Ikaw Bala ang Nagapili—Ukon Iban ang Ginapapili Mo Para sa Imo?

TUBTOB sang walo na sia ka tuig, si Pedro nagsimba kay Maleiwa, ginakabig nga manunuga sang tawo kag naghimo sang duta. Nahadlok sia kay Yolujá, ginasiling nga manugbalita sang tanan nga kalautan kag balatian, kag gintinguhaan niya nga likawan ang malain nga mga padugi ni Pulowi, diosa kuno sang lugar sang mga nagtaliwan.

Si Pedro isa ka Guajiro, isa sa madamong Indian nga tribo sang Venezuela. Ginsunod niya ang tradisyonal nga relihion sang iya mga ginikanan tubtob nga sang isa ka adlaw ang lokal nga manunudlo sa eskwelahan naghimus nga bawtismuhan sia—subong isa ka Katoliko.

“Wala sing nagsugilanon sa akon, kag wala ako sing nahibal-an nahanungod sa akon bag-o nga relihion,” paathag ni Pedro. “Apang narealisar ko nga indi mabudlay adoptahon ining bag-o nga relihion, nga wala nagakinahanglan sing daku nga pagbalhin sa akon matag-adlaw nga pagginawi. Matutom ako sa akon bag-o nga relihion, kay pirme ako nagapamati sa Misa kon Disiembre.”

Walay sapayan nga natungod sa duha ka lainlain nga relihion, si Pedro wala maghimo sing makatarunganon nga pagpili sa sini. Ang pagpili ginhimo para sa iya sang iban. Ang iya eksperiensia ginsulit sing dimaisip ka beses sa sulod sang mga siglo. Sa katunayan, pila lamang sa lima ka bilyo ka tawo nga buhi karon ang mahunahunaon nga nagpili sang relihion. Ang ila relihion masami nga butang nga napanubli, kaangay sang ila hitsura, sang ila batasan, ukon puluy-an nga ginapuy-an nila.

Sila ang Nagpili

Apang kon ano bala ang napanubli amo pirme ang labing maayo? Mahimo naton tinguhaan nga pauswagon ang aton hitsura sa bug-os nga masarangan naton. Mahimo naton panikasugan nga patahumon pa ang puluy-an nga ginbilin sa aton sang aton mga ginikanan. Mahimo pa gani kita makig-away sing lakas agod malandas ang dimaayo nga mga batasan nga napanubli naton.

Bangod sini, sa bug-os nga duta ang iban nagausisa liwat sang relihion nga napanubli nila gikan sa ila mga katigulangan. Sa baylo nga kabigon ini nga pagluib sa tradisyon sang pamilya nga dapat pakamahalon sing dimaduhaduhaon, ang ila espirituwal nga handum nagpahulag sa ila nga pangitaon ang butang nga maayo pa. Amo sini ang natabo kay Hiroko, nga ang amay isa ka Budhista nga pari sa Myokyo Temple, Japan.

“Sang bata pa ako, sa pinakamatugnaw nga mga gab-i sang tigtulugnaw, nagamartsa ako pakadto-pakari sa puno sing yelo nga mga dalan sang amon minuro nga nagabitbit sing suga,” siling ni Hiroko. “Si tatay nagauna, nagabombo sang tambor kag nagaamba sing sutras. Kutob sa pagkabata, ang pagpenitensia kag Budhista nga ritwal bahin sang akon kabuhi.”

Walay sapayan, si Hiroko indi malipayon sa iya napanubli nga relihion. “Wala ako sing nakita nga bisan isa ka makaalayaw nga sabat sa akon madamong pamangkot. Ang pagbag-o sa mga ngalan sang patay, ang mga lapida nga ginakabig nga daw buhi nga tawo sa gilayon nga ang mga sutra ginaamba sa ibabaw nila, ang mga anting-anting nga papel nga ginakunokuno nga nagaamlig sa tumuluo sing madyik, kag madamo pa nga iban nga seremoya sa templo nga nagapalibog gid sa akon.”

“Ginsingganan ako nga natungod kami sa labing nasanagan nga sekta sang Budhismo. Apang, ang tanan nga mga pamangkot ko wala gihapon masabat. Kombinsido ako nga dapat may pila ka butang, sa pila ka lugar. Ginalauman ko nga mausisa sing hilway ang isa ka relihion nga makahatag sa akon sang tanan nga sabat.” Si Hiroko nagsulusaylo sa lainlain nga relihion sa sidlangan kag wala sia sing nasapwan nga kaayawan. Sang ulihi, paagi sa bulig sang mga Saksi ni Jehova, naton-an niya gikan sa Biblia ang nahanungod sa labing gamhanan nga Dios, ang Isa nga nagtuga sang langit kag duta, kag nakita man niya ang mga sabat sa iya mga pamangkot kutob sa pagkabata.

Sa bahin niya, ang pinamulong ni manalagna Jeremias natuman sing literal: “Kon pangitaon ninyo ako, makita ninyo ako; kon pangitaon ninyo ako upod ang inyo bug-os nga tagipusuon, tugutan ko kamo nga makita ako, siling sang GINUO.”—Jeremias 29:13, 14, The New English Bible.

Nagbatyag si Hiroko nga maayo gid nga sia ang magapili, bisan pa nga tuhay ini gikan sa iya sang iya mga ginikanan. “Nalipay gid ako nga makita ang kasanag, kag karon wala na ako sing nagatublag nga mga pamangkot kag mga kabalaka nga nagpalibog sa akon sa madamo gid nga tinuig,” siling niya. Apang malipayon ka man ukon indi sa imo karon nga relihion, kinahanglan gihapon nga magahimo ka sing pagpili.

Kon Ngaa Dapat Himuon ang Pagpili

Kalabanan sa aton, kon mag-untat kita sa paghunahuna nahanungod sini, magaugyon nga ang relihion isa ka butang nga importante gid nga indi pagkabigon nga nataboan lang. Ti, bisan sa adlaw-adlaw nga mga butang, ginatinguhaan naton nga kontrolon ang aton kaugalingon nga pagkabuhi kon mahimo pa. Sin-o ang luyag nga mangin biktima lamang sang sirkunstansia?

Kon masakit katama ang imo ulo, ginainum mo bala dayon ang mga pildoras nga makita sa tunga sang isa ka tumpok sang lainlain nga bulong nga wala anay ginatan-aw sing maayo ang ngalan?

Kon nagapili ka sing bag-o nga bayo, ginakuha mo bala dayon ang una nga bayo nga makita mo sa balaligyaan, dimahunahunaon nga nagahaumhaum nga igo gid ini sa imo?

Kon nagabakal ka sing segunda mano nga salakyan, ginapadalagan mo bala ini dayon nga wala anay ginausisa ang makina?

‘Buangbuang lamang ang magahimo sina,’ ayhan hunahunaon mo. Indi ina butang nga pasapayanan. Apang, para sa madamo sa aton ang isa sang labing importante nga desisyon sa kabuhi—kon ano dapat ang aton relihion gindesisyunan para sa aton sang kahigayunan, sang madugay na ginkalimtan nga mga hitabo sa maragtas, kag sang lugar nga natawhan.

Indi bala maalamon nga ipamangkot sa kaugalingon: “Sa ano ko nautang ang akon relihion? Ginliton bala ini sa akon nga wala ko gid pag-usisaa? Ukon naghimo bala ako sing nahunahuna sing maayo kag makatarunganon nga pagpili?’ Ang pagpamangkot sina nga mga pamangkot amo gid ang butang nga ginalaygay sang Biblia nga himuon naton. Ginlaygayan ni apostol Pablo ang mga taga-Corinto nga ‘padayon nga tilawan kon yara sila sa pagtuo, padayon nga pamatud-an kon ano gid sila.’—2 Corinto 13:5.

Ang Biblia nagasambit sa isa ka pamatan-on nga nagahingalan kay Timoteo nga ginpadaku sang iya iloy kag lola nahisuno sa Kasulatan. Apang, sing maathag, wala niya ginbaton ang kamatuoran sing walay hinalung-ong. Mga tinuig sang ulihi ginpahanumdom sia ni Pablo nga ‘nakatuon [sia] kag nahaylo nga magpati.’ (2 Timoteo 3:14) Nahaylo si Timoteo nga magpabilin sa pagtuluohan nga nabaton niya—apang sang sia mismo naghimo sing maid-id nga pag-usisa.

Sa pihak nga bahin, ang iban napahulag sa pagbinagbinag liwat sa ila namat-an nga relihion. Si Sergio Paulo isa ka Romanong pangulong-puod sa Cyprus nga walay duhaduha nagsimba sa pila ka Romanong mga diosdios. Apang, pagkatapos mabatian ang pagbantala ni Pablo, “nangin tumuluo sia, nga nahaylo sing daku sa kon ano ang naton-an niya nahanungod sa Ginuo.”—Binuhatan 13:12, NE.

Sa duha ka halimbawa ginhimo ang makatarunganon nga pagpili pagkatapos sang maid-id nga pag-usisa pasad sa Pulong sang Dios. Ngaa indi pag-ilugon ang ginhimo ni Sergio Paulo kag ni Timoteo? Ginbaylohan sang isa ang iya relihion, ang isa wala; apang lunsay sila ginpadyaan bangod sang personal nga pagpangita sa kamatuoran. Apang, bangod sang tradisyon, kahadlok, ukon pagkamaynadampigan ayhan nahuya ang iban sa paghimo sina nga tikang.

Ang Hangkat sang Paghimo sing Pagpili

Ang relihioso nga tradisyon madugay nga nagataliwan, kag madamo ang nakasapo sing paumpaw sa madugay na nga mga kustombre kag mga kredo. “Kis-a nga nangin Katoliko, pirme na nga Katoliko,” siling sang iban. Ayhan amo man sina ang imo ginabatyag tuhoy sa imo relihion, nagapakamaayo sang tradisyunal sang sa dikilala. Sa pagkamatuod, dimaalamon ang pagsikway sing bug-os sang tradisyon nga wala anay ginausisa ang pagkatakus sini. Ginsilingan ni Pablo ang taga-Tesalonica nga mga Cristiano nga ‘huptan ang mga tradisyon nga naton-an nila.’ (2 Tesalonica 2:15, NE) Sa pihak nga bahin, si Jesus nagpaandam nga ang relihiosong mga tradisyon magapahilayo sa aton sa Dios, magapakawalay pulos sang iya Pulong, ang Biblia. (Mateo 15:6) Ang tradisyon indi pirme masaligan.

Samtang nagadugang ang ihibalo, ang tradisyonal nga mga paagi masunson nga nagabalhin ukon nagabulos sa mga patag subong sang medisina, siensia, kag teknolohiya. Sa sining mga bahin ang kalabanan nga tawo may bukas nga hunahuna, nga mapuslanon sa ikaayo. Bisan pa nga mahimo kita magahunahuna nga ang aton relihioso nga tradisyon may balaan nga ginhalinan, ang Biblia nagapaandam sa aton nga “indi pagtuohan ang tanan nga inspirado nga pinamulong” kundi, sa baylo, ‘tilawan ang inspirado nga mga pinamulong kon sila iya sang Dios.’ (1 Juan 4:1) Nagapanugda ini nga aton “siguraduhon ang tanan nga butang; nagahupot sa kon ano ang maayo.” (1 Tesalonica 5:21) Ang maayong mga tradisyon pirme nga magapabilin sa idalom sina nga pag-usisa.

Ang isa pa ka sablag sa paghimo sing pagpili sa relihion amo ang kahadlok. “Wala ko gid ginahambali ang relihion ukon politika!” amo ang kinaandan nga komento. Ang kahadlok nga matukiban nga ginpatalang kita ukon ang kahadlok sa kon ano ang hunahunaon sang iban amo ang makusog nga mga balibad tungod sang indi paghimo sing bisan ano. Sang panahon ni Jesus madamo ang nagkilala sang pagkatakus sang iya panudlo apan nag-isol sa pagkilala sa iya subong ang Mesias “sa kahadlok nga sikwayon gikan sa sinagoga. Ginhamili nila ang ila reputasyon sa tawo sa baylo sang kadungganan nga nagahalin sa Dios.”—Juan 12:42, 43, NE.

Nawasi sadtong katawhan sang panahon ni Jesus ang pinasahi nga kahigayunan nga mangin mga disipulo ni Cristo bangod nagpadala sila sa mga pag-ipit sinang makitid sing hunahuna nga relihiosong komunidad. Matuod, nagakinahanglan sing kaisog ang maglangoy sing balabag sa ilig sang tubig. Apang kon indi ka maghimo sing pagpili, dimalikawan nga iban ang magapili para sa imo.

Ang sayop nga panghunahuna batok sa bisan ano nga “dumuluong” magapugong man sa mga maluyag sa paghimo sing wala sing ginapasulabi nga pag-usisa. Sang panahon ni Jesus ang Mesias ginpakanubo bangod sang pagka-Nazareno kag ginyaguta bangod sang pagka-Galileahanon. Amo man sina ang ikabeinte ka siglo nga pagkamaynadampigan.—Juan 1:46; 7:52.

“Isa lamang ina sang bag-ong Amerikano nga relihion!” Amo sina ang una nga reaksion ni Ricardo sang gin-agda sia sang isa sang mga Saksi ni Jehova nga usisaon ang iya relihion. Ang iya ginhalinan nga Latin Amerika naghimo sa iya nga suspetsuso sa bisan ano nga butang nga naghalin sa Estados Unidos. Apang, ang iya pagkamaynadampigan nadula sang ginpresentar sa iya ang pamatuod. Labaw sa tanan, nakombinse sia sa praktikal nga pagpasundayag sa Cristianismo nga nakita niya sa tunga sang mga Saksi. Ang ila matuod nga gugma kag pagtuo nagganyat sa iya.—Tan-awa ang kahon sa pahina 10.

Sa tapos mapahigad ang iya una nga pagkamaynadampigan, nag-ugyon si Ricardo sa isa pa ka manugpanilag, nga nagsulat nga ang mga Saksi ni Jehova “sa ila organisasyon kag pagpanaksi nga hilikuton . . . nangin kaangay gid sa dumaan nga Cristianong komunidad.” Nagabatyag sia karon nga kinahanglanon ang bukas nga hunahuna sa paghimo sing pinakamaayo nga pagpili.

Ano ang Pilion Mo?

Ginlandas ni Pedro, nga ginsambit kaina sa umpisa sining artikulo, ang tradisyon, kahadlok, kag pagkamaynadampigan agod ton-an niya mismo ang Kasulatan. Sang primero nasubuan sia bangod sang iya pagkabang-aw sa relihion sa kabilugan. Nagsiling sia: “Ang pagtuo ko kay Maleiwa ukon ang pagtuo ko sa dios sang mga Katoliko, nga ang ngalan wala ko gani makilala, wala maghatag sa akon sing daku nga kalipay.” Apang sang ulihi ginpakamaayo niya nga mangin isa ka Saksi ni Jehova kag ginbawtismuhan sa edad nga 36. “Ang gugma kag pagpailob sang nagbulig sa akon kag ang makaalayaw nga mga sbat nga nabaton ko gikan sa Biblia, amo ang butang nga nagpat-od,” siling niya.

May kaisog ka bala sa pag-ilog sa halimbawa ni Pedro? Ano man ang imo relihion, indi ini pag-itugyan sa nataboan lang. Pamatud-i sa imo kaugalingon, nagagamit sang Pulong sang Dios, kon ano ang kamatuoran, ang pinasahi kag hamili nga kamatuoran nga gintudlo ni Jesus. Ang mga Saksi ni Jehova malipay sa paghatag sina nga bulig. Hanuot nila nga ginaagda ka sa pagpamati sa pulong ni Josue: ‘Magpili ka kon sin-o ang imo alagaron.’—Josue 24:15.

[Kahon sa pahin 10]

Mga Saksi ni Jehova​—Isa ka “Amerikano nga Relihion”?

MADAMONG nasyonalistiko nga katawhan ang nagasuspetsa ukon nahadlok sa bisan ano nga ginakabig nga dumuluong. Nagaapektar ini bisan sang ila pagtamod sa iban nga mga relihion.

Ang mga Saksi ni Jehova masunson nga mga biktima sini nga mentalidad, gin-akusar nga isa ka Amerikano nga relihion, “Ginhimo sa E.U.A.,” kag busa dapat sikwayon bangod sina nga rason. Isa bala ina ka makatarunganon nga reaksion?

Ano ang mga Kamatuoran?

1. Sa proporsion mas madamo ang Saksi sa Canada, Costa Rica, Finland, Jamaica, Puerto Rico, kag Zambia, kag sa iban man nga kadutaan, sang sa Estados Unidos.

2. Ang mga Saksi ni Jehova indi lamang internasyonal. Supranasyonal sila, kon sayuron, nagalampas sa pungsodnon nga mga dulunan ukon mga interes sa rasa. Talalupangdon ang daku nga kadalag-an sang mga Saksi ni Jehova sa paglandas sa mga pagkamaynadampigan sa rasa, tribo, kag pungsod. Amo sina ang natabo sa Bagatnan nga Aprika, Israel, Lebanon, Naaminhan nga Irlandiya, kag iban pa nga mga pungsod nga ginatublag sang relihioso nga kagamo. Ang mga itom kag mga puti, mga Judiyo kag mga Arabo, mga Katoliko kag mga Protestante anay, tanan mga Saksi ni Jehova na karon, nagapangabudlay kag nagasimba sing tingob sa ila mga kombension kag mga Kingdom Hall.

3. Sila ang nagaimprinta sang ila literatura sa Biblia sa mga 200 ka hambal. Halimbawa, “Ang Lalantawan” ginabalhag sa 103 ka hambal kag ang “Magmata!” sa 54, nga may kabilugan nga tingob nga binulan nga imprinta nga kapin sa 48 ka milyon ka kopya.

4. Bisan pa nga ang mga Saksi ni Jehova may ulong-talatapan sa Nueva York, 23 porsiento lamang sang ila kadamuon ang yara sa Estados Unidos.

5. Subong nga ang Jerusalem amo anay ang kombeniente nga ginsugdan sang dumaan nga Cristianismo, sa sining dag-on man sang mga inaway kag mga binangig sa kalibutan, ang Estados Unidos amo ang pinakakombeniente nga sugdan sang pagbantala sang maayong balita sa bug-os nga kalibutan. Ginapakita sang eksperiensia nga sa iban nga lugar ang hilikuton gin-upangan bangod sang pagkamaynadampigan, mga pagdumili, ukon mga kakulang sing hilaw nga mga materyal. Apang bangod ang ila ulong-talatapan yara sa Nueva York wala ini nagakahulugan nga ang mga Saksi isa ka “Amerikano nga relihion,” subong nga ang dumaan mga mga Cristiano indi isa ka Judiyo nga relihion, bisan sa ginatawag nga amo sina.

Dimakatarunganon nga paghingabot

Ang isa ka kamatuoran nga nagapaathag sing maathag sang ila pakasupranasyonal nga pagtamod amo ang kon paano sila ginatawag sang lainlain nga mga rehimen sa politika. Sang nagligad, gin-akusar sila nga mga komunista sa Estados Unidos kag mga ahente sang CIA sa komunista nga mga pungsod!

Sang katuigan 1950, halimbawa, ang isa ka artikulo sang pamantalaan sa E.U. mabasa: “Ginagastuhan sang mga Pula sa Polo ang ‘mga Ahente ni Jehova.’” Ang isa pa ka report gikan sa estasyunan sa radyo sang E.U. nagsiling: “Ang satelayt nga [Polako] nga pangulohan sang Sobyet nagapalig-on kag nagabulig sa pinansial sa mga Saksi.” Sa Irlandiya, ang mga Saksi ginyaguta sang masingki nga mga hubon: “Mga komunista!” Guwa kamo diri!”

Samtang, ang mga Saksi ginadumilian sa Poland kag sa iban pa nga komunista nga mga pungsod, kag madamo ang ginbilanggo bangod sang ila pagtuluohan. Ang iban gin-akusar pa gani nga miembro sang mga espiya nga ginasakdag sang CIA. Ang ila kahimtangan sa Unyon Sobyet ginalaragway subong sang masunod ni Vladimir Bukovsky, nga nagsaylo sa Katundan sang 1976: “Isa ka gab-i sa London, nakita ko ang isa ka ngalan sa isa ka tinukod nga mabasa: MGA SAKSI NI JEHOVA. . . . Nakibot ako, halos tubtob sa punto nga magsalasala. Paano ina matabo? siling ko sa akon kaugalingon. Sa U.S.S.R., masugata mo lamang ang unod-kag-dugo nga ‘mga Saksi sa mga bilangguan kag mga kampo konsentrasyon. Mahimo bala ang isa makasulod kag mag-inum sing tsa kaupod nila? Ang akon pagpaanggid mahimo nga wala sa lugar, apang nhandurawa sa makadali nga nakita mo ang isa ka tinukod nga may karatula nga nagasiling COSA NOSTRA LTD., MAFIA GENERAL STAFF. Ang ‘mga Saksi’ ginapangita sa amon pungsod sing subong ka kusog sa pagpangita sa mga Mafia sa lugar nila.”

Ining malip-ot nga mga halimbawa nagapakia kon ano na ang ginakilala sang madamong wala sing ginadampigan nga mga manugpanilag—nga amo, ang mga Saksi ni Jehova wala nagapakig-upod sa bisan anong may nasyonalistiko ukon politikal nga mga huyog. Ang ila pagtuo supranasyonal bangod luyag nila ilugon ang ila walay ginapasulabi nga Dios.​—Binuhatan 10:34.

[Piktyur sa pahina 8]

Imnon mo bala ang una nga bulong nga malab-ot mo, na wala anay ginabasa ang ngalan?

[Piktyur sa pahina 9]

Namat-an mo bala ang imo relihion? ukon ginpili mo bala ini?