Pag-eksamin sa 80 ka Hambal
ANG manugbulong sang pamilya sa Canada nakatukib sing sistema nga posible na ‘maeksamin [sang doktor] kag mabulong ang mga pasyente sa 80 ka hambal nga wala sing manugpatpat,” siling sang “The Medical Post.” Ang sistema ginatawag nga MIGS (Medical Information Gathering System). Isa ini ka 20-pahina nga libro, isa ka libro para sa tagsa ka hambal. Ang tagsa ka libro “nagalaragway sang kapin sa 200 ka medikal nga sintoma,” nagagamit sing adlaw-adlaw nga hambal kag ekspresyon.
Ang nahauna nga tikang amo nga ipakita sa pasyente ang pareho nga dinalan sa nanuhaytuhay nga hambal tubtob makilala ang para sa iya. Ang dinalan nagasugo sa iya nga itudlo ina nga hambal agod mapili sang doktor ang nagakaigo nga libro sang hambal.
Ang masunod amo ang paggamit sa libro sa sina nga hambal, nga ginagamit ang 15 ka pamangkot agod mahibaluan kon ano ang problema nga ginabatyag sang pasyente. Nagabulig ini sa paghibalo kon ano ang balatian. Kon, halimbawa, tiyan ang problema sang pasyente, nian ginatudlo sia sa isa ka bahin nga may “mga 15 ka pililian nga pamangkot nga espesipiko nga may kaangtanan sa sistema sang tiyan.”
Ginabinagbinag man sang kinaandan nga hambal sang sistema ang pagkananuhaytuhay nga resulta sang pagkatuhay sa edukasyon kag kultura. Subong halimbawa, ang artikulo nagasiling nga “ang taga-Canada malaragway sang kasukahon paagi sa pagsiling ‘Malain ang tiyan ko,’ samtang ang taga-Jamaica magasiling: ‘Malain ang pamatyag ko.’”
May Braille nga bersion ang sistema para sa mga bulag. Kag ginahimo karon ni Dr. Victor Kumar-Misir, nga nagtukib sang sistema, ang isa ka bersion para sa mga pasyente nga indi makahibalo magbasa kag magsulat nga nagakinahanglan sang serbisyo sang manugbulong.
Ang MIGS daw magadagsa sa mga manugbulong kag mga pasyente sing kapin kag kapin sa dalagku nga mga siudad sang kalibutan samtang ina nga mga siudad nagadugang ang kultura kag hambal sini. Sa pila ka kaso ang kahimtangan sang malala sing balatian ukon nasamad nga tawo naggrabe pa bangod sang diikasarang sang doktor kag pasyente sa pagkomunikar.