Ang mga Pamatan-on Karon—Mahapos Bala nga Biktima sang Satanismo?

“ANG pagsimba kay Satanas nagalapnag sa tunga sang mga pamatan-on,” report sang isa ka Finlandes nga pamantalaan sang Pebrero 27, 1993. Suno sa impormasyon nga natigayon sang pulisiya sang Tampere, Finland, ang mga kriminal nga nadalahig sa pagnegosyo sing droga nagapasulod sing mga pamatan-on, kag ilabi na sing mga babayi, sa sataniko nga pagsimba. Sa madamo nga kaso, ining mga biktima kag bag-o nga mga katapo, mga kabataan nga halin sa 10 pa 15 anyos ang edad. “Ang pagsimba kay Satanas nakasapo sing mauyahon nga duta sa tunga sang karon nga mga tin-edyer,” report sang pamantalaan.

“Ang bag-o nga pag-abot sang pagsimba kay Satanas indi lamang isa ka pungsudnon (Finlandes) nga huyog,” paandam sang pamantalaan. “Halimbawa, ang magasin nga Johannesburg Star sang South Africa nagpaandam kasan-o lang nga ang pagsimba kay Satanas nagasugyot sa puti kag manggaranon nga mga pamatan-on sang pungsod.” Sa pagkamatuod, ang sataniko nga pagsimba isa ka makakulugmat nga kahimtangan nga nagakatabo sa madamo nga pungsod para sa mga ginikanan kag sa kabataan man.

Ang Satanismo malimbungon nga nagapanaad nga madamo ang imo matigayon gikan sa diutay nga panikasog. “Simbaha ang yawa; himua ang iya malaut nga hilikuton, kag bilang balos, ihatag niya sa imo ang luyag mo. Kag amo sina kon ngaa nagakaganyat gid ang kabataan sa Satanismo,” paathag sang magasin nga ’Teen.

“Nagapati ako nga dapat ihinguyang sing bug-os ang kabuhi,” siling sang isa ka tin-edyer nga nagbaton nga katapo sia sang isa ka sataniko nga grupo. “Makita ko ang duha ka puwersa sa kinaugali: ang maayo kag malaut. Ang tanan nga butang nga ginasiling sang mga tawo nga malaut amo ang mga butang nga nagapahalipay sa imo. Ang mga sala nagadul-ong sa emosyonal, pisikal kag mental nga kaayawan,” siling niya.

Sang ginpamangkot ang taga-Denver, Colorado, E.U.A., nga detektib, isa ka eksperto sa sataniko nga mga kulto, kon ngaa sa hunahuna niya ang mga tin-edyer daw amo ang madali gid maimpluwensiahan sang Satanismo, sia nagsabat: “Indi ko gid malipatan ang ginsiling sa akon sang isa ka tin-edyer nga Satanista. Sia nagsiling, ‘Ano ang pulos sang kabuhi? Gamiton namon ini karon kag himuon kon ano ang luyag namon. Wala sing palaabuton.’ ”

Si Dr. Khalil Ahmad, direktor sang serbisyo para sa nagahinupang nga mga pamatan-on sa Nova Scotia Hospital sa Dartmouth, Canada, nagpabutyag sang iya opinyon tuhoy sa pangganyat sang Satanismo. “Ang mga tin-edyer nagapangita sing butang nga makakulunyag. Ang mga maluya sing buot, sa masami sila nga disangkol, amo ang nagakaganyat sa [satanismo]. Nagahatag ini sa ila sing isa ka sayop nga pagdumdom nga may gahom sila.”

Ang isa pa ka kilala nga pulis nga awtoridad batok sa Satanismo, isa ka taga-San Francisco nga detektib, nagpatuhoy sa problema: “Ang aton kalibutan isa ka dimasinapakon nga duog. Mas nabalaka kita sa aton kaugalingon sangsa isa kag isa. Nagapuyo kita sa isa ka masingki, negatibo nga katilingban. Ginatamod ina sang mga pamatan-on nga isa ka normal nga dalanon sang pagkabuhi kag busa ginabuyok sila sa Satanismo.”

Daw ano ka daku ang pagkadalahig sang mga pamatan-on karon sa Satanismo? “Ginapatay sang mga pamatan-on ang ila kaugalingon kag ang ila mga abyan. May problema kita,” paandam ni Larry Jones, presidente sang Cult Crime Impact Network kag isa ka tenyente sang pulisiya sa Boise, Idaho, E.U.A. Ang isa pa ka pulis gikan sa estado sang Illinois, nga nagabantay sang Satanismo sa iya katungdanan subong pulis nga manuglaygay sa isa ka high school, nagsiling nga 90 porsiento sang nga pamatan-on nga nagahampanghampang lamang sa pagsimba sa Yawa ang nagakadalahig bangod uso ini, apang 10 porsiento ang “nagakawili gid kag nangin serioso sa sini.”

Ang isa ka pamantalaan sang eskwelahan sa Brooklyn, New York, nga School News Nationwide, Enero-Pebrero-Marso 1994, sa seksion sini nga “Relihion,” nagbalhag sing isa ka artikulo nga natig-uluhan “Kon Ngaa ang Satanismo Makagalanyat sa mga Tin-edyer.” Nagreport ini: “Sa tapos mag-away ang duha ka pamatan-on nga lalaki sa kapeteria sang high school, ang nagdaug naglumpat kag nagpakita sing isa ka makatalanhaga nga pagsaludo sang kamot, isa ka ginakuom nga kamot nga ginapasiwil ang inugtudlo kag kamalingkingan nga tudlo. Indi mahangpan sang isa ka manunudlo sa art kon ngaa madamo gid nga pamatan-on ang nagadrowing sing mga laragway sang daw demonyo nga mga lalaki nga may mga ulo sang kanding. Kag nagakadula sa librarya sang eskwelahan ang mga libro tuhoy sa okulto.

“Ang mga pamatan-on, sa kamatuoran, nagahampanghampang sa gahom, sa madyik, sa tanhaga sang Satanismo. Para sa kalabanan, makalilipay ini kag makakulunyag. Para sa iban, serioso ini​—serioso gid kag makamamatay para sa 17-anyos nga si Lloyd—​nga napatay bangod ang iya kabuhi gingamit nga halad kay Satanas.

“Sa tapos mapatay si Lloyd kag madakop ang iya 15-anyos nga manghod nga lalaki bangod nakapatay, nag-athag sa taga-Monroe nga mga hamtong kon ano ang buot silingon sang mga sinyas nga madugay nangin makatalanhaga sa ila: ang ‘sinyal sang yawa’ sa sinyas sang kamot, ang ulo sang kanding nga mga laragway kag ang mga libro nga naggatong sa mga imahinasyon, mga rito kag mga panganinaw sang mga tin-edyer.”

Daw walay katapusan ang mga report tuhoy sa mga lanubo kag mga tin-edyer nga nagapatay sa ila mga ginikanan kag iban pa nga mga katapo sang ila pamilya bangod sang pagsimba kay Satanas. Ang mga kabataan ginpatay sang iban nga mga kabataan sa sina nga mga buhat. Kaangay sang sataniko nga mga hamtong, ginautod-utod kag ginapatay sang kabataan ang mga sapat. Ang sinagod nga mga hayop sang pamilya ginahalad sa altar sang sataniko nga mga rito. Kulang ang espasyo diri agod ibalhag bisan ang bahin lamang nga pagkobre sang pagpamatay nga ginahimo sang kabataan nga nagbaton sang relihion nga pagsimba sa Yawa.

Paghampanghampang lamang bala sa Satanismo ining mga halimbawa sang kabataan? Diutay lamang bala ang serioso gid sa pagsimba sa Yawa? Indi, amo ang sabat sang nag-imbestigar sa sining mga umalambit sa okulto. Si David Toma, isa ka detektib anay sa mga bisyo nga nangin isa ka humalambal para sa mga pamatan-on, nagsiling nga sa tagsa ka eskwelahan nga iya ginahambalan, nagapamangkot sia sing pareho nga pakiana, “Pila sa inyo ang may kilala ukon nakabati na tuhoy sa isa nga nadalahig sa Sataniko nga mga buhat?” Ginabanta niya nga “un-tersia tanan sang mga estudyante ang nagabayaw sang ila mga kamot.”

Suno kay Shane Westhoelter, presidente sang National Information Network, kutob sa 30 tubtob 40 porsiento sang mga estudyante sa high school ang nadalahig sa pila ka porma sang okulto. Dugang pa, nagsiling si Westhoelter nga tubtob sa 70  porsiento sang tanan nga krimen nga ginahimo sang mga tin-edyer nga kubos sa 17 ang edad ang bangod sa pagkanadalahig sa okulto.

[Blurb sa pahina 5]

Ang pagsimba kay Satanas nakasapo sing mauyahon nga duta sa tunga sang mga pamatan-on karon