Gikan sa Amon mga Bumalasa

Pagpaayo sa Paso

Sang nagligad nga tion, luyag ko pasigahon ang pilot ­light sang water heat­er sa banyo. Ginbuksan ko ang gas, kag madugaydugay, ginsindihan ang posporo. Sa hinali, ang tanan sa palibot ko nagdabdab. Ang likod sang akon wala nga kamot, nga akon gingamit sa pagbukas sa ­switch sang pilot, napaso gid. Nadumduman ko nga nabasahan ko anay sa Magmata! nga dapat gamiton ang tubig, gani ginpabugnawan ko ang akon kamot. Ginrekomendar sang akon amay nga hampolan ini sing dahon sang sabila, kag ginhimo ko ang ginsiling niya. Apang naglapta ang kahapdi sa bug-os ko nga kamot, kag indi ko gid maagwanta. Sini nga tion, gintan-aw ko ang Watch Tower ­Publications Indexes sa ubos sang “Burns” kag nakita ko ang artikulo nga “What You ­Should Know ­About ­Burns.” (April 22, 1980) Sang mabasa ini, nakita ko nga wala ini magsiling nga ‘pabugnawan sa tubig’ kundi ‘ibutang ini sa subong kabugnaw sa yelo nga tubig.’ Ginhimo ko ini sa halos tatlo ka oras subong ginsiling sang artikulo. Wala ako maghunahuna nga ang grabe nga paso sa akon kamot magaayo sing palareho. Apang pagkaaga, tan-awa! Wala sing mga pinalian. Nag-ayo gid ang akon kamot.

M. K., Hapon

Malawig man nga ginpaathag ini nga pagbulong sa amon guwa sang July 22, 1966. Ang napaso nga kamot ukon tiil sarang mahuluman sa subong kabugnaw sa yelo nga tubig sa 15 minutos, kuhaon, kag dayon suliton ang proseso tubtob madula sing bug-os ang kahapdi kon wala na sa mabugnaw nga tubig. Masami ini nga nagakatabo sa sulod sang mga tatlo ka oras. Ang mas malapad nga mga bahin sang lawas sarang madampidampian sing yelo. Dapat dumdumon nga ang sobra nga kabugnaw nga mapadapat sa lawas makapanubo sang temperatura sang lawas sing daku, nga ginabangdan sang “shock.”—ED.

Konstitusyon sang Estados Unidos

Naluyagan ko gid ang artikulo nga “Ang Konstitusyon sang Estados Unidos kag ang mga Saksi ni Jehova.” (Nobiembre 8, 1987) Sa tapos ako makapanalawsaw tuhoy sa maragtas sang Konstitusyon, naton-an ko nga madamo sang mga tawo nga nagpirma sa Konstitusyon mga rasista kag mapintas nga mga tag-iya sing mga ulipon, kag sa amo man nga tion mga relihioso sila nga mga sumilimba sa simbahan kag ginpilit nila ang ila mga dogma sa ila mga ulipon. Daw wala ginlakip sang mga libro sang maragtas ining mga kamatuoran.

A. N., Hapon

Matuod nga ang mataas nga mga panganinawan nga ginpabutyag sa “pre­amble” sa Konstitusyon, ‘sa pagpaluntad sing hustisya, sa pagpasalig sing domestiko nga kalinong, kag sa pagtigayon sing mga pagpakamaayo sang kahilwayan,’ wala gid makahatag sing benepisyo sa tanan nga pumuluyo sang Estados Unidos sang ginhimo ini sang 1787. Halos 80 ka tuig ang nagligad antes gindumilian ang pag-ulipon (1865) kag kapin sa 130 ka tuig antes gingarantiyahan ang mga babayi sing kinamatarong sa pagbotar (1920). Mas madugay pa matigayon ang pagkatupong sang mga rasa. Ini, sa pagkamatuod, nagapakita sang mga limitasyon sang dihimpit, makagod nga mga tawo kag nagapakita nga kinahanglan gid ang Ginharian sang Dios paagi sa iya Anak, nga si Cristo Jesus, nga sa diin magaluntad ang bug-os nga pagkamatarong. (Isaias 9:6, 7; 32:1, 2; Mateo 6:9, 10) Apang, sarang masiling nga ang Konstitusyon, walay sapayan sang mga kakulangan sini, nagaunod sing mga panganinawan sa isa ka balayan nga nagpaposible sa mga pag-uswag sa pagpanghikot sang pangulohan agod nga ina nga mga panganinawan naagom sang ulihi sang kapin nga katawhan kag sa mas daku nga kasangkaron sang sa 1787.—ED.