mga hambal, kag nagahulag sila kaangay sang magagmay nga mga bata, dihamtong sa espirituwal. Tuman ka daku nga importansia ang gin-angot sa “mga hambal.” (1 Corinto 14:1-39) Ginpadaku ni Pablo nga indi tanan nga mga Cristiano sang nahaunang siglo ang nagpamulong sing milagruso nga mga hambal. Indi ini kinahanglan para sa ila kaluwasan. Bisan pa sadto anay nga nagaluntad ini, ang dulot nga mga hambal segundaryo sa milagruso nga pagpanagna. Ang pagpamulong sang mga hambal indi anay, kag indi karon, kinahanglanon para ang mga Cristiano makatigayon sing kabuhi nga walay katapusan.—1 Corinto 12:29, 30; 14:4, 5.

Ang Puwersa sa Likod sang Wala Mahibalui nga mga Hambal Karon

Nagapati ang iban nga ang nagapahulag nga puwersa sa likod sang mga nagapamulong sang mga hambal karon amo ang karismatik nga mga lider sang iglesia nga nagapahulag sa mga katapo sang ila panong nga matigayon ini nga ikasarang. Sa iban nga mga kaso resulta ini sang emosyonalismo kag pagkaditimbang. Si Cyril G. Williams, sa Tongues of the Spirit, nagasiling nga ini nangin “sa madamong okasyon isa ka tanda sang elitismo sa sulod sang grupo” kag nagahatag sa tawo sing “pagkalabaw kag awtoridad sa panan-aw sang grupo kag sa ila man kaugalingon nga mga mata.” Busa, ang motibasyon mahimo nga amo ang handum nga malakip sa superyor nga grupo sang mga nagapamulong sing wala mahibalui nga hambal.

Ang presidente anay sang Loyola University nga si Donald P. Merrifield nagsiling nga “ang mga hambal mahimo nga isa ka dimapunggan nga eksperiensia, ukon, suno sa iban, yawan-on.” Ang klerigo nga si Todd H. Fast nagsiling: “Ang mga hambal balaisan. Ang yawa may madamong paagi sa pagtinguha nga maapektuhan kita.” Ang Biblia mismo nagapaandam nga si Satanas kag ang iya mga demonyo makasarang sa pag-impluwensia sa mga tawo kag sa pagkontrol sa ila hambal. (Binuhatan 16:17, 18) Si Jesus nagpanghikot batok sa yawan-on nga espiritu nga nagpahulag sa tawo nga magsinggit kag matumba sa salog. (Lucas 4:33-35) Si Pablo nagpaandam nga ‘si Satanas nagapakamanugtunda sang kapawa.’ (2 Corinto 11:14) Yadtong nagatinguha sa karon sang dulot nga mga hambal nga wala na ginahatag sang Dios sa iya katawhan tunay nga nagabukas sang ila kaugalingon sa panglimbong ni Satanas, nga, ginapaandam sa aton, magagamit sang “bug-os nga gahom kag sa butig nga mga tanda kag mga kalatingalahan.”—2 Tesalonica 2:9, 10.

Ang mga Hambal—Kag ang Matuod nga Cristianismo

Ang nahaunang-siglo nga mga Cristiano nga nakabaton sing dulot sa pagpamulong sang mga hambal naggamit sini sa pagpaathag sang dalagkung mga buhat sang Dios. Ginpadaku ang kinahanglanon nga patpaton sing maathag ang mensahe nga ginapaalinton sang mga hambal agod mahangpan ini sang tanan kag magaresulta sa pagpalig-on sang madamo. (1 Corinto 14:26-33) Si Pablo naglaygay: “Kon magmitlang kamo sa dila sing pulong nga dimahangpan, paano bala ang pagpakilala sang iban kon ano ang ginapamulong? Kay nagapamulong kamo sa hangin.”—1 Corinto 14:9.

Samtang ang espiritu sang Dios naghatag sa unang mga Cristiano sing dulot nga mga hambal, wala ini maghimo sa ila sa pagpamulong sing dimahangpan ukon dimabadbad nga hambal. Nahisanto sa laygay ni Pablo, ang balaan nga espiritu naghatag sing pamulong nga nagresulta sa madasig nga ‘pagwali [sang maayong balita] sa bug-os nga tinuga sa idalom sang langit.’—Colosas 1:23.

Nahanungod sining katapusan nga mga adlaw sang karon nga sistema, si Jesucristo nagmando: “Ang maayong balita [sang gintukod nga Ginharian] kinahanglan ibantala anay sa tanan nga kapungsuran.” (Marcos 13:10) Subong sadtong nahaunang siglo, ang tanan nga tinuga dapat makabati sang mensahe sang Ginharian. Posible ini bangod ang Biblia ginbadbad karon, sing bug-os ukon sing bahin, sa halos 2,000 ka hambal. Ang espiritu man nga nagbugna sa mga Cristiano anay nga magpamulong sing masidla kag sing maisog nagasupurta karon sa daku kag makatilingala nga pagbantala nga hilikuton sang karon nga kongregasyon sang mga Saksi ni Jehova. Paagi sa pulong sang baba kag paagi sa paggamit sang modernong teknolohiya sa imprinta agod ang Makasulatanhon nga kamatuoran matigayon paagi sa naimprinta nga mga pahina, nagapamulong sila sing “putli nga hambal.” Ining mensahe ginapalapnag sa kapin sa 200 ka kapungsuran kag kapuluan sang dagat. Ang mga Saksi ni Jehova nagatindog sing isahanon subong ang katawhan nga ginapahulag sang espiritu sang Dios sa pagpahibalo sa tanan sang dalagkung mga butang sang Dios.—Sofonias 3:9; 2 Timoteo 1:13.

[Laragway sa pahina 7]

Pamalaybalay nga pagpanaksi sa Hapon

Pagpanaksi sa mga barko sa Colombia

Sa ubos: Pagtuon sa Biblia sa Guatemala

Sa idalom: Pagpanaksi sa uma sa Netherlands