Krusada sang Kasingki—Ngaa?
ANG Satanismo, ukon pagsimba sa Yawa, nagsugod sang panahon sang unang mga tawo. Ang pagpakunokuno ni Satanas sa hardin sang Eden amo ang nagdul-ong sa pagtalikod sang nahaunang mag-asawa sa ila Manunuga, si Jehova nga Dios. (Genesis 3:1-6; Bugna 12:9) Gintandaan sini sila sing dayon subong nahauna nga alyado ni Satanas.
Sa tion sang milenio nga nagsunod, ginlaaw sang Satanismo ang iya malaw-ay nga ulo sang espiritismo sa nanuhaytuhay nga porma—pangaswang, maitom nga mahiko, paggamit sang gahom sang demonyo, kag madamo pa. Apang, sing malimbungon, ang ngalan ni Satanas kag ang identidad sang iya pagsimba gintago gikan sa mga nagasakdag kag nagahimo sini.
Sugod sang pagbulos sang ika-20 nga siglo, ang sataniko nga pagsimba ginpasag-uli sing dayag kag bal-anon gid, kag karon nabihag na sini ang madamo nga bahin sang kalibutan. Ang satanismo nagguwa sa relihioso nga danyag nga may maisog kag bag-o nga ngalan. Wala na ini nagapanago, nga nagapakunokuno subong maayo. Sa baylo, si Satanas ginasimba sa labing masingki nga mga paagi nga mahanduraw.
Ang isa sang una nga mga tagtukod sang Satanismo sini nga siglo amo ang Ingles nga nagahingalan kay Aleister Crowley. Sang 1905, sa Los Angeles, California, nag-organisar si Crowley sing Satanismo nga grupo nga gintawag “Ordo Templi Orientis.” Wala madugay ginbaton sia subong lider sang nagauswag nga kulto. Sa iya Book of Law, ginsakdag ni Crowley ang bag-o nga pormula sang relihioso nga pagpati: “Himua ang luyag mo amo ang bug-os nga sugo.” Pasad sa sini nga pilosopiya, ginsakdag ni Crowley ang paglapas sa tagsa ka kodigo sang moral kag prinsipio sang Biblia nga nahibaluan sang tawo. Sa amo, ang pagpatay, kasingki, panglugos, kag paghalad sing tawo nangin bahin sang relihioso nga rito.
Tuhoy sa paghalad sing tawo, si Crowley nagsulat: “Para sa halos tanan nga katuyuan ang paghalad sing tawo amo ang labing maayo, kag ang bata nga lalaki nga inosente gid kag maalam amo ang labing maayo kag nagakaigo nga biktima.” Ginpatuhuyan anay ni Crowley ang iya kaugalingon subong amo ang “pinakamalaut nga tawo sa kalibutan.” Sa tapos maghinguyang sing tion sa dalangpan sang mga buang, ginreport nga sia napatay subong giyan sa heroina sa isa ka baratuhon nga ilistaran sa Inglatierra.
Apang, indi makalilipay nga ang pilosopiya ni Crowley tuhoy sa kahilwayan “sa paghimo sang naluyagan sang isa” sa ngalan sang relihion wala mapatay kaupod niya. Talupangda ining obserbasyon sang isa ka manunulat: “Ang landong ni Aleister Crowley daku gid sa [duog sang Los Angeles], apang ang kalautan nga ginhimo niya wala sa kamalingkingan kon ipaanggid sa mga sumilimba sang Yawa karon.”
Katutom sa Yawa
Ang mga sumilimba ni Satanas nagapati nga ang Yawa nagagahom sa kalibutan. Dugang pa, suno kay Robert J. Barry, sang magsulat sia sa The National Sheriff, “kon mag-abot ang katapusan sang kalibutan, daugon sang puwersa ni Lucifer ang puwersa sang Dios kag ni Cristo kag magagahom sia sa langit. Busa, ang mga Satanista nagapanaad sing katutom sa yawa, indi lamang bangod sang iya bulig sa sining kalibutan, kundi sa kalibutan nga magaabot.”
Ginasiling pa kuno nga ang iban nga mga sumilimba ni Satanas nagapati nga “si Cristo kag si Satanas nag-upuray na agod laglagon ang kalibutan.” Ang isa ka kulto ni Satanas nagsiling nga ginagamit ni Cristo si Satanas subong manugpatay. Sa amo, suno kay Maury Terry, sa iya libro nga The Ultimate Evil, “ang pagsimba kay Satanas pareho sa pagsimba kay Cristo. Kag ang pagpatay sa ngalan ni Satanas aktuwal nga isa ka pagpatay para kay Cristo: isa ka balaan nga misyon.”
Si Aleister Crowley ang nagsiling nga luyag niya, subong bahin sang relihioso nga doktrina kag mga buhat sang kulto, “ang pagpasipala, pagpatay, panglugos, rebolusyon, ang bisan anong malain.” Sa pagkamatuod, ginpahibalo sang isa ka lider sang kulto ang maathag nga panawag: “MAGPATAY KA!” Kag maathag gid nga amo sini ang ginahimo sang mga katapo sang sataniko nga mga kulto.
Ginpaathag sang isa ka tawo ang mga rason nila sa kasingki: “Ang panglugos ginahimo agod pierdihon ang pagkaulay sang isa ka lin-ay, nga may pinasahi nga pagkaimportante para sa mga sumilimba ni Satanas. Ang arson isa ka simbulo sang daku nga sunog, ukon Armagedon, kag ang pagpatay ginahimo sa tuyo nga magpalapnag sing kagumon kag sa pagtuman sa tagna sa Daniel: ‘Apang ang malaut magahimo sing malaut pa.’”
Ang pag-usisa sa mga doktrina sang pila ka sumilimba ni Satanas nagapahayag man nga sila nagapati nga si Adolf Hitler takus simbahon. Sa kamatuoran, ang isa ka manunulat nagsiling: “Ginatamod nila ang panglaglag nga ginhimo ni Hitler subong introduksion sang magaabot—kag luyag nila nga aktibo sila sa tion sang daku nga hitabo.”
Ano ang rason sa pagbayaw kay Hitler? Ang nagapangusisa nga reporter nga si Maury Terry nagapaathag nga ang isa ka rason “amo ang talaksan sang numero nga sa diin ang tagsa ka letra sang alpabeto ginhatagan sing numero. Sa idalom sining sistema, ang A katumbas sa 100 kag ang Z nagabagay sa 125. Ang mga numero nga katumbas sa mga letra sa apelyido ni Hitler (107, 108, 119, 111, 104, 117) kon dugangon mangin 666—ang numero sang daku nga sapat sa tulun-an nga Bugna sang Biblia. Ang numero sang yawa.”
Nagabulig ini sa pagpaathag sa lapnag nga paggamit sa numero nga 666, nga ginapinta sa mga dingding sang tilipunan sang coven ukon sa publiko nga mga pader kag mga taytay. Ang mga letra nga HT kag HH ginasiling nga nagatindog para kay Hitler, kag ang korte kilat sa Aleman nga SS ginasiling nga nagasimbulo sa “langit padulong sa impierno, kusog.” Ang swastika ginagamit man sang mga Satanista. “Ang tanan marka sang sapat, Satanas-Hitler, nga ila ginaalagad,” siling sang isa nga tagasulod.
Ang mga Miting Nagadala sing Kasingki
Ginareport nga may yara kapin sa 20 ka pinasahi nga okasyon para sa pagtipon sang mga coven sa sulod sang tuig. Madamo ang natabuan nga nagadungan sa ginatawag nga Cristianong mga selebrasyon. Ginahimo ini sa tuyo nga tamayon ang tanan nga ginakabig nga maayo ukon balaan. Ang Piesta Minatay isa sang daku nga piesta opisyal sang Satanismo. Ang mga miting, ukon sabbat, ginahiwat sa sekreto nga mga lokasyon, nga mahimo magbalhin depende sa mga kahimtangan. “Antes sang tagsa ka miting sang coven,” sulat ni Terry, “si Satanas dapat pahamut-an paagi sa paglugos sa isa ka ulay [lamharon nga babayi], sa pagsunog [arson], ukon ritwal nga pagpatay sa isa ka tawo ukon sapat.”
Ang paghalad sing mga ido kag mga kuring isa ka daku nga butang sa kulto. Sa isa ka lokasyon malapit sa Siudad sang Nueva York, halimbawa, 85 ka ginpanitan nga German shepherd kag Doberman ang nakit-an sa sulod sang 12 ka bulan nga panahon, ang tanan ginasuspetsahan nga ginbuhat sang mga Satanista. Ang mga bahin sang lawas masami nga ginakuha kag ginakaon sa pagpati nga may gahom ini. Ang dugo ginapasa kag ginainom gikan sa pilak nga mga kopa nga kinawat sa mga simbahan—ang tanan subong bahin sang pagsimba kay Satanas. Sa pagkamatuod, ang tawo nga halad ginakabig nga isa ka supremo nga halad nga nagapahamuot sa iya sing kapin. Kag masami sia ginapahamut-an sa sining paagi.
Apang sin-o ining si Satanas? Nagaluntad gid bala sia? Ukon bahin lamang sia sang magaris nga imahinasyon?
[Kahon/Laragway sa pahina 7]
Paghalad Agod Pahamut-an ang Yawa
Sang nagligad nga Abril nakibot ang kalibutan sang matukiban ang bangkay sang kapin sa isa ka dosena nga tawo nga ginpatay bilang halad sa guwa sang siudad sang Matamoros sa Mexico, malapit sa dulunan sang Texas. Ang magasin nga Time nagreport:
“Agod mapahamut-an ang yawa, ginlaga sang mga manugpatay ang mga utok kag mga tagipusuon sang ila biktima, ginlakot sa sini ang mga tul-an sang mga tiil kag mga butkon kag ang mga ulo sang mga sapat. Mapintas gid ang mga sumilimba sang yawa amo kon ngaa duha ka patologo ang naghinguyang . . . sing halos apat ka adlaw sa pagtapos sang ila awtopsiya.”
Ang mga sumilimba sang Yawa nagapati nga magabaton sila sing proteksion gikan sa ila dios kon pahamut-an nila sia paagi sa tawo nga mga halad. Ang tinyente sang mga polis nagsiling nga ang mga manugpatay nangamuyo sa yawa “agod nga indi sila pagdakpon sang mga polis, agod nga indi sila mapatay sang mga bala kag agod nga makakita sila sing dugang pa nga kuwarta.”