May Ginadampigan Bala ang Dios sa mga Isport?

ANG isa ka nagdaug nga manugpalumba sa dalagan nagluhod kag nangamuyo, nagapasalamat sa iya nahimuan. Apang, mahimo gid nga ang iban nga mga manugpalumba sa paindisanay nangamuyo man sa Dios para sa kadalag-an​—kag napierdi.

Duha ka boksidor ang nagaluhod sa pihak kag pihak nga pamusod sang ring sa wala pa ang una nga round sang ila sambuwa. Lunsay sila nanguros, isa ka porma sang hipos nga pagpangamuyo sa Dios para sa kadalag-an. Dayon gintumba sang isa ang isa. Sa iban nga mga sambuwa, isa lamang ka manugsambuwa ang mahimo nagapangamuyo sa Dios sing kadalag-an, apang indi sia ang nagadaug sa tanan nga tion.

Sa mga isport sang mga team, ang mga grupo sang mga humalampang mahimo nga nagapangamuyo antes, sa tion, ukon sa tapos sang isa ka hampang. Halimbawa, sa nagahingapos nga mga segundo sang football nga hampang sa American Super Bowl, naglinya ang isa ka manugsipa para sa kinahanglanon gid nga puntos sa inangan nga magapadaug sa iya team ukon magapapierdi kon mapaslawan sia. Ang manugsipa nagsiling sang ulihi: “Nangamuyo ako para sa sini.” Apang ang iban sa kontra nga team nangamuyo man para sa sini​—para sa baliskad nga resulta.

Bisan pa mahimo mangamuyo ang duha ka bahin, ang isa ka bahin dapat nga mapierdi. Bisan ang mga humalampang sang nagdaug nga team nga nangamuyo pa sa kadalag-an mahimo nga mapierdi sa masunod nga hampang. Sa pagkamatuod, sa ulihi, sa katapusan sang liga, ang tanan nga iban pa nga team dapat mapierdi, kay isa lamang ang kampeon sa isa ka liga. Apang, ang kalabanan sa napierdi nga mga team may mga humalampang nga nangamuyo para sa kadalag-an.

Sa isa ka artikulo nga natig-uluhan “Save Your Prayers, Please,” ang isa ka kolumnista sa mga isport nagsulat: “Bangod lamang nagapahambog kamo kon daw ano kamo kalapit sa Dios, wala nagakahulugan nga matuod ini. . . Sang Inaway Kalibutanon II, ang Aleman nga mga soldado may prase nga nasulat sa bilya sang ila paha: Gott mit uns. Kon badbaron: ‘Upod naton ang Dios.’ ” Ang isa pa ka manunulat sa mga isport nagsiling: “Wala sing ginadampigan ang Dios sa football nga mga hampang. Ang kalibutanon nga mga butang kaangay sini ginadesisyunan sang mga lalaki kag mga babayi, indi sang Labing Gamhanan.”

Si apostol Pedro nagsulat: “Ang Dios walay ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sing pagkamatarong kalahamut-an sa iya.” Ang pagpakigbahin sa masingki nga mga isport indi ‘paghimo sing pagkamatarong.’ (Binuhatan 10:​34, 35; Roma 14:19) Kon ginpamatian sang Dios ang mga pangamuyo sang mga nagapangayo sing kadalag-an kag nasamad ukon napatay pa gani ang isa ka manugpaindis-indis, basulon bala ang Dios?

Ang Pulong sang Dios nagasiling: “Kon magpangayo kita sing bisan ano suno sa iya kabubut-on, nagapamati sia sa aton. “ (1 Juan 5:14) Agod sabton ang mga pangamuyo, dapat mahibaluan sang isa ang kabubut-on kag mga katuyuan sang Dios, kag ang iya mga buhat dapat nagahisanto sa sina.​—Ipaanggid ang Mateo 6:​9, 10.

Indi, ang kabubut-on kag mga katuyuan sang Dios wala sing kaangtanan sa mga isport. Sa amo, kon ang mga pangamuyo para sa kadalag-an ginahalad para sa sini, nagapamati bala ang Dios? Wala gid.

[Picture Credit Line sa pahina 31]

UPI/Bettmann