Pagpamulong sang mga Hambal—Isa ka Nagauswag nga Hitabo

“ISA ka gahom ang nagkontrol sang akon dila kag ang mga pulong nag-ilig lang kaangay sang tubig. Makalilipay gid ini! Yara ang balatyagon sang tuman nga katinlo. Lain na gid ako kutob sadto,” siling sang isa nga nakaeksperiensia sing labaw sa kinaandan nga pagpamulong sang “wala mahibalui nga hambal.”

Ginalaragway diri sang isa ka tawo ang tuhoy sa iya nahaunang eksperiensia sang pagpamulong sang “wala mahibalui nga hambal.” ‘Apang ano ina?’ mahimo makatarunganon nga ipamangkot sang iban. Nagapatuhoy ini sa buhat ukon pagpati sa iban nga mga iglesia diin ang mga lalaki kag mga babayi nagaangkon nga ginapahulag sang espiritu sang Dios sa pagpamulong sang dumuluong ukon estranghero nga mga lengwahe nga wala nila mahibalui.

Isa ini ka nagauswag nga relihiosong hitabo. Gintamod anay subong nagakatabo lamang sa Pentecostal nga mga tumuluo, ang pagpamulong sang mga hambal nagalabaw karon sa tradisyunal nga denominasyunal nga mga dulunan sa paglakip sa mga Baptist, mga Episcopalyan, mga Luterano, mga Metodista, mga Presbitaryan, kag mga Romano Katoliko. Ang kahimtangan sang isa ka tawo sa sining kahimtangan ginlaragway subong sobra nga pagkalipay, sobra nga pagkabalaka, pagkanaorongan, kag malinupayon. Ginatawag pa gani ini sang iban nga dimapunggan nga eksperiensia. May tanhaga kag pinasahi nga ganyat nga naangot sa pagpamulong sang mga hambal.

Ngaa Ginahandum Karon ang Dulot sang mga Hambal?

Sa iya libro nga Tongues of the Spirit, si Cyril G. Williams nagapanugda nga mahimo nga may “kaangtanan sa ulot sang pagbatyag sing kapaslawan, kag paghandum sing ‘mga hambal.’” Ginalaragway niya ini subong mekanismo sa pagpautwas nga may “makapaayo nga kabilihanan subong manugbuhin sang kahuol” kag “manuglubad sang nasulod nga pagsinuay.” Ang kapaslawan sa hilikuton sa simbahan, kahuol sa balatyagon, kabang-awan sa karera, pagkanamatyan, mga problema sa panimalay, ukon balatian sa pamilya ginsambit subong mga rason nga nagaamot sa sinang makalilipay nga pagpamulong.

Sa kaanggid, sa The Psychology of Speaking in Tongues, si John P. Kildahl nagasiling nga “ang kabalaka isa ka pangunang kinahanglanon agod mapalambo ang ikasarang sa pagpamulong sang mga hambal.” Paagi sa personal nga panalawsaw kag mahalungon nga pag-interbyu, natukiban nga “kapin sa 85% sang nagapamulong sing hambal ang nakaeksperiensia sing daku nga kabalaka bag-o sila nagpamulong sing mga hambal.” Halimbawa, ang isa ka iloy maluyag magpamulong sing mga hambal agod makapangamuyo sia tungod sa iya anak nga lalaki nga nagamasakit sing kanser. Ang isa ka tawo nagsugod sa pagpamulong sang mga hambal sang tion nga indi sia makapamat-od sa gintanyag nga pagsaka sing posisyon sa trabaho. Ang isa ka babayi nagsugod sa pagpamulong sang mga hambal sa sulod sang isa ka semana sa tapos ang iya bana nagbuylog sa Alcoholics Anonymous.

Ano ang Maeksperiensiahan sang Isa?

Ang isa pa nga nagpamulong sing mga hambal sa nahauna nga tion nagreport: “Nabatyagan ko ang pagpalanginit sang akon bug-os nga lawas, kag ang pagpalamugnaw kag pagpamalhas, pagpalangurog kag pagpalamuypoy sang akon mga tiil.” Kaupod sa eksperiensia nga pagpamulong sang mga hambal, yara sa masami ang dikinaandan nga hulag nga nasapwan sang iban nga makatulublag. Halimbawa, “halos nadunlan ang isa ka babayi sang iya kaugalingon nga laway sang nagahiwud sia sa siya, ang iya liog nagasandig sa salandigan sini, ang iya mga tikod sa salog, ang iya mga batiis nagatiskog.” Sa isa ka miting sa kongregasyon “ang isa ka lalaki nagsulusirko halin sa isa ka ukbong sang simbahan pakadto sa pihak.”

“Para sa iban nga mga tawo,” sulat ni Propesor William J. Samarin, “ang pagpamulong sang mga hambal isa ka kahimtangan tungod nga nabawtismuhan sang Balaan nga Espiritu.” Kon wala ini, sila “ginapabatyag nga indi kompleto.” Gintamod man ini “subong sabat sa pangamuyo, isa ka pasalig sang balaan nga gugma kag kahamuot.” Nagsiling ang iban nga nagahatag ini sa ila sing balatyagon sang nasulod nga paghiusa, kalipay, kag kalinong, kag upod sang “daku pa nga pagbatyag sing gahom” kag “makusog pa nga pagbatyag sing pagkatawo.”

Ang makalilipay nga pamulong isa gid bala ka pamatuod sang pagpanghikot sang balaan nga espiritu? Ang eksperiensia nagapakilala bala sa isa ka tawo subong matuod nga Cristiano? Ang pagpamulong sang mga hambal isa bala ka bahin sang kalahamut-an nga pagsimba karon? Ining mga pamangkot nagakaigo sing labi pa sa pahapyaw nga sabat. Ngaa? Bangod luyag naton nga ang aton pagsimba ginakahamut-an kag ginapakamaayo sang Dios.