Paglikaw sa Sunog sa Balay

SUNO sa sugilanon nga nagalapta, nasipaan sang baka ni Gng. Patrick O’Leary ang de-gas nga suga sa kamalig kag amo ang ginbangdan sang sunog sa Chicago sang 1871. Ang bili sa nahalitan nga mga propiedad kag kabuhi makahalawhaw. Suno sa isa ka balita, ang sunog nagbilin sing 100,000 ka wala sing balay, nagguba sang kapin sa 17,400 ka tinukod, kag nagpatay sing 250 ka tawo.

Sa karon, pagligad sang 120 ka tuig, ang modernong teknolohiya sa pagpalong sang sunog nakabulig sa pagtapna sang madamo sang dalagku nga mga sunog. Apang, ang sunog sa mga balay makatalagam gihapon. Ang NFPA (National Fire Protection Association) nagasiling nga sa Estados Unidos, halos lima ka libo ka tawo ang napatay bangod sang sunog sa mga balay sa isa ka tuig. Subong narekord sa The Vancouver Sun, ang NFPA naghatag sing pila ka simple nga ideya agod malikawan ang pagsugod sang sunog sa balay. Amo ini ang:

◻ Indi pagtuguti ang pagpanigarilyo sa sulod sang balay. Ang aksidente nga nagadalahig sing indi mahalungon nga mga nagapanigarilyo amo gihapon ang panguna nga kabangdanan sang kamatay bangod sang sunog sa balay.

◻ Indi pagbiyai ang diutay nga mga heater nga nagaandar nga wala sing bantay ukon samtang nagatulog ka.

◻ Indi magsobra sa limite nga koryente nga magamit ukon indi paggamita ang may gunat nga mga kord. Gamita lamang ang nagakaigo nga kadakuon sang fuse.

◻ Hupti nga matinlo ang mga hurno kag tsimenea. Usisaa ini kada tuig.

◻ Usisaa ang smoke detector sing regular, kag isli ang mga baterya kada tuig. Pat-ura nga kilala sang tanan sa pamilya ang tunog sang smoke detector.

◻ Pat-ura nga nahibaluan sang tanan sa pamilya ang guluwaan nga ruta kon may sunog, kag hupti ang guluwaan nga wala sing sablag.