Isa ka Makamamatay, Nagadaku nga Katalagman

DAW malipong ka bala sa kahadlok sa paghunahuna sang mga tawo nga nagatiid sa iban nga tawo kag dayon, kaangay sang gutom nga mga leon, nagapatay sa ila biktima, nagainom sang ila dugo, nagakaon sang ila tagipusuon kag sang iban nga mga bahin sang lawas—tanan sa ngalan sang relihion?

Nagakurog ka bala sa paghunahuna sang mga iloy kag mga amay nga nagahalad sang ila kaugalingon nga mga anak agod himuslan sang iban, kag sa ulihi patyon sa ibabaw sang altar sa atubangan sang tanan nga tumalan-aw para sa relihioso nga kaayawan?

Nagalibog bala ang imo ulo sa paghunahuna sang mga lalaki nga nagapakigseksuwal nga relasyon sa mga patay sa punerarya agod pahamut-an ang espiritu nga tinuga nga ginahunahuna nila nga balaan?

Ginapangilkigan ka bala kon makabasa ka tuhoy sa mga bata nga nagapatay sa ila mga ginikanan kag dayon ginautod-utod ang ila lawas nga wala sing kaluoy ukon kahilas—agod lamang pahalipayon ang Yawa?

Nagalungolungo bala ang imo ulo sa indi pagpati sa mga tawo nga nagakutkot sang mga lulubngan, ginakawat ang mga ulo kag ginautod ang lutalutahan sang tudlo agod nga masuksok nila ini sa relihioso nga mga seremonya?

Ano ang ginahunahuna mo tuhoy sa isa ka relihion nga nagasakdag nga ang ila 13- pa 25-anyos nga babayi nga mga katapo gamiton sa pagpaliwat agod nga ang ila mga lapsag mahalad sa pagpatulo sing dugo nga mga halad?

‘Ano ang masunod nga mahunahuna sang mga nagahimo sing pelikula?’ mahimo ipamangkot mo samtang ginabasa mo ini. ‘Total, indi man ini matuodtuod,’ mahimo isiling mo. A, apang amo bala?

Ang bag-o mo lang nabasa matuod gid! Indi ini bahin sang imahinasyon sang isa ka manunulat sing sugilanon. Mahimo nga natabo na ini sa inyo banwa. Kon wala pa, may panagupnop nga matabo ini.

Ang relihion nga nagalakip subong bahin sang mga sermonya sini sang paghalad sa mga sapat kag mga tawo, sang pag-abuso sa sekso sa kabataan, sang paglugos sa ulay nga mga lin-ay, sang seksuwal nga pagkasalamwanan, kag sang iban pa nga buhat ginatawag nga Satanismo, ukon pagsimba sa Yawa. Makatilingala gid kag malayo gid sa kinaandan ang mga buhat sang Satanismo amo kon ngaa madamo nga opisyal kag mga banwahanon ang indi luyag magpati nga ginahimo nila ini subong bahin sang ila pagsimba.

Ang kulto sang Satanismo, nga sang nagligad lamang nga pila ka tuig may diutay nga sumulunod, nangin isa ka nagadaku kag makamamatay nga katalagman. “Ang Satanismo amo ang kulto sang katuigan 1980,” report sang isa ka opisyal sang polisiya sa San Francisco. “Ang Satanismo bahin sang organisado nga krimen sang Australia,” siling sang isa sang nagapanguna nga mga eksperto sa krimen. “Ginabanta ko nga 20,000 ang malig-on nga mga sumulunod sini sa Australia, nga aktibo gid sa pagsimba kay Satanas, sa seksuwal nga mga seremonya, sa paghalad sing mga sapat kag sing mga tawo pa gani. Nagapati ako nga ining hublag may kahilabtanan sa listahan sang nagakadula nga kabataan kag lakas nga nagagamit sing droga kag nagapangutkot sang mga patay sa mga sementeryo.”

Ang mga grupo sang kulto sang Satanismo masami nga ginaorganisar sa mga coven, nga ginahuman sang 9 pa 13 ka katapo ang tagsa—ayhan kapin pa, depende sa mga kahimtangan. Ginabanta sang awtoridad nga sa Estados Unidos, may mga 10,000 ka coven sang 1946; 48,000 sang 1976; kag 135,000 sang 1985. Kon pila sining mga coven ang indi masingki kag kon sin-o ang nagapain sa mga grupo nga indi masingki, indi mahibal-an. Suno sa Marso 7, 1986 nga National Catholic Reporter, “may yara 150 ka aktibo nga coven” sa siudad sang El Paso, Texas, “nga ginahuman sang 2,000 ka satanista sang tanan nga edad.” Kag ang Bulletin sang Pennsylvania State Police nagareport: “Nagauswag ang Satanismo sa Amerika. Daw wala sing adlaw nga nagaligad nga wala sing mga report tuhoy sa kasingki nga ginhimo sang mga Satanista.”

Dugang pa, ginapabugal sang Satanismo nga may mga katapo sila nga naghalin sa ginatahod nga mga propesyon sang kalibutan—mga doktor, mga abogado, mga negosyante, mga polis, mga madre, mga pari, mga ginang sang puluy-an, kag mga tawo sang militar. Apang, upod ang daku nga mga resulta, bag-o nga mga katapo ang ginakuha gikan sa mga hayskol kag mga kolehiyo sa bilog nga kalibutan. Busa, sa madamo nga duog karon, mga tin-edyer ang nagahuman sa kalabanan sang mga coven.

Ang New Zealand Herald sang Agosto 26, 1988, nagreport: “Ang mga tin-edyer nga subong ka lamharon sa 14 nahaylo sa kalibutan sang Satanismo.” Ang isa ka taga-Canada nga opisyal nagsiling: “Ang mga bata nga . . . nagatilawtilaw sa Satanismo subong ka makatalagam sa malig-on (nga mga Satanista).”

Nagreport tuhoy sa madamo nga pamatan-on sa bilangguan sa Canada, ang isa ka empleyado nagsiling: “Nakibot ako nga madamo sa sining mga pamatan-on ang mga Satanista. May mga tato sila sang mga simbulo sang Satanismo, nagahiwat sila sing mga rito, nagatuo gid sila sa yawa.”

Ang 18-anyos nga babayi nga bilanggo nag-ugyon nga ang Satanismo popular gid sa iya mga katubotubo. Ginbaton sang isa ka taga-Canada nga pamatan-on nga lakip sia sa 400 ka katapo sang kulto ni Satanas nga nagapanghikot sa Alberta. “Ang tin-edyer nga mga sumilimba sa yawa indi dapat pasapayanan,” siling sang isa ka taga-Canada nga eksperto sa krimen.

Ang mga katapo sang kulto may mabaskog nga panaad sa grupo tubtob buhi sila, nga nagalakip sang estrikto nga pagpanumpa nga itago ini. “Ang mga katapo wala ginatugutan sa pagbulag sa grupo sa tion nga mahibaluan na nila ang ila nanuhaytuhay nga kriminal nga mga buhat,” report sang The National Sheriff. “Ang isa ka katapo nga maglapas sa kasugtanan nga itago ini nagabutang sang iya kabuhi kag sang kabuhi sang iya pamilya sa daku nga katalagman,” dugang sang magasin. “Naprograma na [sila] nga indi manugid,” siling sang isa ka awtoridad sa Chicago. “Kon manugid sila, naprograma sila nga patyon ang ila kaugalingon.”

Ang mga katapo sang mga coven nagatinguha man nga taguon ang ila ngalan kag indi kilala sang mga opisyal nga nagapatuman sang kasuguan. “Nagapati sila,” siling sang isa ka ginkuhaan nga, “ang ila malaut nga kriminal nga mga buhat indi pagpadyaan ni Satanas kon makilal-an sila kag usisaon sang awtoridad.” Sa amo, masami nga natabuan lamang kon makilal-an nga kulto ni Satanas ang naghimo sang isa ka krimen. Sang nagligad lamang nga mga tinuig nga nakilal-an sang pila ka nagapatuman sang kasuguan nga mga ahensya ang mga palatandaan nga nabilin sa danyag sang makamamatay nga mga krimen nga nadalahig ang espiritismo—halimbawa, mga pahina sang baliskad nga Biblia nga may krus nga drowing sa duta sa tupad sini ukon numero nga 666 nga ginsulat paagi sa dugo sang biktima.

Apang, ngaa nagagamit sila sing kasingki sa ngalan sang ila relihion? Binagbinaga ang pila sang makapakibot nga mga rason sa masunod nga artikulo.

[Kahon sa pahina 3]

Mabudlay Patihan—Apang Matuod

Ang “Bulletin,” isa ka publikasyon sang nagakadula nga mga tawo sang Pennsylvania State Police, nagareport: “Daw indi magpati ang mga imbestigador sa makatilingala kag indi mapatihan nga mga palatandaan sang kriminal nga mga buhat sang mga tawo nga nagasul-ob sing malaba nga mga panapton sang pari kag napunihan sing mga simbulo sang yawa.”

Apang, suno sa “Bulletin:” “Daw wala sing adlaw nga nagaligad nga wala sing mga report tuhoy sa kasingki nga ginhimo sang mga satanista. Sa bug-os nga pungsod ang mga organisasyon nga nagapatuman sang kasuguan nagabaton sing mga report tuhoy sa pagpatay, gin-utod-utod nga lawas, pag-atake, paghikog, ginhimuslan nga mga bata kag gin-utod-utod nga mga sapat nga ginaangot sa kulto ni Satanas.”