Ang Pagtamod sang Biblia
Pangamuyo sa mga Hampang—Nagapamati Bala ang Dios?
PUNO sing kakunyag ang palibot samtang nagadinaguso ang linibolibo ka humalangad pasulod sa istadyum, nga nagasinggit sing supurta para sa ila paborito nga team. Ang mga humalampang bag-o lang makatapos sang ila warm-up nga ehersisyo, kag malapit na huypon ang pito sa pag-umpisa sang hampang. Sa isa ka bahin sang latagon, ang mga humalampang nagtipon, kag sa tunga nila nagaluhod ang kapitan, nga nagapangamuyo: “Dios namon, pakamaayuha palihog ang amon team, ihatag sa amon ang kadalag-an batok sa amon kontra, kag amligi kami gikan sa halit. Amen.” Ang pagtipon nabungkag paagi sa isa ka mabaskog nga singgit, ang mga humalampang nagposisyon sa latagon, ang pito ginhuyop, kag ang organisado nga paghalitay sang football sang Amerika nagsugod.
Ang pagpangamuyo sang indibiduwal kag sang team antes, sa tion, kag sa tapos sang pagpakigbahin sa lainlain nga hampang kinaandan na. Apang nagapamati bala ang Dios? Ukon subong ginabais sang iban, ginahimo bala sini ang pangamuyo nga kaladlawan?
“Dugmuka ang Imo Isigkatawo”
Sa bug-os nga kalibutan, ang halos tagsa ka hampang namantsahan sing kasingki—sa latagon kag sa pulungkuan. Ang isa ka propesyonal nga humalampang anay sing football sa Estados Unidos nagsulat: “Masiling gid sa pagkamatuod nga ang pagdugmok sa lawas amo gid ang katuyuan sang football, subong nga ang pagpatay kag pagpierdi sa lawas amo ang katuyuan sang inaway.” Nagkomento pa sia: “Ang mapaindis-indison kag organisaso nga paghalitay isa ka bahin sang aton dalanon sang pagkabuhi, kag ang football isa sang mahangpan sing kapin nga salaming . . . nga nagapakita kon daw ano ka makakulunyag kag makapaladya nga Dugmukon ang Imo Isigkatawo.”
Dugmukon ang imo isigkatawo? Nagsiling si Jesus nga higugmaon ang imo isigkatawo. (Mateo 22:39) Imposible hunahunaon nga ang Dios sang hampang nagatan-aw kag nagapakamaayo sa isa sang mga hampang karon, nga ginapadaku ang pagdaug bisan ano man ang matabo.—1 Juan 4:16.
Nagatan-aw Bala ang Dios sing mga Hampang?
Ang isa ka butang nga nagapalig-on sang pagpangamuyo sa hampang amo ang relihioso nga panudlo nga ang Dios yara bisan diin, nga ang Dios, sa tanan nga tion, yara sa tanan nga duog kag mga butang. Halimbawa, sa God Goes to Football Games, ang klerigo kag kapelyan anay sang isa ka team sang hampang nga si L. H. Hollingsworth nagsiling: “Ang tagsa ka pormal nga pagtuo nga aton ginatuuhan nahanungod sa Dios nagalakip sang ideya nga Sia omnipresente; ang ideya, kon luyag mo, nga Sia yara bisan diin sa aton ginatawag nga sekular nga eksperiensia naton . . . Buot silingon, ang Dios nagakadto sa simbahan, kag ang Dios nagakadto sa football nga mga hampang.”
Apang, wala ginatudlo sang Biblia nga ang Dios yara bisan diin. Ang Cristiano nga si apostol Pablo nagsulat: “Si Cristo nagsulod . . . sa langit gid, karon sa pagpahayag sa atubangan sang Dios tungod sa aton.” (Hebreo 9:24) Duha ka importante nga punto ang ginabulig sa aton sining teksto nga mahangpan naton: nga ang Dios isa ka espiritu nga persona kag nga sia may yara establisado nga puluy-an, ang langit. (1 Hari 8:49; Juan 4:24) Gani indi mahimo nga yara sia bisan diin sa isa ka tion.
Ginapamatian sang Dios ang Iya mga Abyan
Ti, kon ang Dios wala nagatan-aw sing mga hampang, ginapamatian bala niya sa dimagkubos ang mga pangamuyo? Agod ang pangamuyo makalab-ot sa palamatin-an sining Dios sang langit, nga sa atubangan niya nagpakita si Jesus, ang isa nga nagapangamuyo dapat may ihibalo, ihibalo tuhoy sa iya sang Dios mga katuyuan, personalidad, mga kinaiya, mga dalanon, kag sa iya ngalan. (Santiago 4:3) Nagapadaku sang kinahanglanon nga makilala ang Dios, si Jesus nangamuyo: “Nagakahulugan ini sing kabuhi nga wala sing katapusan, ang ila pagkuha sing ihibalo tuhoy sa imo, ang lamang matuod nga Dios.”—Juan 17:3.
Agod makilala ang isa, kinahanglan ang komunikasyon. Ang Dios nagakomunikar sa tawo paagi sa Biblia, kag ang Biblia amo ang paagi agod makilala naton ang Dios sang langit. Ginasugid sini sa aton ang iya ngalan, nga Jehova. (Salmo 83:18) Nagasiling man ang Biblia nga ginhigugma gid sang Dios ang kalibutan sa bagay nga ginpadala niya ang iya bugtong nga Anak, si Jesus, diri sa duta agod ang tawo may kahigayunan sa kabuhi nga wala sing katapusan. (Juan 3:16) Samtang ginabasa naton kag ginatun-an ang Biblia, si Jehova nagamatuod sa aton, kag nagalapit kita sa iya paagi kay Jesus. (Juan 6:44, 65; Santiago 4:8) Bangod matuod gid si Jehova, makapalambo kita sing suod nga personal nga kaangtanan sa iya.
Apang, ang pagpakig-abyan sa Dios nagadalahig sing duha-sing-dalanon nga komunikasyon. Kinahanglan sini ang pagpakighambal kay Jehova paagi sa pangamuyo. Ang Biblia nagasiling nga ang Dios “Manugpamati sa pangamuyo” kag “indi sia malayo gikan sa tagsatagsa sa aton.” (Salmo 65:2; Binuhatan 17:27) Apang, wala ini nagakahulugan nga ang Dios nagapamati sa tanan nga pangamuyo. (Isaias 1:15-17) Kay sin-o mga pangamuyo ang luyag pamatian sang Dios?
Ang salmista nga si David nagsiling: “Ang pagpakasuod kay Jehova yara sa ila nga nagakahadlok sa iya.” (Salmo 25:14) Sa orihinal nga Hebreo, ang ginhalinan sang “pagkasuod” (sohd) nagakahulugan sing “hugton.” Busa, ining bersikulo nagapaalinton sing ideya nga pagsulod sa nasulod nga sirkulo ni Jehova ukon pasulod sa katipan sang pagpakig-abyan sa iya. Ang ginabaton lamang amo ang mga sumilimba nga nagapakita sing nagakaigo nga pagtahod. Sa amo, bangod sang aton suod nga pagpakig-abyan sa Dios, nahadlok kita nga utdon ina nga relasyon paagi sa paghimo sing bisan ano nga magapaakig sa iya, subong sang pagkabig sa pangamuyo subong isa ka anting-anting agod masigurado ang pagdaug sa hampang.
Ginapamatian ni Jehova ang mga pangamuyo sang bunayag sing tagipusuon nga mga tawo nga nagatinguha sa pagpakig-abyan sa iya, kag wala sia sing ginadampigan. Wala sia sing mga paborito ukon ginapadunggan niya ang isa ka pungsudnon nga grupo, rasa, ukon bisan ang isa ka team sang hampang, batok sa isa. (Salmo 65:2; Binuhatan 10:34, 35) Kon ang Dios nagapamati sa mga pangamuyo sang mga nagapaindis-indis sa hampang kag ang duha ka team nangamuyo sa iya para sa kadalag-an, diin ang iya pakamaayuhon? Ukon kon ang isa ka humalampang serioso nga nahalitan sa tion sang hampang, basulon bala ang Dios?
Busa, dapat kita mangamuyo para sa husto nga mga butang. Ginapaathag ini ni apostol Juan sa sining paagi: “Kon magpangayo kita sing bisan anong butang suno sa iya kabubut-on, nagapamati sia sa aton.” (1 Juan 5:14) Ginapamatian ni Jehova ang mga pangamuyo nga nahisuno sa iya kabubut-on. Dapat naton hibaluon ang iya kabubut-on kag mga katuyuan agod ang aton mga pangamuyo mahisuno sa sini.
Ang kabubut-on kag mga katuyuan sang Dios kag ang iya mahimayaon nga ngalan wala sing kahilabtanan sa mapaindis-indison kag masingki nga mga hampang karon. Ang Dios wala sing ginadampigan. Sa amo, kon ginahalad ang mga pangamuyo sa sining mga okasyon, nagapamati bala ang Dios? Wala gid!